Кымӧр-кунӧр енэж шӧрӧд кылалӧ.

Кодарланьӧ кывтӧ — матӧ, ылӧ-ӧ?

Кысянь воӧ, кодлысь тайӧс юавны:

Парма вӧрлысь али Эжва юыслысь?..

Рӧмпӧштанӧ быттьӧ, ваӧ видзӧдӧ —

Асьсӧ чайтӧ мирас медся мичаӧн.

Мичаӧн да медся выліӧн —

Воссьӧ сылы помтӧм-дортӧм ыліыс,

Кӧні вӧльнӧй тӧвру ыргӧ-ветлӧдлӧ,

Кӧні медся шуда олӧм свет вылас...

Муртса кежлӧ пемдылас да лӧзӧдлас —

Шоныд зэрӧн видзьяс-муяс кӧтӧдас.

Сэсся бара югзяс, кывтны веськӧдчас —

Му выв шогъяс-могъяс сылы веськодьӧсь...