ЛЕНИНЛӦН ЧУЖАН ЛУН

Мунамӧй ставным водзӧ Ленин индӧм туйӧд

Войдӧрлун тыри 56 во Ленин ёрт чужӧм лунсянь. Апрель 22-ӧд лунӧ 1870-ӧд воын Владимир Ильич чужлі Симбирск карын.

Став олӧмыс, став уджыс Ленинлӧн вӧлі уджалысь йӧз вӧсна, найӧс капиталистъясысь мездӧм кузя, найӧс социализмлань нуӧдӧм. Сар дырйи рабочӧй революция кыпӧдны зільӧмла Ленинлы лои пукавны тюрмаясын, ветлыны катаргаяс вылӧ, овны заграничаын.

Ленин дорис ён, крепыд партия — Коммунист партия. Ленин чуйдӧдӧмӧн Коммунист партия нуӧдіс Россияса рабочӧйясӧс да крестьянаӧс Октябрса революция вӧчны. Ленин чуйдӧдӧм серти Сӧвет Союзса уджалысь йӧз венісны ассьыныс дай став мувывса капиталистъясӧс гражданскӧй война дырйи, эз лэдзны найӧс бара ыджыдавны пуксьыны.

Ленин вежӧрӧн лӧсьӧдӧма Сӧвет Союзын овмӧс кыпӧдан сямсӧ сідзи, медым ми пыр мунам вӧлі социализмлань. Ленин шуӧм серти продразвёрстка вежӧма лои продналогӧн, лӧсьӧдӧма вӧльнӧй вузасьӧм. Сійӧн Ленин ёрт сетіс крестьяналы бурджыка олӧм, отсаліс видз-му уджалӧм кыпӧдны-паськӧдны, сыкӧд тшӧтш промышленносьт сувтӧдны да ёнмӧдны.

Ленин велӧдіс миянӧс, кыдзи колӧ ӧтувтны рабочӧйӧс крестьянинкӧд. Сійӧ тшӧктіс миянлы чорыда йитны кык сикаса тільсьысь-пессьысь мортӧс — гӧр бердысь да станок дінысь. Крестьяна да рабочӧйяс кост чорыда ӧтувтчӧм сайын ёнлуныс Сӧвет Союзлӧн. Топыда йитчӧмӧн ми сӧмын вермам кыпӧдны ассьыным овмӧснымӧс: видз-му уджалӧм да промышленносьт.

Кооперация пыр сӧмын ми вермам крестьянаӧс, налысь овмӧссӧ кыскыны социализмӧ. Тайӧ индӧмыс бара жӧ Ленинлӧн.

Ленин велӧдіс, петкӧдліс, кыдзи кыпӧдны ставмувывса уджалысь йӧз революция.

Помтӧм-дортӧм Ленинлӧн велӧдӧмыс рабочӧй революция кыпӧдӧм йылысь, социализм дорӧм йылысь. Помтӧм-дортӧм Ленинлӧн рабочӧй да крестьяна вӧсна тӧждысьӧмыс.

Кык во саяс нин Ленин ёрт кулӧмсянь. Вӧчӧ-ӧ сылысь тшӧктӧмъяссӧ сылӧн партияыс — Коммунист партия? Дерт, вӧчӧ. Мунӧ-ӧ дзик Ленинлӧн индӧм туйӧд, бокӧ весиг ӧти воськов тувччытӧг Коммунист партия? Дерт, мунӧ.

Коммунист партия Ленин дырйи моз жӧ мунӧ социализмлань, дорӧ социализма овмӧс. Коммунист партия отсалӧ став мувывса уджалысь йӧзлы татшӧм жӧ олӧм лӧсьӧдны.

Коми крестьяна! Матыстчӧй сӧветъяс бердӧ, Коммунист партия бердӧ. Кыпӧдӧй ассьыныд овмӧстӧ, ёнмӧдӧй кооперация. Чорыда йитчӧй рабочӧйяскӧд. Отсалӧй бырӧдны ковтӧм рӧскодъяс, медым унджык сьӧм вӧлі кыпӧдны ассьыным промышленносьтнымӧс, тшӧтш видз-му уджалӧмнымӧс. Тӧдмасьӧй бура Ленин ёрт велӧдӧмӧн.

Сійӧн ми ставным ӧтвылысь, Коммунист партия чуйдӧдӧмӧн, нуам олӧмӧ Ленинлысь тшӧктӧмъяссӧ, бурсиӧмъяссӧ. Лӧсьӧдам аслыным капиталистъястӧм бур олӧм.

Эн пӧ.