Рӧмдас да, керкаысь ывлаӧ пета —

Медводдза кодзувлысь ыпнитӧм виччыся.

Дзирдалысь-югъялысь, ылі да дона —

Сійӧ мен мыччысяс.

Инмӧдчас югӧрнас сьӧлӧмӧдз, лолӧдз —

Пемыдсӧ разӧдас, югзьӧдас олӧмӧс.

Аттьӧ тэд, аскиӧ чуксалысь шудӧй,

Вӧтъясӧ волӧмысь.

Нетшыштчас ыркыдӧн лолалысь вой тӧв,

Уськӧдас кодзулӧс ки пыдӧс вылӧ мен.

Нюмъёвтас кодзулӧй, пӧрас ва войтӧ

Надзӧник сылӧмӧн.