ЛӦСЬӦДЧӦЙ МАЙ 1-ӧд ЛУН КЕЖЛӦ

Кык вежон мысти лоӧ ыджыд праздник ставмувывса уджалысь йӧзлӧн — Май Первойӧд лун. Став мувывса тільсьысь-пессьысь йӧз кутасны праздничайтны тайӧ лунсӧ. Найӧ петкӧдласны ассьыныс вынсӧ. Найӧ видзӧдласны, мый вермисны вӧчны асьнысӧ асьныс дорйӧм кузя, мездысьӧм кузя. Быд коми уджалысь мортлы колӧ тӧдны Май Первойӧд лун, колӧ праздничайтны сійӧс.

Май 1-ӧд лунсӧ праздничайтны шулісны 1889 воын 2-ӧд Интернационаллӧн медводдза конгресс вылын. 1889 восянь воысь воӧ пӧшти быд капиталист государствоын тайӧ луннас рабочӧйяс петӧны ывла вылӧ, мунӧны митингъяс вылӧ, тшӧктӧны капиталистъяслы кокньӧдны ассьыныс олӧмсӧ, уджсӧ. Воысь воӧ уджалысь йӧз топыдджыка ӧтувтчӧны, воысь воӧ выныс рабочӧйяслӧн содӧ.

Таво, дерт, быд капиталист государствоын — Асыввылын дай Рытыввылын — рабочӧйяс бара колльӧдасны ассьыныс праздниксӧ — Май Первойӧд лун. Праздничайтасны кӧні явӧ, кӧні, гашкӧ и, гусьӧн. Дерт, таво мукӧд вояс моз жӧ капиталистъяс, налӧн слугаясныс кутасны сюся видзӧдавны — оз-ӧ уджалысь йӧз вывті збоймыны, оз-ӧ вывті ёна «пузьыны». Дерт, тайӧ лунӧ капиталистъяс сувтӧдасны кок йыланыс ассьыныс став пӧличасӧ, уджалысь йӧз гӧгӧр сувтӧдаласны пулемётъяс. Дерт, Май Первойӧд лунӧ вель уна медбур революционеръяслы лоӧ пуксьыны тюрмаӧ. Капиталистъяс дай налӧн пеж слугаясныс сетасны рабочӧйяслы нянь кусӧк пыдди пуля да шы.

Капиталистъяслӧн горшныс некор оз тырлы. Сы вылӧ найӧ и капиталистъяс. Налы этша на асланыс государствоса рабочӧйясыслысь да крестьяналысь вир юӧмыс. Найӧ босьтӧны ас кипод улас мукӧд йӧзӧс, нёнялӧмӧн нёнялӧны налысь вир-яйнысӧ. Китайын, Мароккоын, Сирияын мунӧны зэв гырысь тышъяс. Сэтчӧс йӧзыс мездысьӧны мукӧд государствоса капиталистъясысь.

Миян Сӧветскӧй Союзын рабочӧйяс крестьянакӧд ӧтув перйисны аслыныс капиталистъястӧг олӧм. Миян рабочӧйяс да крестьяна асьныс ас выланыс ыджыдӧсь, асьныс дорӧны олӧм, асьныс ас выланыс уджалӧны. Ми кӧкъямысӧд во медгажаа, меддолыда, медпаськыда кӧсъям празднуйтны Май Первойӧд лун. Ми огӧ полӧй мышканым пулемётъясысь, ми огӧ полӧй пӧличаӧн вӧтлӧдлӧмысь, огӧ полӧй тюрмаясӧ сюрӧмысь.

Миянлы, став союзса уджалысь йӧзлы, Май Первойӧд лунӧ колӧ думыштны став мувывса вокъяс вӧсна. Миян зэв ыджыд мог — отсавны мукӧд государствоса уджалысь йӧзлы, отсавны налы вермасьны капиталистъяскӧд, путкыльтны сьылі вывсьыныс вир юысьяссӧ.

Кыдзи отсавны? Колӧ тӧдмасьны уджалысь йӧз олӧмнас, вермасьӧмнас. Колӧ сетны миянлы сьӧлӧмсянь кыв капиталистъяс улын олысь ёртъяслы, колӧ МОПР пыр отсавны налы сьӧмӧн. Быд коми крестьянинлы колӧ пырны МОПР-ӧ. Тайӧ медбур, медыджыд отсӧгӧн лоӧ коми крестьянасянь став мувывса уджалысь йӧзлы, тюрмаясын пукалысь революционеръяслы.

Сӧвет Союзса уджалысь йӧз важ кисьтӧм олӧм вылас дорӧны выль олӧм, мунӧны социализмлань. Быд коми крестьянинлы собранньӧяс вылын, митингъяс вылын колӧ тӧдмасьны, мый нин Сӧвет Союзын лои вӧчӧма, мый колӧ вӧчны, кыті миян олӧмын да уджын бур, кыті омӧль. Колӧ тӧдмасьны, кутшӧм туйяс уджавны индалӧ Коммунист партия, мунны сійӧ туйӧд. Коми крестьянинлы колӧ тӧдмасьны дай аслыс отсавны нуӧдны став уджалысь йӧзлысь ӧтувъя, ёна колан уджсӧ.

Таво Май Первойӧд лун — уджалысь йӧзлӧн праздник — да паска — енлы веруйтысь йӧзлӧн праздник — ӧтлаасьӧны. Колӧ думыштны пыдісянь-пыдісянь быд енлы веруйтысь уджалысь мортлы, код праздникыс бурджык, кодыс мый сетӧ уджалысь мортлы, кодыс кыскӧ югыдлань, кодыс пемыдлань, кодыс индӧ туйсӧ кокниджык олӧмлань, кодыс олӧмсӧ гугӧдӧ, бӧрӧ кыскӧ. Думыштӧм бӧрти мунны уджалысь йӧзлы бурсӧ сетан праздниклань да олӧмлань.

Коми крестьяна! Лӧсьӧдчӧй уджалысь йӧз ыджыд лун кежлӧ — Май Первойӧд лун кежлӧ, бура колльӧдӧй тайӧ лунсӧ.

Эн пӧ.