Сьыв мен асъядорыс, шоныд тӧвру,

Ассьыд медся югыд сьыланкывтӧ —

Дзик быд мортлӧн сьӧлӧмыс мед вӧрзяс,

Муыс весьтті гӧлӧс шыыд кывтас.

Сьыв мен, тӧвру, лэбачлысь и пулысь,

Гыяслысь и зэрлысь сьыланкывсӧ,

Тувсов вӧтті келысь еджыд мулысь...

Сьыв вай, тӧвру, — талун тэнӧ кывза,

Сӧмын тэнӧ... Ӧні меным колӧ

Гӧлӧсыд и сьыланкывйыд тэнад.

Кыла тэнӧ — сьӧлӧмӧн и лолӧн,

Сӧмын менӧ ӧтнамӧс эн эновт.