«КОМИ СИКТ»-лы ТЫРИ ВО

Кыпӧдӧй, бурмӧдӧй, разӧдӧй ассьыным газет.

Талун миян «Коми сикт» газетлы нимлун. Тыри быдса во воддза номер петӧмсяньыс. Лои лэдзӧма во гӧгӧрӧн доза уна номер. Быд субӧтаӧ вӧлі петӧ «Коми сикт». Водзӧ вылӧ сідзжӧ мӧдас петны ӧтикысь вежон чӧжын.

Тайӧ газет вӧлі вӧчӧма дзик крестьяналы. Роч кывсӧ унаӧн на пиысь оз велавны. Медся сьӧкыд роч кывйыд нывбабаяслы. Коми сиктъясӧ уна эськӧ локтӧ быдсяма газетъяс, да сӧмын омӧля сэтысь гӧгӧрвоан. Гижӧма ставсӧ рочӧн. Дерт, бура велӧдчыны, уджавны сы серти он вермы. Ыджыд отсӧг вермас сетны сӧмын коми кывйӧн гижӧма газет.

Ӧні ми вӧчам выль олӧм. Став власьтыс рабочӧй да крестьяна кипод улын. Ас сямӧн, вежӧрӧн колӧ бырӧдны пемыдлунъяссӧ. Некод бокисянь миянлы оз отсав. Сӧвет власьт да коммунистъяслӧн партия индӧ миянлы веськыд туй, тшӧктӧ велӧдчыны, кутчысьны долыдлун корсьны.

«Коми сикт» сетӧ крестьяналы отсӧг выль олӧм лӧсьӧдігӧн. Сэтӧн гижӧма быдпӧлӧсторъяс: кыдзи олӧны став рочмувывса уджалысь йӧзъяс да мукӧд муяс вылын; кутшӧм кокньӧд сетӧ Сӧвет власьт, мый колӧ тӧдны крестьяналы удж нуӧдігӧн да сідз водзӧ. «Коми сикт» сетӧ уна индӧдъяс овмӧс кыпӧдӧм да видз-му уджалӧм йылысь. Тӧдысь, велӧдчӧма йӧз сэні гижӧны гӧрӧм, кӧдзӧм, кӧйдыс да мукӧдторъяс йылысь.

Колян во медводдза номерас вӧлі гижӧма, мый тайӧ газет «Коми сикт» колӧ судзӧдны быд дас керка вылӧ. Видзӧдлам кӧ, зэв на ковмас дыр мырсьыны та мында шедӧдӧм йывсьыд. Кыдзкӧ зэв омӧля на коми мортыд кутчысьӧ газетад. Доныс эськӧ газетыдлӧн ӧні дзоля, сӧмын дас вит ур тӧлысьӧн. Сэсся крестьяна омӧля жӧ гижӧны асланыс сиктса олӧм йывсьыс, мый буртор эм, мый омӧльыс, кутшӧма видз-му уджалӧм мунӧ, кыдзи крестьяна олӧны, кутшӧма сиктбердса сӧветъяс, кооперативъяс, мӧда-мӧдлы отсасян комитетъяс уджалӧны.

Тайӧ эськӧ быдӧн колӧ гижны. Сӧмын сэки газетыд лоӧ крестьяналы мусаджык, сӧмын сэки Сӧвет власьт пондас тӧдны — мыйӧн нуждайтчӧ деревня, кыдзи колӧ отсавны сиктлы.

Лыддьысян керкаяс, школаын велӧдысьяс, коммунистъяс, комсомолечьяс, кооперативъяс, газетӧ гижысьяс ӧніӧдз на эз кутчысьлыны мичаӧ разӧдны «Коми сикт». Сы вӧсна крестьяна пӧвстӧ мунӧ сӧмын нёльсё квайтымын газет. Тадзитӧ, дерт, коми пемыд йӧзыдлысь синъястӧ некор огӧ восьтылӧ.

Водзӧ вылӧ колӧ ёнджыка разӧдны, кыпӧдны да ёнмӧдны ассьыным коми газет. Кодлы муса коми кыв, коді тӧждысьӧ, висьӧ сьӧлӧмнас, радейтӧ коми йӧзӧс, мед найӧ пырысь-пыр шыасясны миян чукӧстчӧм вылӧ.