ГӦРД ПӦК
Праздник рытъясӧ Анна Васильевналӧн уджаланінас, кӧні сӧмын нывбабаяс муркӧдчӧны, ни ӧти мужичӧй абу, пыр нуӧдлӧны сідз шусяна корпоратив. А кыдзи нӧ? Век он лойсьы-мырсьы, коркӧ ӧд гажӧдчынысӧ колӧ жӧ! Томмӧдчыштӧм могысь вӧччыштасны аньясыд, юрсисӧ мичаа гартласны, мавтышталасны чужӧмнысӧ кыті колӧ, пуксяласны кузь пызан сайӧ да бура и рытйысясны. Неуна ырснитыштасны курыдтортӧ, оз, дерт, коддзымӧн, а сідзи, гаж вылас, и сьыланкывъястӧ ливкйӧдласны, и йӧктыштасны мича шылад улӧ, шмонитыштасны, сералыштасны, зэв лӧсьыда коляс рытыс.
А татшӧм праздник вылад колӧ, мед пызаныд вӧлі тыр. Та вӧсна быдӧн гортсьыс удж вылас вайӧ кутшӧмкӧ чӧскыдтор: кодкӧ пӧжасьыштас, мӧд яя картупель лӧсьӧдас, коймӧд чери пражитыштас.
Со и Анна Васильевналы колӧ асьсӧ бур боксянь петкӧдлыны нывъёртъяс водзас. А кыдзи? Олӧ ань гӧлиника, ӧтнас быдтӧ кык челядь, ёнасӧ сьӧмӧн лышкыдасьны оз вермы. Но он жӧ кушӧн мун, сэки ӧд ставыс тэ вылӧ мисьтӧма кутасны видзӧдны. Веськыда кӧть оз шуны, но быдӧн думыштас, но пӧ тайӧ и морт! Йӧз вайӧмтортӧ то кутшӧм горша сӧвтӧ, а ачыс тыртӧм киӧн локтӧма!
Но Анна Васильевна эз кут шогсьыны, пражитіс картупель, сорлаліс сола тшакӧн, выяліс, видліс да аслыс зэв на и кажитчис. Пӧжаліс кӧвдум да шаньга, няньшомыс мичаа кыптіс да, банйӧма, пушыд пӧжасыс артмис. Петіс магазинӧ ӧттор-мӧдтор ньӧбыштны. Сэні джаджсьыс син улас уси паськыд сельди банка, дзик ӧти душ пыдӧсас кольӧма, а рӧсолыс вель уна на. Ньӧбис бӧръя черисӧ, а банкасӧ рӧсовнас вузасьысьыс аньлы вичмӧдіс бонус пыдди. Тайӧ бара жӧ бур, сыысь артмас чӧскыд нур.
Гортас рӧсовсӧ сораліс манка шыдӧсӧн, гӧрдӧдӧм могысь пуктіс томат паста, а мед пӧк вылысыс югъялас, содтіс кӧнтусь вый пань. Со и ставыс.
Зэв гажаа коли рытыс. Мый вайлісны гортсьыныс, ставсӧ сёйисны-юисны, и Анна Васильевналысь «гӧрд пӧксӧ» тшӧтш кушӧдз бырӧдісны, кокыс некытчӧ эз инмыв, ёна на и ошкисны.
Лӧсьӧдчисны нин мунавны гортаныс, кор кыськӧ тэрыба дзик кутш моз пырис Муза Петровна, шӧр бухгалтер, синмыс биӧн югзьӧ, сартас кӧ матыстан, тшук ыпнитас, матыстчис Анна Васильевна бердӧдз да веськыда чужӧмас чарзӧ:
— Гӧрд пӧк! Гӧрд пӧк! Яслиса челядьӧс моз манкаӧн вердіс да и жеръялӧ! — кодкӧ сылы Анна Васильевналысь гусяторсӧ удитӧма нин брадзнитны.
Сідз жӧ тэрыба, кыдзи пырис, бӧр петіс, а недыр мысти выльысь кыськӧ чужис, нюмъялӧ нин, инмӧдчис Анна Васильевналы пельпомас да вашнитіс:
— Рецептсӧ гижышт.
