ПАТЕР

Тайӧ вӧлі воддза нэмся ветымынӧд вояс заводитчигӧн неыджыд коми сиктын. Ыджыд войнаыд деревняяссьыд мужикуловтӧ, позьӧ шуны, кушӧдз чышкыштіс, колины сӧмын пӧрысьяс, челядь, инвалидъяс да дӧваяс.

Тулыснад гӧра-кӧдза дырйи, гожӧмнас турун заптігъясад, а арнас муяс вылысь нянь идралігӧн юрсиктысь век волывлісны партия райкомсянь уполномоченнӧйяс. Налӧн могыс вӧлі видзӧдны, кыдзи сиктын мунӧ уджыс, кыдзи колхозыс тыртӧ план, колӧ али оз кутшӧмкӧ отсӧг. Збыльвылас, дерт, татшӧмъясыс сӧмын дӧсадитчисны, гартласисны уджалысь войтырлӧн кок уланыс.

Вот и воис сиктӧ райкомса уполномоченнӧй, пӧрнӧй роч мужик, портпеля, и пом. Колхозса председатель, сойпӧла Миня Гриша, овмӧдіс сійӧс патераӧ кык челядя дӧва Педӧр Наста ордӧ:

— Наста, то ме тэныд патерантӧс вайӧді — райкомса уполномоченнӧйӧс, — та дырйи лэптыліс вывлань водз чуньсӧ. — Керкаад пыді жырйыд дзик прӧст, мед сэні узьлас да гумагаяснас ноксяс. Тэ сылы ёна эн дӧсадитчы. Олас сэтчӧдз, кытчӧдз колхозын вартӧм оз помась, артавны кӧ, ылӧсас октябрь тӧлысьӧдз.

— Патерщикӧс эськӧ вайӧдін, а мыйӧн ме сійӧс вердны кута? — скӧрысьмоз синкым увтіыс мерайтіс патеранттӧ Наста. — Челядьӧс вердны нинӧмӧн, а тані содтӧд нӧшта дзонь мужик менам сьылі вылӧ ӧшъяс!

— Эн пов, Наста, колхозсянь вичмӧдыштам тэныд сю, да и трудоденьяс на содтӧд пасъям.

— Трудоденьястӧ шыд пиад он пукты, — чӧвтіс ань да бергӧдчис уполномоченнӧйлань: — Но, закоди тогда, петкӧдла узьланінтӧ.

Тадзи и овмӧдчис воӧм морт Наста керкаӧ. Куим лун мысти шор дорӧ вала лэччылігӧн Наста вочаасис мӧд дӧвакӧд, Микол Надекӧд, коді зэв сюся видзӧдліс Насталы синмас да нюмъялігтырйи, кӧть эськӧ матігӧгӧрын некод эз вӧв, гусьӧникӧн юаліс:

— Но, кыдзи олӧ-вылӧ патерщикыд? Сыысь тэныд мыйкӧ чуктылӧ али оз?

— Ме ог тӧд, — ӧвтыштчис Наста. — Видзӧднысӧ быттьӧ гача, и пом, а кукань кодь дзик, некутшӧм буртор сысянь эг на аддзыв. Винаӧн весиг юктыштла, мед збоймӧдыштны. Мукӧд мужикыд ӧд стопкатӧ дзибыртасны да, синныс югзьӧ, а тайӧ ӧдва-ӧдва крӧватьӧдз воӧ, пласьт усяс да асылӧдзыс оз вӧрзьӧдчыв, сідзи и шкоргас. Менӧ оз и аддзы, быттьӧ ме кын мыр! Мый вылӧ татшӧм уполномоченнӧйяссӧ и ыстӧны?

— Колӧкӧ, удачаыс абу, узьны сӧмын и вермӧ. А тэ, Настук, оз кӧ нинӧм вежсьы, вӧтлы сійӧс дай. Пошёл, шу, татысь, кытчӧ гажыд!

— Сідз, тшук, и ковмас вӧчны, дыр-ӧ сэсся сы вылӧ любуйтчыны позьӧ!

Лун-мӧд мысти водз асывнас Насталысь чӧскыда узьысь челядьсӧ садьмӧдіс мамыслӧн роч вылӧ гораа увгӧм:

— Шыдом шыділ да, клебом клебил да, тшаём тшаил да, сакаром сакарил да, молоком молокил да! Сё тебе не патер! Пошёл матер! Ищи новый патер!