Турунъяс вӧрзьӧны пемыд му пыдӧсын, сэні,

Шонділӧн кытчӧ ни кодзувлӧн югӧр оз ин.

Вывланьӧ кыссьӧны, йисӧ да йирмӧгсӧ веніг, —

Тӧдтӧм на олӧмлысь вайӧны му вылӧ вын.

Пу увъяс ловзьӧны — кынмылӧм зарава сылӧ,

Тувсовъя меліник тӧв йылын кыдз пу оз тір.

Рытланьыс инмӧдчан сы дорӧ кинад кӧ, кылан:

Небыдик сӧнъясӧд пу сьӧлӧм йӧткалӧ вир.

Туӧны,

Нуӧны,

Мынӧны йи улысь юяс.

Сылӧма,

Ылалӧ,

Кылалӧ Эжваті йи.

...Сідзкӧ, и меным тшӧтш кад воис дасьтысьны туйӧ —

Кыла нин тулыслысь сьӧлӧмӧ зӧркӧдчан шы...