КОМИ СЕЛЬКОРЪЯСЛЫ

Кыдзи колӧ ӧтувтчыны. — Мый йылысь гижны газетӧ.

Миян обласьтын селькоръяс эмӧсь вель унаӧн. Быд вӧлӧсьтын сюрӧ нёль-вит селькор. Быдлаын, быд пельӧсын Коми му пасьта лэдзӧны стеннӧй газетъяс. Сэтчӧ гижысьыс абу нин нёль-вит морт, а унджык. Сідзкӧ быдлаын селькоръяслы эм туйыс ӧтувтчӧм вылӧ. Сӧмын тай унджык вӧлӧсьтъясас на селькоръяслӧн ӧтувтчӧмыс абу. Весиг унджык селькоръясыс оз и думыштны ӧтувтчӧм йывсьыс, оз зільны ньӧти та вӧсна. Ӧткымынлаын селькоръяс эськӧ ӧтувтчӧмаӧсь, да налӧн уджныс оз тыдав, оз мун.

Селькоръяслы ӧтувтчыны ёна колӧ быд вӧлӧсьтын, быд сиктын. Ӧтувтчӧмын селькоръяслы аслыныс лоӧ зэв уна пӧльза. Уна бур жӧ ӧтувтчӧмыс сетас газетлы, крестьяналы, накӧд тшӧтш партиялы дай Сӧвет власьтлы.

Ӧтувтчӧмӧн селькоръяс пыр ӧтарӧ велалӧны бурджыка газетӧ гижны, паськыдджыка кутасны уджавны. Сэсся сэки селькоръяслы кокниджык лоӧ быд уджӧ велӧдчыны, паськӧдны ассьыныс вежӧртассӧ. Сэки унджык крестьяна, селькоръяс удж вылӧ видзӧдӧмӧн, асьныс босьтчасны селькоравны — сідзкӧ содасныджык сэки селькоръяс.

Колӧ селькоръяслы ӧтувтчыны селькоръяс кружокӧ либӧ «Газетлы отсасян» кружокӧ. Селькоръяс кружок позьӧ лӧсьӧдны сэтшӧм вӧлӧсьтъясын, кӧні эм кык-куим либӧ унджык селькор да кӧні найӧ уджалӧны йӧзсяньыс явӧ. «Газетлы отсасян» кружок позьӧ восьтавны сэтшӧм вӧлӧсьтын, кӧні селькорыс этша, либӧ уна, да найӧ уджалӧны йӧзсяньыс гусьӧн. «Газетлы отсасян» кружокӧ селькоръяс кындзи пырӧны тшӧтш крестьяна, кӧть найӧ и абу селькоръяс.

Газетлы отсасян кружокӧ дай селькоръяс кружокӧ пырӧны став вӧлӧсьтса (сиктса) селькоръясыс, ӧткодь, кӧть найӧ и гижӧны оз ӧти газетӧ, а уна газетӧ. Кружокъясын уджсӧ чуйдӧдӧ стеннӧй газетлӧн редколлегияыс. Сідзкӧ селькоръясӧс ӧтувтан уджӧ медвойдӧр колӧ босьтчыны аслыныс стеннӧй газет редколлегиялы.

Гожӧмнас, юнь тӧлысьын, «Югыд туй» редакция чайтӧ чукӧртлыны ассьыныс да «Коми сикт» газетса селькоръясӧс съезд вылӧ. Таӧдз селькоръяслы колӧ нин ӧтувтчыны да босьтчыны кружокъясас уджавны. Сэки съезд вылын кокниджык лоӧ важ удж сертиыс индыны водзӧ кежлӧ уджавны.

Ӧні висьталыштам, мый йылысь колӧ гижны селькоръяслы «Коми сикт» газетӧ. Миян селькоръяс унатор йылысь на оз гижны газетӧ. Кодкӧ ичӧтика юыштӧма, кодкӧ кӧ мыйкӧ шуыштӧма, кось кӧ вӧлӧма, кутшӧмкӧ зэв-зэв ичӧтиктор лоӧма, селькоръяс бокті сійӧ оз нин мун, пырысьтӧм-пыр селькоръяс найӧс газетӧ гижасны. Дерт, ми огӧ шуӧ, мися, татшӧмторъяс йывсьыс газетын оз ков гижны. Гижны колӧ, абу кӧ нин гижӧмторйыс кутшӧмкӧ зэв ичӧтик лоӧм, нинӧм абуыс.

Зэв ёна колӧ селькоръяслы гижны, кыдзи уджалӧны найӧ сиктын волисполкомъясыс, партия да комсомол ячейкаяс, кооперативъясыс, лыддьысян керкаясыс, школаясыс, сідз водзӧ. Мый найӧ уджын омӧльыс, бурыс, мый колӧ водзӧ кежлӧ уджавны. Ёна колӧ гижны крестьяна олӧм йылысь: кыдзи олӧны, мый уджалӧны, мый налы оз тырмы, мый найӧ думайтӧны, кыдзи семья пытшкас олӧмыс мунӧ, мыйӧн тӧдчӧ на пиын выль олӧмыс (бытыс). Ӧні матысмӧны праздникъяс — Май 1-ӧд лун, вит во Коми автономия восьтӧмсянь. Кыдзи тайӧ праздниксӧ коллясны сиктъясын, быд селькорлы колӧ гижны. Матысмӧ гӧран-кӧдзан кад. Кыдзи лӧсьӧдчисны крестьяна тайӧ уджас, кыдзи мунӧ гӧрӧм-кӧдзӧмыс, бара жӧ мед эськӧ веськалі газетӧ.

Селькоръяслы колӧ тшӧтш тшӧкыдджыка гижлыны асланыс удж йылысь, кружокъясас ужалӧм йылысь, ӧтувтчӧм йывсьыныс: мый вӧсна абу ӧтувтчӧма, кыдзи ӧтувтчӧма. Тайӧ ёна колантор селькоръяс съезд кежлӧ.

Жугыль.