СТАВСОЮЗСА 7-ӧд СЪЕЗД КОМСОМОЛЛӦН

Март тӧлысь помын муніс ставсоюзса комсомоллӧн сизимӧд съезд. Тайӧ съезд вылас видлалісны важ уджсӧ, индалісны, мый вӧлі омӧльыс нуӧдӧм уджас, бурыс да кыдзиджык колӧ нуӧдны комсомоллы уджсӧ водзӧ вылӧ.

14-ӧд коммунист партия съезд вылын моз жӧ тайӧ комсомол съезд вылас ӧткымынӧн кӧсйӧны жӧ вӧлі кежӧдны Ставсоюзса Комсомолсӧ веськыд туй вылысь, сувтӧдӧны вӧлі комсомолӧс паныд коммунист партиялы. Съездыс эз мун найӧ велӧдӧм серти, шуис паныд мунысь ёртъяслы дугдыны сійӧ уджсьыс да заводитны уджавны ставыскӧд ӧтвылысь, мунны Ленин ёртӧн индӧм туй кузя.

Съездыс индаліс, кыдзи уджавны, лӧсьӧдны уджсӧ ӧнія олӧмын. Комсомолын ӧнӧдз вывті ёна велӧдісны политика уджӧ. Мукӧд пӧлӧс удж, мукӧдторйӧ велӧдӧм комсомолын вӧлі мунӧ зэв омӧля. Сы вӧсна комсомолыс оз вермы вӧлі сетны аслас шленъяслы став сылы коланторъяссӧ, сы вӧсна шленъясыс весиг вӧлі петалӧны комсомолсьыс. Съезд шуис: политика уджкӧд пӧ ӧтпырйӧ комсомолын колӧ велӧдны тшӧтш югдӧдчан да овмӧс нуӧдан уджӧ, сетны политика кындзи мукӧд пӧлӧс тӧдӧм. Колӧ пӧ сетны тшӧтш сэсся комсомол шленъяслы бура, пӧльзаӧн гажӧдчӧм.

Комсомолын миян став шленыс рабочӧйяс да крестьяна. Кыдзи верман колӧ ёнджыка найӧс ӧтувтны, йитны. Рабочӧйяс пыр мунӧны водзынджык, найӧ вежӧраӧсьджык, ӧтувджык олӧны дай велӧдчӧмаӧсьджык. Сы вӧсна колӧ, мед комсомолнас веськӧдлас рабочӧй том йӧз коммунист партия индалӧм серти.

Водзӧ кежлӧ важ моз жӧ колӧ зільны босьтны комсомолӧ батракъясӧс да вежӧраджык, прамӧйджык том йӧзсӧ шӧркоддьӧма олысь крестьяна пиысь. Мед бура позис веськӧдлыны комсомолнас, веськыд туйӧд нуӧдны, колӧ кыскыны комсомолас став рабочӧй том йӧзсӧ. Став рабочӧй том йӧзыс кӧ лоӧны комсомолын, сэки бура вермасны найӧ нуны Ленин ёрт индалӧм туйӧд комсомолсӧ. Тадзи та йылысь шуис съезд.

Сэсся съезд шуис: колӧ пӧ лӧсьӧдны комсомолын бура тӧдысь комсомолын уджалысь йӧзӧс (активистъясӧс). Ӧні пӧ сэтшӧм йӧзыс зэв этшаӧн. Колӧ ёна тӧдмавны Ленинлысь да Маркслысь велӧдӧмъяссӧ. Сӧмын ёна налы велӧдӧмсӧ тӧдмалӧмӧн позьӧ нуӧдны веськыд туйӧд комсомолсӧ.

Съезд индаліс туйяс нуӧдны комсомоллы уджсӧ сиктъясын. Сиктса том йӧз зэв зільӧны ӧні велӧдчыны, югдӧдчыны. Налы колӧ быд ногыс отсавны велӧдчынысӧ.

Сы вӧсна медбур лӧсьӧдавны сиктъясын крестьяна том йӧз школаяс да тӧдмӧдны сэні сиктса том йӧзӧс налы коланторъяснас. Сиктса комсомоллы ёна колӧ лӧсьӧдчыны тайӧ уджӧ. Колӧ быд комсомол шленлы сиктъясын сетавны кутшӧмкӧ вермана уджъяс, сӧмын сійӧ уджыс мед вӧлі шленыслы сьӧлӧм вылас воӧ дай пӧльза кутшӧмӧскӧ вайӧ. Комсомоллы ёнджыка колӧ уджсӧ нуӧдны Сӧветъясын, мӧда-мӧдлы отсасян комитетъясын, лыддьысян керкаясын, кооперативъясын да мукӧдлаын.

Со кутшӧм медгырысь шуӧмъясыс ставсоюзса сизимӧд комсомол съездлӧн.

Н. Уль.