КОМИ ГИЖЫСЬ ЧУКӦРЫН

КАПП правленньӧсянь коми гижысьяслы чукӧстчӧм вылӧ шыасисны коми гижысьяс Эжва вожсянь, Сыктыв вожсянь, Мӧскуасянь, шыасисны гырысьяс и поснияс. Быдӧн шуӧны КАПП лӧсьӧдӧм зэв коланторйӧн, быдӧн кӧсйӧны отсасьны, уджавны коми литература лӧсьӧдӧм вылын.

Гижам татчӧ сӧмын ӧти том коми гижыссянь шыасьӧм:

«Коми гижысьяслӧн ӧтувтчӧм — зэв бур удж. Уна коми гижысьяс миян эм, гижӧны сьылан-лыддянъяс, пьесаяс и мукӧдтор. Эмӧсь и унаӧн том йӧз, пессьӧны велӧдчыны, воштысьны коми гижысьясӧ жӧ, сӧмын том йӧзлы велӧдчыны коми гижысьӧ воны зэв сьӧкыд, отсӧг некодсянь абу, да ещӧ туйдӧдысьяссӧ он вермы корсьны. Ӧти котырӧ кӧ ӧтувтчасны коми гижысьяс коми парма пасьтаысь, сэки велаласны гижны, сэки чужасны выль гижысьяс. Сыктывдінкарса коми гижысьяс панӧмаӧсь ыджыд бур удж, сӧмын сиктса коми гижысьяслӧн колӧ регыдджык тайӧ панӧм уджсӧ босьтчыны кыны... КАПП правленньӧлы эськӧ регыдджык колӧ лӧсьӧдны уставсӧ да плансӧ, да лэдзны колӧ газетӧ, медым быд лыддьысь крукасяс сэтчӧ и думыштас, кутшӧм бур вермас сетны коми пармаса войтырлы коми гижысьяслӧн ӧтувтчӧмыс. Сэсся Обисполкомлӧн тайӧ ӧтувтчӧмыслы колӧ отсыштны, медым уджыс босьтчас, оз кус.

Сыктывдінкарса коми гижысьяс сьӧлӧмсяньныс уськӧдчӧмаӧсь деревнялань асланыс сьӧлӧмнаныс, сӧмын тайӧ бикиньсӧ коми пармаса гижысьяслӧн колӧ ыдждӧдны, паськыдджыка ӧзтыны парма пасьта!»

Шыасис тшӧтш ВАПП-лӧн (Всесоюзная Ассоциация пролетарских писателей, Москва) правленньӧ: «ВАПП-лӧн правленньӧ ёна ошкӧ КАПП лӧсьӧдӧм. Ми чайтам, КАПП вермас ӧтувтны став коми гижысьясӧс, вермас йӧткыны водзӧ коми литература лӧсьӧдан удж. ВАПП пондас тіянлы отсасьны, тіянӧс туйдӧдны уджавныд. Бура уджалӧй!»

(Кырымалӧмаӧсь В. Сольскӧй ёрт да Либединскӧй ёрт.)

А. Чард.