ВЫВТІ ОШЙЫСЬНЫ ОЗ КОВ

«Коми сикт» 12-ӧд номерын Дедов («Сюзяыбса кооператив» гижӧдын) зэв ошйысьӧ сюзяыбса кооператив уджӧн. Лючки кӧ видзӧдлан, абу дзик сэтшӧм бур кооперативса уджыс. Дерт, важ йывсьыд абутӧмсӧ нинӧм нин гижныд, спекулянтъяскӧд зэв водзсасьӧмъяс эз вӧвны дай некод кооперативса уджалысьяссӧ уджалӧмсьыс арестуйтавныс эз волы. Мельничатӧ кооперативыд эз жӧ ачыс стрӧит. Сюзяыбса обществоыс кык воӧн ачыс вӧчис мельничасӧ, кооперативыс сӧмын пытшкӧссӧ вӧчыштіс. Школатӧ да нардомтӧ вӧчны ӧд шуныс кокни, а вӧчныд не друг. Нюртӧ косьтӧмыд сэтшӧм жӧ. Кооперативыслӧн уджыс оз зэв бура мун. Шленъясыс уджаӧсь кооперативыслы 6000 шайт саяс, код тӧдӧ, мый лоӧ вексельяс срок воӧм бӧрас. Ёнмыныд да вынсявныд сюзяыбса кооперативлы ёна на уна кад колӧ.

Тӧдысьяс.