Вой кежлас ывлаын ёна на кынтавлӧ —

Вынъясыс тулыслӧн жебиник вывті на:

Видзчысигтырйи да кок чуньяс йылас на

Кык воськов матысмӧ — куимӧс ылысмӧ.

Бушковъяс увтчӧны, турӧбъяс эргӧны —

Му шарсӧ лымбергач дугдывтӧг бергӧдлӧ...

...Сӧмын тай сьӧлӧмӧй тӧдӧ и кылӧ на —

Шоныдлань думъясӧн олӧ нин ывлаыс.

Войвывса лэбачьяс — лунвылас сэтӧні —

Вӧтнаныс быд вой нин кузь туйӧ петӧны,

Войладор дзоргӧны, видлӧны борднысӧ

Гортсьыныс гажтӧмтчӧм юсьяс да гордаяс...

Ки пыдӧс вылӧ и меным тшӧтш войтыштас

Здук вылӧ нюжалысь луныслӧн мойдкывйыс.