ЦИК-лӧн МӦД СЕССИЯ

Выль закон сельхозналог йылысь.

Брюханов ёртлӧн доклад.

Апрель 20-ӧд лунӧ Центральнӧй Исполнительнӧй Комитетлӧн мӧд сессия вылын Брюханов ёрт вӧчис доклад 1926−27 вося сельхозналог йылысь.

Союзса Совнарком, — шуӧ Брюханов ёрт, — шуис налог босьтны доход серти, сэсся шуис бырӧдны уна пӧлӧс табличаяс налог арталігӧн, сетны кокньӧд вермытӧмъяслы, гӧль крестьянаӧс дзикӧдз мездыны налогысь да унджык налог босьтны озырджыкъяссянь.

Выль закон сетӧ ыджыд кокньӧд гӧль да шӧркоддьӧма крестьяналы. Налог босьтсьӧ доход серти: мыйта доход босьтӧ кӧзяйство, сы серти и налог лоӧ.

Выль закон серти, гӧль крестьяна, кодъяслӧн вося доходыс оз ло 25 шайтысь унджык морт вылӧ, дзикӧдз мынӧны налогысь. Сідзинас Союз республикаяс пасьта став крестьяна пиысь мынӧны налогысь 20 прӧчентыс (быд сё морт вылӧ кызь морт).

Ичӧт дохода крестьяна мынтӧны сӧмын 2 прӧчент став доходсьыс (2 урӧн быд шайтысь). Судзсьытӧмджыка олысьяс — шӧркоддьӧма крестьяна (сэтшӧмыс Союз республикаяс пасьта 45 прӧчент став крестьяна пиысь) — кутасны мынтыны 6−7 шайт гӧгӧр. Бура олысьяс — шӧркоддьӧма крестьяна (найӧ 20 прӧчент став крестьяна пиысь) — кутасны мынтыны шайт 20 кымын. Озыръяс — кокньыда олысьяс — мынтасны 50 шайт гӧгӧр.

Тавося налог вӧлі 235 миллион шайт, выль 1926−27 вося налог арталӧма 300 миллион шайтӧдз. Сӧмын оз ков повны налог ыдждӧдӧмысь.

Выль налог серти, гӧль крестьяна унджыкыс мынӧны дзикӧдз налогысь, мукӧдыс мынтыны кутасны зэв этшаӧн, шӧркоддьӧма крестьяна вылӧ налог оз сод, сӧмын озырджык крестьяна кутасны мынтыны унджык.

Тавося 235 миллион шайт налогысь 100 миллион шайтыс кольӧма местнӧй бюджетӧ. Выль закон серти, местнӧй бюджетӧ кӧсъям кольны 230 миллион шайт.

Выль закон сельхозналог йылысь отсалас сиктъясын кыпӧдны овмӧс, лӧсьӧдны выль олӧм, отсалас гӧль крестьяналы бурмӧдны кӧзяйство.

Доклад кывзӧм бӧрын Союзнӧй сӧветын да национальнӧй сӧветын заводитчис вензьӧм.