ВИДЗ-МУ УДЖАЛАН ЮКӦДЫН

Кӧдзны лӧсьӧдчӧны.

Матысмӧ тулыс, локтӧ кӧдзан пӧра. Ӧні крестьяна быдлаын лӧсьӧдчӧны гӧрны-кӧдзны, весалӧны да сортируйтӧны кӧйдысъяс. Став сортируйтчан машинаясыс прокатнӧй пунктъясын, кооперативъясын да волисполкомъясын уджалӧны. Сӧмын ӧні кӧдзыд лунъяс вӧсна да дженьыд лунъяс вӧсна став крестьянаыс озджык вевъявны кутчысьны тайӧ уджыс бердӧ.

Агрономъяс крестьяналы висьтавлӧны, кутшӧм выгӧдаяс кӧйдыс сортируйтӧмысь, сэсся вӧчӧны опытъяс, кӧні кутшӧмджыка чужалӧны кӧйдысъяс.

Найӧ жӧ крестьяна костын нуӧдӧны сёрни унджык анькытш кӧдзӧм вӧсна. Анькытш кӧдзӧмсьыс миян войвылын уна пӧльза локтӧ.

Сэсся агрономъяс сёрнитӧны унджык картупель вӧдитӧм йылысь да кыдзиджык сійӧс вӧдитны, мед ыджыдджык урожай воас.

Миян обласьтын уналаын на муястӧ гӧрӧны важ ног гӧръясӧн. Дерт эськӧ уна нин и плугъясӧн гӧрӧны, сӧмын абу на сійӧ тырмымӧн. Агрономъяс крестьяна костын сёрнитӧны важ нога гӧръясысь эновтчыны да лӧсьӧдны плугъяс, корсьны плугъяс вылӧ кредит (удждысьӧм).

Землеустройство нуӧдӧм йылысь.

Таво миян обласьтын чайтӧны вундавны расселенческӧй участокъяс (выль овмӧдчан местаяс) дас сюрс десятина гӧгӧр, кыксё ветымын семья вылӧ. Сійӧ уджсӧ лӧсьӧдны вундалан местаясас мӧдӧдӧма обласьтсянь нёль мортӧс (землемерӧс).

Медунасӧ овмӧдчан местаяс чайтӧны лӧсьӧдны Сыктыв уездын.

Сэсся ӧні мунӧ землеустройство Кӧдзвывса вӧлӧсьтын. Юкӧны Чит сикт Выльгортса вӧлӧсьт улысь. Вӧчӧны землеустройство Визинса земельнӧй о-воын. Визинса обществоас кӧсйӧны юклыны дас кык сюрс десятина видз-му.

Мунӧ му-видз юкӧм Якушевскӧй об-воын (Вомын вӧлӧсьтын, Кулӧмд. у.).

Помӧсдінса вӧлӧсьтын (Кулӧмд. у.) вӧчӧны му-видз межаяс орчча вӧлӧсьтъяскӧд.

Ӧні обласьт пасьта татшӧм землеустройство уджсӧ нуӧдӧны дас кык морт.

Выль овмӧдчан местаяс кутасны вундавны обласьтувса бюджет тшӧт вылӧ. Сетӧма сы вылӧ кӧкъямыс сюрс шайт. Тайӧ уджысь крестьяналысь некутшӧм дон оз босьтны.

Мукӧд пӧлӧс уджъяссӧ землеустройство нуӧдӧм кузя кутасны нуӧдны крестьяна тшӧт вылӧ. Дай тані сетсьӧны кокньӧдъяс: центрсянь кӧсйӧны дас кык удж нуӧдысь морт письыс квайтыслы мынтыны государствосянь. Сы вӧсна гӧль крестьяналысь да гӧрдармееч семьяяслысь землеустройство нуӧдӧм уджсьыс дон оз кутны босьтны.

Землеустройствотӧ вӧчны крестьяна ёна корӧны. Сы вӧсна ещӧ на эськӧ уджалысьяссӧ колӧ босьтны морт ӧкмысӧс либӧ дасӧс, да сьӧмным оз тырмы, мукӧдлаас важ уджйӧзсӧ уджсьыс крестьянаыс эз на мынтыны да. Сэтшӧм мынтытӧм сьӧмыс эм кӧкъямыс сюрс шайт кымын.

Ӧні ыджыд школаясын землемерӧ велӧдчӧны куим коми морт.

Землеустройство уджъяс вылӧ центрсянь кутасны сетны крестьяналы сельскокӧзяйственнӧй банк пыр сьӧм уджӧн. Обласьтын сэсся эм на тайӧ удж вылас кольӧм вося сьӧмыс 9225 шайт.

Миян обласьтын землеустройство удж вӧчысьыд этша. Сы вӧсна таво кӧсйӧны Уллянаса сельскокӧзяйственнӧй техникумысь босьтны квайт велӧдчысьӧс да найӧс тайӧ удж вылас мӧдӧдны.