БЕСПАРТИЙНӦЙ КРЕСТЬЯНА КОНФЕРЕНЦИЯ ВЫЛЬГОРТ ВӦЛӦСЬТЫН (СЫСОЛ. УЕЗД)

Конференция вӧлі чукӧртӧма апрель 11-ӧд лунын; волісны 54 делегат, на пытшкысь 9 нывбаба.

Конференция вылын вӧчисны докладъяс колян Обласьтувса да уездувса съездъяс уджъяс йылысь, волисполкомса да мӧда-мӧдлы отсасян комитет уджалӧм йылысь, тӧдмӧдісны с.-кӧзяйственнӧй-промыслӧвӧй-кредитнӧй союзӧн, сідз водзӧ.

Конференция вылын кыпӧдлісны сёрни Давпонӧ да Убшор пӧчинокӧ школаяс восьтӧм йылысь.

Медся ёна крестьяна вензисны страхуйтчӧм йылысь, шленскӧй взнос мӧда-мӧдлы отсасян комитетӧ мынтӧм йылысь да том йӧзӧн кулиганитӧм йылысь. Верманаджыка олысь делегатъяс зырисны чинтыны страхӧвӧй сборсӧ, чинтыны шленскӧй взноссӧ мӧда-мӧдлы отсасян комитетас.

Волисполкомлӧн доклад сертиыс, водзӧ вылӧ лӧсьӧдӧма со кутшӧм уджъяс: бурджыка да ёнджыка сувтӧдны удж исполкомбердса секцияясын, перйыны недоимкаяс, перйыны став сельхозналог, страхӧвӧй сбор, лӧсьӧдны опытнӧй му участокъяс агрономъяс индӧмӧн-велӧдӧмӧн, ышӧдны йӧзӧс весавны кӧйдысъяс машинаӧн.

Став йывсьыс сёрнитӧм, вензьӧм да тӧлкуйтӧм бӧрын конференция шуис: обласьтувса да уездувса съездъяслысь уджъяссӧ ошкыны. Корны: а) уездувса дзоньвидзалун кутан юкӧдлысь, мед регыдджык восьтас вӧлӧсьтӧ пельшӧрскӧй пункт, б) мездыны прӧчент мынтӧмысь либӧ чинтыны прӧчентсӧ нюр косьтӧм вылӧ, вӧлӧсьтӧн удждӧм сьӧмысь, в) мед регыдджык восьтасны фосфорит вӧчан завод. Туй вӧчӧм йылысь шуисны: быд грунтӧвӧй, шоссейнӧй туйяс вӧчӧм конференция лыддьӧ зэв коланторйӧн, сідзи жӧ зэв колантор регыдджыка кӧрт туй нуӧдны. Посни туйяс деревня костъясті да мукӧдлаті конференция шуис выльмӧдавны, лӧсьӧдавны аслыныс крестьяналы вӧлӧсьтса граждана кост лӧсьӧдчӧмӧн.

Коми с.-кӧзяйст.-промыслӧвӧй кредитнӧй союз йылысь доклад кузя конференция шуис: а) волисполкомлы колӧ зільны паськӧдны (восьтыны) вӧлӧсьтын сельскокӧзяйственнӧй да кустарно-промыслӧвӧй кооперативъяс, б) корны Обласьтувса Исполкомлысь, мед с.-к. да кустар.-промысл. кооперативъяслы да гӧль крестьяналы удждӧм сьӧм вылас сійӧ чинтас прӧчентсӧ, сідзжӧ мед чинтасны дон нянь вылӧ, с.-кӧз. машина, струмент да мукӧдторъяс вылӧ, в) мед быд учрежденньӧ, организация кутасны зільны ас вылас лишнӧй рӧскод чинтыны да казеннӧй сьӧмъяс таргайтӧмӧн водзсасьны.

Том йӧз кулиганитӧм йылысь конференция шуис: кулиганитӧм пыр ӧтарӧ ӧддзӧ. Татчӧс олысьяслы дай бокӧвӧй ветлысь-мунысьлы повны лоӧ ветлӧмысь. Колӧ корны Обласьтувса Прокуратураӧс да Административнӧй юкӧдӧс, мед найӧ кыдзкӧ дугӧдасны том йӧзӧн кулиганитӧм, ковмас кӧ, мед весиг ысталасны Обласьтсьыс. Тшӧктыны вӧлӧсьтувса милиционерлы водзвыв гижавны да босьтны лыд вылӧ став кулиганитысьяссӧ.