СЮРУК ӦКСЯЛӦН ЫЖПИ

Сӧвет кадӧ Гамын (Изьва район) чукӧртчывлісны ёрта ёрд вылӧ, рочӧн кӧ, товарищескӧй судӧ. Сэні видлалісны юысь-косясьысьясӧс да, позис сёрнитны быд локтысьлы.

Менам вежӧрӧ колис ӧти татшӧм ёрд, кӧні видлалісны баля гусялӧм. Ӧтка сьӧп* аньлысь, Сюрук Ӧксялысь, картасьыс кодкӧ войнас петкӧдӧма ыжпи-балясӧ. Сиктса клубӧ чукӧртісны став сиктса войтырсӧ. Ёрдӧн веськӧдліс Педё Сань, сиктса школаын труд урок нуӧдысь.

Медводз кывзісны Сюрук Ӧксяӧс, сэсся — колхозса скӧт картаӧн веськӧдлысь Шы Пашӧс (шыыс изьватас ног — скӧт карта).

Шы Паш асьсӧ мыжаӧн эз лыддьы да сьӧлӧмсяньыс дорйысис. Менам пӧ лолӧй сӧстӧм, эг пӧ весиг мӧвпыштлы сьӧп аньлысь гусявны ыжписӧ...

Йӧз водзӧ корисны петкӧдчыны Пушкан Мишӧс, коді неважӧн на начкӧма баляӧс. Гашкӧ пӧ, Ӧксялысь гусялӧма да начкӧма. Пушкан Миш вайӧма аскӧдыс начкӧм балялысь юрсӧ да петкӧдліс сцена вывсянь.

Сюрук Ӧдя уськӧдчис баля юр дорас, кутіс сійӧс шыльӧдны да окавны:

— Мишукӧй, мадаэ, сюрин жӧ меным! — шуаліс ань.

Пушкан Миш сылы воча:

— Талӧн нимыс вӧлі Васюк, а эз Мишук! Тайӧ ыжписӧ ме ачым быдті, суседъяс аддзылісны, вермасны висьтавны.

Сэсся корлісны сцена вылӧ Косъёльысь кык вокӧс: Крысан Васьӧс да Крысан Якӧс. Найӧ пӧ вермисны пемыд войӧ йӧз картаысь петкӧдны балясӧ, медым вина вылӧ вузавны яйсӧ.

Крысан Як ачыс уджаліс Изьваын милиция веськӧдланінын. Роч начальникыскӧд, буракӧ, мортыд дзикӧдз рочмӧма. Сувтіс сійӧ колхозын уджалысьяс водзӧ да весьӧпӧртана шуис:

— В. И. Ленин говорил по-русски, и я тоже буду говорить по-русски.

Ставӧн пукалісны шай-паймунӧмӧн, а Крысан Як водзӧ рочасис:

— Уважаемая Ксения Ивановна! Вашего ягнёнка украли из хлева, и вы подозреваете даже меня, уполномоченного Ижемского РОМ Коми АССР!

Сюрук Ӧкся эз кут водзӧ кывзыны Крысан Якӧс да горӧдіс пукаланінсяньыс:

— Ин рочкылась! Ме тэнчыд рочкыласьӧмтӧ ог гӧгӧрво! Менӧ, биысь петӧм мортӧс, кеня кокӧс, колисны балятӧг тӧв кежлӧ. Ёрд вылын баля гусялысьӧс он вермӧй аддзыны, весиг милиция!

Кыдз помнита, мыжаыд сэки эз и сюр...

* дӧва