БЕССАРАБИЯЫН КРЕСТЬЯНАЛӦН ОЛӦМ

Бессарабияын крестьяналӧн олӧмыс вывті сьӧкыд. Бессарабияыс войдӧр вӧлі Россия улын, а революция дырйи сійӧс ставнас босьтіс Румыния. Румынияса власьтъяс босьтӧмсяньыс пыр на нартитчисны бессарабияса крестьяна вылын, дзескӧдісны найӧс. Бессарабияыс вӧлі войдӧр зэв няня озырин. Ӧні румынияса пӧлича ки улад олігӧн бессарабияса крестьяна дзикӧдз рӧзӧритчӧмаӧсь. Весиг капиталистъяслӧн Бессарабияас петысь газетъясын гижӧны: бессарабияса крестьяналӧн пӧ олӧмыс вывті омӧль.

Со мый ӧти газетын гижӧны: «Выль урожайӧдз ылын на. Тшыгъялысь бессарабияса крестьяналӧн асланыс няньыс абу».

Медъёнасӧ дзескӧдӧ быд ногыс крестьянасӧ ачыс правительствоыс. Тшыг йӧзлы отсалӧм пыдди сійӧ нянь вылас ачыс пыр донсӧ лэптӧ. Уджӧн эськӧ правительствоыс сетӧ крестьяналы няньсӧ, сӧмын зэв донӧн да ыджыд прӧчентӧн — оз зэв босьтавны. Крестьяна босьтавлӧмаӧсь уджӧн, да налысь бӧр уджйӧзсӧ мынтыныс вузалӧмаӧсь скӧтсӧ, видз-му уджалан кӧлуйсӧ да сідз водзӧ. Мукӧд сиктъясас уджалан скӧтыс кольӧма сӧмын куим-нёльӧн нин.