УНА ПЕРЕМЕНАӦН УДЖАВНЫ БУР

1919 воӧдз менам няньӧй вӧлі этша, некор эз тырмыв. Войдӧрджыксянь нин эськӧ ньӧжйӧникӧн видз-муӧс паськӧді, пашняяс гӧри, да куйӧдтӧгыд мем выль муясыд бурсӧ эз вайны. 1919 восянь заводиті ме кӧдзыштавны му вылӧ турун. Ӧні ме вӧдита му 7 переменаӧн: 1) коськӧм, 2) сю, 3) картупель, 4) ид либӧ зӧр, бобӧнянь да тимофеевкакӧд сора, 5) первой вося бобӧнянь, 6) мӧд вося бобӧнянь, а сизимӧдлаас ӧттор-мӧдтор: шабді, зӧр, ид и сідз водзӧ. Куйӧд ӧні ме му вылӧ ог пӧрлӧдлы важ моз ичӧтик чукӧръясӧн, а куйӧд додьтӧ ректа ӧти чукӧрӧ, мед оз косьмы да паляв. Ыджыд чукӧрад сійӧ пӧжсяс да вынаджык на лоӧ. Бобӧнянь кӧйдыстӧ ме лӧсьӧда ачым. Кор бобӧнянь туруныдлӧн юрыс сьӧдӧдыштас да кӧйдысыс неуна чорзьыштас, турунтӧ колӧ вундыны чарлаӧн либӧ ытшкыны литовкаӧн, сӧмын оз ков косаӧн. Сэсся турунтӧ кольтаалан да сувтӧдан косьтыны. Косьмас да, нянь моз тэчан сёрӧмӧ. Шупӧдігад колӧ бобӧняньтӧ небыд жарын косьтыны. Вартігад мед вӧлі гумлаыд кын. Мыйӧн турун помсьыс бобӧняньлӧн юрыс торъялас, турунсӧ колӧ чышкыны, а юрсӧ бура вартны. Вартсьӧм бӧрас кӧйдыстӧ тӧлӧдан машинаӧн кӧть пӧлӧн, сэсся уна пӧлӧс пожъясӧн пожналан.

Зэв позьӧ уна переменанад миянын уджавны, ыджыд пӧльза сэсь воӧ, сӧмын йӧзыд оз на гӧгӧрвоны тадз уджалӧмыслысь бурсӧ да шуасьӧны: со пӧ эм небось муыс, турун кӧдзны вичмӧ. Сэсся йӧз завидь вӧсна паськӧдчыныд оз лэдзны да налогтӧ ыджыдӧс сюйӧны. Мед кӧ видз-мутӧ лӧсьӧдтӧгыд (землеустройствотӧг) он вермы торксьытӧг переменаястӧ лӧсьӧдныд.

Визин Коллёльса крестьянин П. А. К.