КРЕСТЬЯНА КОСТЫН ЁНДЖЫКА УДЖАЛӦЙ

Сиктса коммунист партия ячейкаяслы колӧ нуӧдны став олӧмсӧ сиктъясын, став уджъяснас веськӧдлыны, велӧдны крестьянаӧс сійӧ уджъяссӧ нуӧдны.

Дерт, этша вына ячейкаяслы сьӧкыд уджтӧ нуӧдны йӧз пӧвстад. Сиктъясын, кӧні партияяса ячейкаясад этша уджалысьыс, ичӧт выныс, олӧмыс ёна жӧ бӧрӧ кольӧма. Мукӧд сиктъясын ячейкаяс ёнӧсь, нуӧдӧны найӧ сиктса овмӧссӧ, крестьяна кывзӧны налысь, мунӧны найӧ индалӧм серти.

Кыдзи нӧ бура сувтӧдны уджсӧ быд сиктса ячейкаясын? Бура ми вермам сувтӧдны уджсӧ сӧмын ячейкаыс кӧ вермас кыскыны уджас унджык крестьянаӧс да кутам кӧ тӧдмавны крестьянаыслысь корӧмъяссӧ, налы коланторъяссӧ.

Дерт, крестьянаӧс партия бердӧ сьӧкыд кыскыны политика йылысь сёрнитӧмӧн. Крестьяниныд сы йылысь оз и кут кывзынысӧ. Колӧ крестьяналы висьтавлыны ас крестьяна овмӧс йывсьыс, овмӧссӧ лэптӧм йылысь, вӧлӧсьтувса удж нуӧдӧм йылысь, сідз водзӧ. Сэки и мукӧдтор йывсьыд кутасныджык найӧ кывзыны. Оз ков асьтӧ некор вылӧ пуктыны, командуйтны крестьяна вылын. Крестьянаыд пыдди кутасны пуктыны коммунистъяслысь кывъяссӧ, сӧмын кутан кӧ быд юасьӧм вылӧ тӧлкӧн, бура сылы висьтавны.

Сӧмын сідзи уджалӧмӧн кутасны крестьяна кывзыны ячейкаяслысь да тшӧтш уджавны ячейкаясыскӧд, отсасьны налы.

Уна ячейкаяс на оз кужны нуӧдны крестьяна пӧвстын удж, оз на отсавны мӧда-мӧдныслы уджсӧ нунысӧ.

Кӧні ячейкаясыс кужӧмӧн нуӧдӧмаӧсь крестьяна костын уджсӧ, сэні крестьяна уджалӧны ячейкакӧд ӧтвылысь, юасьӧны налысь, кыдзи-мый колӧ вӧчны, волывлӧны ячейкаса собранньӧяс вылӧ.

Сэтшӧм ячейкаясад эмӧсь уджалысь беспартийнӧй крестьяна (крестьянский актив). Найӧ быд ногӧн отсасьӧны ячейкаясыслы. Ячейкаясыс нуӧдӧны унджык уджсӧ на пыр.

Колӧ быд ячейкалы ёнджыка босьтчыны нуӧдны удж крестьяна костын.

М. П.