ТЫДАВТӦМ КЫМӦР
Мывкыд сетан висьт
Шойччан лунӧ Лёняӧс пальӧдіс вильыш шонді кӧч. Зонка чужӧм тырнас нюмдіс. Детсадйӧ мунны оз ков, и позьӧ лунбыд гуляйтны!
Кыдз шуласны, шондіа лун пальӧдӧ ун. Керкаын ставӧн садьмисны, мыссисны да пуксисны сёйны. Бать, кыдзи пыр, ошкыштіс кӧзяйкаӧс:
— Рыська блинтӧ ме ёна радейта! Аттьӧ, сьӧлӧмшӧр!
Збыльвылӧ кӧ, мамук — ыджыд тӧждлуна морт и чӧскыда пусьӧ-пӧжасьӧ. Пызан сайын бать юаліс сылысь:
— Кытчӧ мунам гуляйтны?
Лёня тӧкӧтьӧ эз горӧд: «Паркӧ! Паркӧ! Паркӧ!», но буретш сэки уйкнитіс восьса ӧшиньӧд тӧдса кымӧр. Неважӧн ыджыд мам тӧдмӧдіс найӧс ӧта-мӧдныскӧд. Тыдавтӧм кымӧр пуксис зонкалы пельпом вылӧ да шӧпнитіс пеляс: «Энлы, Лёня, мед мамыд вочавидзас».
Мам мӧвпыштӧмӧн шуис:
— Паркын позьӧ шойччыштны.
Лёня кекӧначасис:
— О! Медбур мӧвп!
Бать нюмъёвтіс:
— Ме сӧглас! Ветлам паркӧ.
Друг кыліс ӧдзӧсӧ игӧдчӧм, и керкаӧ пырис ыджыд мам. Сійӧ вайис варенньӧ банка да пуксис чай юны. Верстьӧяс сёрнитісны ӧттор-мӧдтор йылысь, и зонкалы окота вӧлі больгыштны накӧд. А кымӧр лап-лапкерис сылӧн сойӧ, шӧпкӧ: «Сёрнитігӧн ыджыдджыкӧс эн пановт! Регыд веськӧдасны внимание тэ вылӧ!». Сідзи и лоис. Ыджыд мам чолӧмасис кымӧркӧд, нуксӧ сывъяліс, да варовитыштісны. Бать-мам накӧд тшӧтш водзӧ нуӧдісны сёрни. Ставлы вӧлі гажа. Сэсся гӧстя муніс, а семья ыштӧдчис ветлыны прогулка вылӧ.
Рӧкыд вылӧ батьлы триньӧбтісны, да дыркодь телепонӧн сёрнитіс. Тэрмӧдлан удж, буракӧ. Сэккості мам пырис ванна жырйӧ да вошис, кӧнкӧ, пелькӧдчӧ сэні. А писӧ телепитыс тойліс юавны, мый босьтны аскӧдыс паркӧ. Уськӧдчис бать-мам дорӧ, но кымӧр-ёрт дзик пыр ӧлӧдіс: «Лёня, эн дӧзмӧдчы, регыд найӧ гӧгрӧстасны тӧжд-мог». Зонка кымӧрлысь кывзысис, кӧть и дузгӧдчис гортсаяс вылӧ. Пондіс лясӧдны мыйкӧ пластилинысь. А кымӧр шӧпнитіс: «Аддзысьлытӧдз!» да тӧлӧдан пыр лэбзис ывлаӧ.
Мамыс петіс ванна жырйысь да дзигӧдіс писӧ:
— Виччысян миянӧс, зарни пи? А ме неуна пелькӧдчышті!
Батьыс курмыш-кармышкерис Лёняӧс да ас гӧгӧрыс бергӧдлыштіс:
— Ай да, молодеч! Мунамӧй гуляйтны!
Вӧлӧм, мойдса кодь кымӧр тыдовтчӧ сӧмын челядьлы да налӧн пӧч-пӧльлы. Бать-мамысь гусьӧн мывкыдсьӧдӧ кагаӧс, сетӧ сылы терпливлун. Верстьӧлы нимкодь, кор ныв-пи оз падмӧдны уджысь, а дӧзмытӧг виччысьӧны. Бурсьыд дур оз ло!
