ВИДЗӦЙ СИКТЪЯСТӦ СОТЧӦМЫСЬ

Кыдзи нӧ сиктъясӧс видзны пӧжаръясысь? Мый вермасны видзӧм кузяыс вӧчны волисполкомъяс?

Медвойдӧр волисполкомъяслы колӧ пуктыны вӧлӧсьтувса пӧжарнӧй старӧстаӧс. Сэтчӧ колӧ бӧрйыны вежӧра зіль мортӧс. Вӧлӧсьтас кӧ эмӧсь пӧжарнӧй дружинаяс, старӧстаас колӧ пуктыны кутшӧмкӧ дружинаысь тӧлкаджык юралысьсӧ.

Сэсся волисполком бердас колӧ лӧсьӧдны пӧжарнӧй секция морт 5−6-ысь. Пӧжарнӧй секцияса уджас колӧ кыскыны вежӧраджык зільджык крестьянаӧс да вӧлӧсьтувса учрежденньӧясын уджалысьясӧс.

Пӧжарнӧй секциялы да вӧлӧсьтувса пӧжарнӧй старӧсталы колӧ: 1) быд сиктӧ лӧсьӧдны сиктса пӧжарнӧй старӧстаӧс; 2) зільны сиктъясын лӧсьӧдны сиктса пӧжарнӧй дружинаяс, мед эськӧ быд 300 керка юрӧ вӧлі ӧти ён дружина; 3) видзӧдны юкмӧсъяс бӧрся, мед найӧ эз ёгӧссьыны, тырны, мед пыр сэтӧн вӧлі уна ва; 4) видзӧдны, мед трубаяс, пачьяс вӧлӧсьтын абу вӧлі киссьӧмаӧсь; 5) видзӧдны, мед крестьяна да учрежденньӧяс пӧжаръясысь видзчысьӧм йылысь постановленньӧяс эз торкны, на серти уджалісны.

Сиктса пӧжарнӧй дружинаяс лӧсьӧдігӧн оз ков вӧтчыны лыд бӧрсяыс. Медбур лӧсьӧдны кык-куим ён дружина гырысьджык да мӧда-мӧдсьыс ыліджык сиктъясас.

Вӧлӧсьтувса пӧжарнӧй старӧстаяслы да секцияяслы тайӧ уджъяс кындзиыс колӧ нуӧдны мукӧд пӧлӧс пӧжаръясысь видзчысян уджъяс: войяснас гӧжӧмын караулитчыны, туй бокъясӧ пуяс пуктавны (пуясыс ёна жӧ видзӧны пӧжар паськалӧмысь) да мукӧдтор.

Сэсся волисполкомъяслы да пӧжарнӧй секцияяслы ёна колӧ водзсасьны чукӧрӧ сиктъясын керкаяс стрӧитӧмкӧд. Волисполкомъяслы колӧ лӧсьӧдавны планъяс да сӧмын сійӧ планъяс сертиыс выль керкаяс стрӧитны. Медся нин сійӧс колӧ нуӧдны сотчалӧм бӧрын. Пӧжаръясысь видзчысян уджас колӧ кыскыны став крестьянасӧ. Оз ков вунӧдны: пӧжаръяскӧд сӧмын вермам водзсасьны, дугӧдны пӧжар лоӧмсӧ, став крестьянасӧ кӧ кыскам сійӧ уджас, кутам кӧ ӧтвылысь нуӧдны уджсӧ.

Волисполкомъяслы вонас кыкысь кымын колӧ чукӧртлыны сӧвещанньӧ пӧжаръясысь видзчысьӧм йылысь сёрнитны. Сійӧ сӧвещанньӧ вылас колӧ корны сельсӧветъясысь юралысьяссӧ, пӧжарнӧй дружинаясысь начальникъяссӧ, пӧжарнӧй старӧстаясӧс, агрономъясӧс, школаын велӧдысьясӧс, страхӧвӧй агентъясӧс да мукӧдӧс. Тайӧ сӧвещанньӧяс вылас колӧ лӧсьӧдны план пӧжаръясысь видзчысьӧм йылысь вӧлӧсьтас, сёрнитны, кыдзи сійӧ плансӧ нуӧдны олӧмас да сідз водзӧ.

Вӧлӧсьтувса бюджетӧ пӧжаръясысь видзчысьӧм удж вылӧ колӧ жӧ сюйны мыйкӧ мында рӧскод. Медъёнасӧ сьӧмыс колӧ пӧжарнӧй машинаяс, рукавъяс да мукӧд пӧлӧс пӧжарысь видзчысян кӧлуй лӧсьӧдӧм вылӧ. Сэсся колыштӧ сметаӧ сюйны ичӧтика сьӧм пӧжарнӧй старӧсталы мынтӧм вылӧ, пӧжарнӧй дружинаяслы кутшӧмсюрӧ рӧскод вылӧ, колӧ ичӧтика сьӧм пуктыны бурджык дружиналы лӧсьыда уджсӧ сувтӧдӧм вылӧ, бур кусӧдчӧм вылӧ да сідз водзӧ. Сідзжӧ колӧ сметаас сюйыштны сьӧмтор пӧжарнӧй делӧ йылысь литература судзӧдӧм вылӧ. Сійӧ литературасӧ ёна колӧ разӧдны сиктын лыддьысян керкаясӧ, школаясӧ да мукӧдлаӧ, мед крестьяна вермисны бура тӧдмасьны пӧжаркӧд водзсасян уджӧн.

Со мыйяс колӧ вӧчны волисполкомъяслы сиктъясӧс пӧжаръясысь видзан уджын.