ВОСЯ УДЖ «КОМИ СИКТЛӦН»

«Коми сикт» — крестьяналӧн газет.

Коми крестьянскӧй газетлы «Коми сиктлы» талун тыри во, апрель 17-ӧд лунӧ колян воын «Югыд туй» газетлӧн редакция лэдзис медводдза номерсӧ «Коми сиктлысь».

Во тыран лунас колӧ видзӧдлыны, мый вӧлі вӧчӧма во чӧжӧныс, мый йылысь вӧлі «Коми сиктын» гижлӧма. Гижӧдъясыс висьталасны, позьӧ оз шуны «Коми сиктсӧ» крестьяна газетӧн, колӧ оз коми крестьяналы «Коми сикт» судзӧдны да колӧ оз «Коми сикт» водзӧ кежлӧ лэдзны.

Во чӧжӧн 1925 вося апрель 17 лунсянь талунъя лунӧдз петіс 52 номер (37 номер 1925 воын да 15 номер 1926 воын). Газет петӧ ӧтчыд вежоннас — субӧтаясӧ.

Бура унатор йылысь нин «Коми сиктӧ» вӧлі гижӧма. Медунасӧ да ёнасӧ вӧлі гижӧма крестьяналысь овмӧс кыпӧдӧм да бурмӧдӧм йылысь.

Со мыйяс йылысь вӧлі гижӧма «Коми сиктас»:

Видз-му уджалӧм бурмӧдӧм йылысь .... 23 гижӧд.

Нянь вӧдитӧм йылысь .... 15 „

Пуктасъяс вӧдитӧм .... 11 „

Турун кӧдзӧм .... 4 „

Скӧт да пӧтка видзӧм .... 31 „

Сідзкӧ му-видз уджалӧм да скӧт видзӧм йылысь вӧлі гижӧма во чӧжӧныс 84 гижӧд.

Сэсся «Коми сикт» эз вунӧд тӧдмӧдны крестьянаӧс налогъяс йылысь да выль законъяс йылысь. Налогъяс йылысь гижӧма 25 гижӧд. Законъяс йылысь — 13 гижӧд. Крестьяналысь дзоньвидзалун видзӧм йылысь гижӧма 10 гижӧд. Оласног бурмӧдӧм йылысь гижӧма 5 гижӧд. Сьӧм чукӧртӧм да видзӧм йылысь — 8 гижӧд, нывбабаяслӧн праваяс йылысь — 11 гижӧд.

«Коми сикт» пыр крестьяна вермисны тӧдмавны сӧвет власьтлысь уджалӧмсӧ. Сы йылысь гижӧма 29 гижӧд, да кооперативъясын да мукӧд пӧлӧс ӧтувтчӧмъяс уджалӧм йылысь — 19 гижӧд, мӧда-мӧдлы отсасян комитетъяс йылысь — 5 гижӧд, войтырӧс велӧдӧм йылысь да пемыдлун бырӧдӧм йылысь — 13 гижӧд.

Коммунист партиялысь крестьяна вӧсна тӧждысьӧм йылысь вӧлі гижӧма 14 гижӧд.

Краснӧй армия йылысь 5 гижӧд. Селькоръяслы индалан гижӧдъяс вӧліны 6 номерын.

Быд номерын печатайтлӧма вӧлі коми сиктъясын олӧм йылысь крестьяналӧн письмӧяс. Во чӧжӧныс вӧлі печатайтӧма 601 письмӧ. Селькоръяс гижӧдъяс серти вӧлі заводитӧма 11 судебнӧй делӧ, 5 служащӧйясӧс должносьтысь вештӧмаӧсь, 7 письмӧ серти омӧльторъясыс учрежденньӧясын бырӧдӧма. Сэсся уна селькоръяслӧн письмӧяс мӧдӧдӧма вӧлі прокурорлы да учрежденньӧясӧ. На серти уна буртор вочӧма учрежденньӧясын.

«Коми сиктас» гижлӧма вӧлі крестьяналы коланторъяс йылысь, сідзкӧ «Коми сиктыс» — крестьяналӧн газет.

«Коми сиктлӧн» эм аслас селькоръяс, сӧмын этша на. Водзӧ кежлӧ колӧ, мед быд сиктын вӧлі «Коми сиктлӧн» селькор. Селькоръяс гижасны миян газетӧ да паськӧдасны газетсӧ коми крестьяна пиын.

Сӧмын «Коми сиктсӧ» омӧля на лыддьӧны коми крестьянаыс. Тиражыс «Коми сиктлӧн» ёна на ичӧт, сӧмын 1500 газет судзӧдысь, на пиысь сӧмын 460 крестьянин, мукӧдыс мунӧ учрежденньӧяс пыр.

Водзӧ кежлӧ тадзи ми овны ог вермӧ. Колӧ газетсӧ паськӧдны крестьяна пиын, мед быд сиктын, быд 10 керка вылӧ вӧлі ӧти газет мӧд во кежлӧ. «Югыд туйын» № 70 ми гижлім: «Югыд туйлы» 8-ӧд во тырӧм лун кежлӧ мед быд газет судзӧдысь сетіс мӧдӧс (выльӧс) газет судзӧдысьӧс. Сідз жӧ «Коми сикт» вылӧ ми корам быд газет судзӧдысьлы сетны выль газет судзӧдысьӧс «Югыд туй» 8-ӧд во тыран лун кежлӧ.

Коми крестьяна, лыддьӧй ассьыныд газеттӧ, судзӧдӧй «Коми сикттӧ». Сӧмын доныс газетлӧн 15 ур тӧлысьнас.