ГӦЛЬ КРЕСТЬЯНА КОСТ УДЖАЛӦМ

Рабочӧйяс да крестьяна ӧтувтчӧмӧн вӧчисны революция. Ӧтувтчӧмӧн жӧ сӧмын ӧні вермасны найӧ кыпӧдны овмӧс, лӧсьӧдны выль оласног. Коммунист партия та йылысь некор оз вунӧд: 14-ӧд съезд вылын сійӧ шуис: кыпӧдны промышленносьт, ёнмӧдны крестьяналысь кӧзяйство, кооператив пыр дорны йитӧд крестьяна да рабочӧй кост.

Овмӧс кыпӧдігӧн ӧні сиктъясын йӧзыс торъяліны куим пельӧ: гӧль крестьяна, шӧркоддьӧма олысь да озыръяс. Ӧні коммунист партия кӧсйӧ, мед став крестьяна — гӧль и шӧркоддьӧма — кыпӧдісны, ёнмӧдісны ассьыныс кӧзяйство, гӧль крестьяна кӧ кольччӧны бӧрӧ, ковмас налы отсавны.

Кыдзи позяс отсавны гӧль крестьяналы вӧтчыны шӧркоддьӧма олысь бӧрысь?

Ленинград губерняувса сиктъясын уджалысьяс сӧвещанньӧ вылын коммунист партия Центральнӧй Комитетса шлен Квиринг ёрт висьталіс:

Гӧль крестьяналы отсавны позяс куим ногӧн:

Первой-кӧ, колӧ лӧсьӧдны быд сиктын гӧль крестьяна костын собранньӧяс. Собранньӧясӧдз ковмас висьтавлыны крестьяналы, мед шӧркоддьӧма олысь крестьяна тшӧтш волісны собранньӧяс вылӧ, мед найӧ вӧлі тӧдӧны, мый гӧль йӧз ӧтлаасьӧмысь налы некутшӧм лёк оз ло. Сӧмын, дерт, гӧль крестьяна кост собранньӧяс вылад став йӧзсӧ оз позь ӧткодявны, сэтӧні став шуӧмъяссӧ лӧсьӧдӧны гӧль крестьяна. Сэсся кулакъяс йылысь. Кулакъясысь колӧ гӧль крестьяналы ёна видзчысьны, собранньӧяс вылӧ бурджык не лэдзны найӧс.

Мед собранньӧясыс бурджыка мунасны, колӧ водзвыв сэк кежлӧ лӧсьӧдчыны.

Мӧд-кӧ, колӧ сиктса гӧль йӧзлы партияса да государствоса отсӧгӧн ӧтувтчыны ас костаныс. Ӧтувтчыны ӧтувъя кӧзяйствоясӧ, артельясӧ, тӧвариществоясӧ, кооперативъясӧ, сӧветъясӧ. Тадзи гӧль крестьяна регыдджык вермасны мӧда-мӧдныслы отсасьӧмӧн кыпӧдны ассьыныс овмӧссӧ.

Коймӧд-кӧ, сӧмын сэк ми отсалам гӧль крестьяналы, кор сьӧмӧн отсыштам ёнмӧдны крестьянскӧй кӧзяйство. Сы вӧсна колӧ видлавны бюджетъяс да сэсь сетыштны кутшӧмкӧ отсӧг гӧль крестьяналы.

Сӧмын отсалӧмӧн гӧль крестьяна аддзасны Сӧвет власьтлысь найӧ вӧсна тӧждысьӧмсӧ.