КРУКАСИН

— Вовук, на менсьым кӧшельӧс босьт да котӧртлы нянь пӧжаланінӧ, ньӧб мыйкӧ чӧскыдтор чай юны. Сӧмын ӧдйӧ, ӧти кокыд тані, мӧдыс — сэні, — тшӧктіс мамыс вит арӧса пиыслы. — Менам чайник вот-вот пузяс.

Вовалы мый? Пӧжастӧ сійӧ ёна радейтӧ! Шур-шар пасьтасис да сяркнитіс пӧжасян заводлань. Но неуна эзджык во, тэрмасигад сконъясис да усис. Дерт, эськӧ эз дыр чужъясь, пыр и кок вылӧ сувтіс. Эз быттьӧ и доймы. Но грекыд вылӧ тайӧ усьӧм понда вунӧдіс чӧскыдторйыслысь нимсӧ, кодӧс кӧсйис ньӧбны. Вунӧма, дай ставыс! Быттьӧ чышкыштӧма юрсьыс, оз помнит. Бергӧдчывны да мамыслысь юавны, али кыдзи? Сэтшӧм забеднӧ лоис, весиг бӧрддзис.

— Крукасин? — бӧрдысь детинка дорӧ сувтіс да жаляддза юаліс олӧма ань.

— Да, крукасин ӧд и эм! — радпырысь горӧдсис детинкалӧн, и сійӧ тӧвзис водзӧ.

Со и нянь пӧжаланіныд. Мичаа банйӧм чужӧма Вова пырис буфетӧ.

— Мый нӧ колӧ ичӧтик детинкаыслы? — нюммуніс сылы вузасьысь ань.

— Меным колӧ крукасин!

— Крукасин? А абу круассан?

— Кыдзкӧ тай сідзи-а.

Вузасьысь пуктіс полиэтилен пакетӧ чӧскыд пӧжассӧ да босьтіс детинкалысь колана мында сьӧм:

— Лӧсьыда чаюйтны тэныд, муса пи.