«БАТЬӦС ГАЗЕТУЙТӦМАӦСЬ»
— Менсьым батьӧс газетуйтӧмаӧсь!.. Мам, мам, батьтӧ газетуйтӧмаӧсь, — зэв повзьӧмпырысь горӧдіс Анна керкаас пыригкості на. Нылыдлӧн лолыс тырӧма, тыдалӧ, котӧртӧма.
— Чӧ-ӧв, — шай-паймуні пӧрысиник тьӧтушка, мамыс Анналӧн, — мый нӧ сӧран, Анӧ.
— Збыль, збыль, мамӧ.
— Мун сэтысь, эн сӧр. Газетуйтісны!.. — скӧрмискодь тьӧтушкаыд. Ачыс эськӧ страсьт ёна нин повзис: быдсӧн киясыс рудзмуніны, юрыс бок ног пӧлыньтчис, став тушаыс лигышмуні.
— Збыльысь нӧ... Оз верит. Ӧні вӧлі Мишӧ Ёгор ордын да, сэні висьталісны. «Югыд туйын» газетуйтӧмаӧсь. Висьталісны да, меным быдӧн эз ло лӧсьыд.
Медводдза повзьӧмыс прӧйдитіс тьӧтушкалӧн. Муртса артмалӧны, юасьӧ нылыслысь:
— Мыйысь нӧ, мыйысь? Кутшӧм лёк вӧчӧма?.. Кодӧскӧ нӧйтӧма?.. Кодӧскӧ видӧма?.. Тӧрыт карад вӧвнас лэччыліс да... Али мыйкӧ гусялӧма?..
— Ме ог тӧд, ачым ог тӧд, — быд юалӧм вылӧ дольӧ Анна.
— Мый нӧ либӧ сӧран, — горӧдіс ныв вылӧ тьӧтушка. — Аслым лоӧ ветлыны.
— Господьӧ, господьӧ, быд дивӧыд мунлӧ миян вывті. Газетад веськалан, — кияссӧ пальто сосъясас сюйигмоз шуалӧ тьӧтушка...
— Мыйысь нӧ газетас сюрӧма миян кӧзяиныс, Иван, — Мишӧ Ёгор керка порогсӧ воськовтігӧн на юаліс тьӧтушка. — Кодӧскӧ видӧма? Тӧрыт карӧ лэччыліс да.
— Ме ог тӧд. Нинӧмысь кӧ абу-а. Ме эг аддзыв.
— Кыдзи абу?.. Анӧ шуӧ: эм пӧ да... Асланым карса газетӧ газетуйтӧмаӧсь.
— Ме ог тӧд, бара. Эм «Югыд туйын»... вӧв карточка вошӧм йывсьыс. «Утеряна пӧ карточка». Гашкӧ, сійӧс и висьтавлӧ Аннаыд.
— Сыысь?!. Мыйла нӧ?.. Ыджыд мыж ӧмӧй сійӧ? Со ӧд, со мый карад керсьӧны. Кернысӧ сэсся нинӧм-а... Вот юр янӧдысьыд. Вӧв карточка вӧсна газетӧ. Синсӧ, локтас да, кыскала!.. Газетӧ веськӧдчӧ, аслас сямтӧм олӧмнас, нэм кежлӧ юр янӧдіс, — ропкыны кутіс тьӧтушка аслас мужикыс вылӧ.
Татшӧм «дивӧыс» вӧлі Кӧтшпомын. Неважӧн видлалісны военнӧй учрежденньӧяссянь вӧвъясӧс. Кӧтшпомса дядьӧ воштӧма вӧв карточкасӧ да, лои юӧртны сы йылысь газетын. Сэсся сійӧс и шуӧны газетуйтӧмӧн.
...«Тэ, дерт, абу прамӧй морт, газетуйтӧмаӧсь нин да», — шулывлӧны коми йӧз. Кӧсъян кӧ дорйыны кутшӧмкӧ мортӧс, тэныд крапкасны: «Мун нин дорйыныд сійӧс. Сійӧ ӧд газетӧ веськавлӧма нин и быдтор». Тадзи думайтны, дерт, абу лӧсьыд. Тадзитӧ абу збыль. Газетӧ веськалӧмысь повны нинӧм. Сыысь полӧны сӧмын омӧльтор вӧчысь мортъяс. Газетыд велӧдӧ овны. Газетын колӧ «бурторсӧ ошкыштны, омӧльторсӧ чышкыштны» — кыдзи сьывсьӧ ӧти сьыланкывйын Нёбдінса Витторлӧн. Газетӧ колӧ гижны унджык крестьяналы, гижны ас олӧм йывсьыс, удж йывсьыс, асгӧгӧрса йӧз олӧм йывсьыс. Этша на ӧд газетыдлы, крестьяна кӧ сӧмын сійӧ гижӧны. Колӧ, мед крестьянаыс асьныс унджыкӧн гижӧны асланыс газетас. Дерт, ми вӧв карточкаяс вошӧм йывсьыд гижӧдӧн огӧ на лыддьӧй, сійӧ ӧд прӧстӧй юӧр.
Жугыль.
