КОМИ ГИЖЫСЬ ЧУКӦРЫН

Коми гижысь чукӧрын (КАПП-лӧн) правленньӧ мыйсюрӧ унатор нин вӧчис: лӧсьӧдіс да кытӧнсюрӧ вынсьӧдіс КАПП-лысь устав; юӧртіс КАПП лӧсьӧдӧм йылысь ВАПП-лысь (Всесоюзная Ассоциация Пролетарских писателей) правленньӧсӧ да корис налысь индӧдъяс водзӧ уджавны; чукӧстчис газет пыр став коми гижысьяслы; босьтчис гижны «Вит во Коми Автономиялы» нима нига — Коми обласьтлы вит во тыран лун кежлӧ (май 5-ӧд лун); лӧсьӧдіс план водзӧ кежлӧ уджавны; корсьӧ туйяс коми журнал лэдзны.

Ставыс ӧні КАПП-ын 15 морт; ылынджык олысь коми гижысьяс эз на удитны шыӧдчыныс.

Апрель 4-ӧд лунӧ вӧлі став шленыслӧн чукӧртчылӧм. Правленньӧлы сетісны водзӧ кежлӧ удж: а) быд вежонын «Коми Сикт»-ӧ ӧти лист бок печатайтны коми литература да КАПП уджалӧм йылысь; б) Обисполкомлысь да Обкомлысь корны быд вежонся ӧти номер «Югыд туй» пыдди лэдзны ӧтчыд быд тӧлысьын коми журнал; сэтчӧ сэсся тшӧтш печатайтны унджык коми литература; в) корны Обисполком пыр кольӧдны «Коми му» журналӧ коми литература юкӧд да печатайтны сэтчӧ журналӧ туяна гижӧдъяс; гижӧдъяссӧ сэтчӧ пондас лӧсьӧдны КАПП; г) коми гижысьяслысь выль гижӧдъяс видлавны да сёрнитны на йылысь уна йӧза собранньӧяс вылын да бура лӧсьӧдчӧмӧн; татшӧм собранньӧяссӧ вӧчлывлыны водзӧ кежлӧ ӧтчыд быд тӧлысьын; д) бурджыка кӧртасьны обласьтса да мукӧдлаын олысь коми гижысьяскӧд, коми-пермякъяскӧд, удмуртъяскӧд (вотякъяскӧд); е) кӧртасьны Педтехникумса да мукӧд гырысь школаса литература кружокъяскӧд; ж) чукӧртны кувсьӧм и ловъя коми гижысьяслысь биографияяс; з) лӧсьӧдны «Югыд туй» редакциякӧд чукӧртлыны коми гижысьясӧс да селькоръясӧс конференция вылӧ ӧти кадӧ; и) бурджыка колльыны май 5-ӧд лун: Сыктывдінкарын вӧчны «Коми рыт»; вӧлӧсьтъясын, сиктъясын сійӧ лунъясас вӧчавны коми спектакъяс, коми рытъяс, коми докладъяс (кыдзи-мый праздничайтны — лючки лӧсьӧдас да юӧртас быдӧнӧс Обисполкомбердса комиссия).

Татӧні став письыс, дерт, медсьӧкыд уджыс — лӧсьӧдны журнал. КАПП ас вылысь журнал лэдзны, дерт, оз вермы — сылӧн абу некутшӧм сьӧм та вылӧ.

Колӧ кодкӧдкӧ ӧтвылысь лэдзны. Ми арсяньыс нин вӧлі зілям лэдзны «Югыд туй» бердӧ быд тӧлысьын крестьяналы ӧти коми журнал — сэтчӧ позьӧ эськӧ вӧлі тшӧтш коми гижысьяслысь сьылан-лыддянъяссӧ, висьтъяссӧ да мукӧд бурджык гижӧдъяссӧ печатайтны, позис тшӧтш печатайтны КАПП уджалӧм йылысь. Редакцияын ӧнія уджалысьясыс тайӧ зэв жӧ коланторйӧн шуӧны.

Дерт, коми литератураыд, он кӧ понды сійӧс печатайтны, некор оз сӧвмы, оз сод, оз бурмы.

Коми литература водзӧ тувччас, КАПП-лӧн уджыс бура пондас водзӧ мунны, лоӧ кӧ журнал, либӧ КАПП-лысь гижӧдъяссӧ кӧ кутшӧмкӧ журналын пондасны печатайтны.

Тайӧ ӧні кежлӧ КАПП-лӧн медыджыд, медколан удж.

А. Чард.