КЫДЗИ АСЛЫД ЛӦСЬӦДНЫ ВИКА КӦЙДЫС

Вика кӧйдыс ӧні дона на, ньӧбны сьӧкыд крестьяналы, колӧ кӧдзны викасӧ аслыс нарошнӧ кӧйдыс вылӧ. Мед вика кӧйдысыд воас бурджык, оз ков вунӧдны со мыйяс:

1) кӧйдыс вылӧ викатӧ колӧ кӧдзны шӧркоддьӧм му вылӧ. Бур му вылӧ кӧдзӧмӧн кӧйдыс дорсьыс локтӧ унджык вика туруныс. А омӧль му вылӧ кӧдзӧмӧн туруныс дай кӧйдысыс омӧль лоӧ.

2) Кӧйдыс вылӧ вика колӧ кӧдзны тулысын водзджык. Медбур сійӧс кӧдзны йӧла турун (одуванчик) чветитігӧн.

3) Викатӧ кӧйдыс вылӧ колӧ кӧдзны кӧдзан машинаӧн. Киӧн кӧдзӧмӧн вика кӧйдыс воӧ омӧльджык.

4) Кӧйдыс вылӧ вика кӧдзигӧн мусӧ некор оз ков куйӧдавны картавывса куйӧдӧн. Сійӧ куйӧдӧн куйӧдалӧмӧн викаыс зэв дыр оз во.

5) Колӧ бурджыка уджавны мусӧ вика кӧйдыс улӧ. Медбур арнас ляпкыдика ӧтчыд гӧрны да мӧдысь гӧрны кӧдзигас тулыснас.

6) Ытшкыны колӧ заводитны вылыс вика пуртӧсъяс воӧм бӧрас.

Та серти кӧ вӧчан ставсӧ, десятина вылысь вермас воны пуд 50−60 вика кӧйдыс.

Алексеев.