ПОТРЕБОБЩЕСТВОЯСЛӦН НИГА РАЗӦДӦМ

Уна потребобществоса лавкаясын эм бура уна нига. Нигаясыс крестьяна костын разалӧ зэв на омӧля. Крестьяна абу на велалӧмаӧсь аддзыны нигасьыс бурсӧ. Унаӧн на тадзикӧн сёрнитӧны: «...Миян эм библиотека бесплатнӧй, дай сійӧ на ог лыддьӧй нигатӧ, кысь нин деньга вылас ньӧбнысӧ... Истӧг ящик вылад деньгаыд абу-а, кысь нин нига вылӧ... Би колӧ сэтчӧ, дай он эшты: удж вывсьыд воан да, абу нигаӧдз нин»... Мукӧд бурджыка думыштас дай мӧд ног шулӧ: «Уджалам, уджалам, а гашкӧ, йӧйсӧ уджалам: мукӧдлаын тай уджалӧны жӧ да нигатӧ эштӧны лыддьыны. Нигаыд налы буракӧ индӧ жӧ, кыдзи кокньыдджыка уджавны»... Мӧд ног кӧ, нига разӧдӧм ставнас вузалысь сайын. Миян потребобществоясын вузалысьяс унджыкыс нига разӧдӧмсӧ оз на шуны уджӧн. Пуктӧмаӧсь нигаяссӧ джадж вылӧ, быттьӧ тшӧктӧны да сы понда. Оз кӧ шочиника кодкӧ юав ачыс, вузасьысь ассяньыс оз нин вӧзйыв некод. Куйлӧны бус пиын, мукӧддырйи зэв бур колан нигаяс му помасьтӧдзыс. Тадзинад, дерт, нигаыд некор оз разав, оз паськав крестьяна костад.

Нига разӧдӧм — зэв ыджыд йӧзӧс югдӧдан удж. Быд потребобществолы быд сиктын колӧ зэв зіля да лючкиа босьтчыны тайӧ удж бердӧ. Колӧ быд ногӧн нигаяс йӧткыны, матыстны крестьяна пӧвстӧ. Джаджъяс вывсьыд нигатӧ колӧ тшӧкыдджыка видлавны да судзӧдны сэтчӧ выль бур колан нигаяс. Быд сиктын позьӧ ещӧ нигаястӧ разӧдны школаясын велӧдысьяс пыр, том йӧз пыр, быд грамотнӧй морт пыр. Сетан налы 20 кымын, 30 кымын нигаӧн — мед найӧ эштана кадӧ крестьяна пиын олігӧн, сёрнитіг-велӧдігмоз вузалӧны нигаястӧ. Бур колан нига бура вузалігӧн ньӧбысьӧс пыр аддзас. Сӧмын тадзи зіля видзӧдӧмӧн и позьӧ разӧдны сійӧс.

Збыльысь, ёртъяс, вайӧ жӧ босьтчӧй ёнджыка тайӧ удж бердӧ!

Ал. П.