ТОМ ЙӦЗӦС АРМИЯӦ БОСЬТӦМ ЙЫЛЫСЬ
Кутшӧм льготаяс сетлӧны. Кыдзи корсьны льготасӧ.
Гӧрд армияӧ ӧні быд во босьтӧны том йӧзӧс. Воас коркӧ кад мунны армияӧ 1904ʼ воын чужысь войтырлы. Гӧрд армия ӧні миян абу ыджыд. Став ӧти вося том йӧзӧс сэтчӧ оз босьтны. Унджык том йӧзӧс кольӧны гортаныс.
Мед эськӧ армияӧ босьтан том йӧз пиысь колины гортаныс семьяясас уджалысь пыдди ёнджыка колан мортъяс, лӧсьӧдӧма семья серти да овмӧс серти льготаяс (кокньӧдъяс). Льготаясыс эмӧсь куим разряда.
Первойя разряд льготаыс сетсьӧ сэтшӧм призывайтчысьлы, семья пиас кӧ сійӧ ӧтнасӧн уджавны вермысьыс да сы киын кӧ куим либӧ унджык уджавны вермытӧм мортъяс (нетрудоспособных).
(Уджавны вермытӧмъясӧн лыддьысьӧны: мужчинаяс 18 арӧсысь томджыкӧсь да 55 арӧсысь пӧрысьджыкӧсь; нывбабаяс 18 арӧсӧдз да 50 арӧсысь ыджыдджыкӧсь. Уджавны вермытӧмъясӧн жӧ лыддьысьӧны рушкуа нывбабаяс; нывбабаяс, кодъяслӧн эмӧсь кӧкъямыс арӧсысь посниджык челядь; некутшӧм удж нуӧдны вермытӧм инвалидъяс).
Мӧдӧд разряд льгота сетсьӧ семья пиын ӧтка уджавны вермысьлы, эм кӧ семьяас ӧти либӧ кык уджавны вермытӧм морт.
Семья пиас кӧ призывайтчысь кындзи эм ещӧ мӧд уджавны вермысь морт да найӧ кыкнаныс вердӧны куимӧс либӧ унджыкӧс уджавны вермытӧмъясӧс, сетсьӧ коймӧд разряд льгота. Льгота улӧ сюрысь призывайтчысьясӧс мукӧдсӧ моз жӧ видлалӧны комиссияын. Первоя разряд льгота улӧ веськалысь мортӧс армияӧ дзикӧдз оз босьтны. Мӧдӧд да коймӧд разряд льготаа йӧз пиысь мыйкӧ мында вермасны босьтны, ковмасны кӧ унджык йӧз армияӧ миян обласьтысь. Армияӧ босьттӧм том йӧзӧс кутасны велӧдны военнӧй уджӧ гортаныс. Велӧдчӧны найӧ вит во чӧж, быд во квайт тӧлысь кежлӧ либӧ регыдджык кежлӧ чукӧртчылӧмӧн.
Сэсся сетсьӧны льготаяс выль местаын овмӧдчысь призывайтчысьяслы, овмӧдчисны кӧ найӧ выль местаас 1924ʼ вося январ 1-ӧд лун бӧрти. Татшӧм призывайтчысьясӧс льготаыс армияын служитӧмысь оз дзикӧдз мезды, а сӧмын найӧс армияас босьтӧмысь кольлӧны — куим во кежлӧ либӧ ӧти во кежлӧ (овмӧдчан места сертиыс).
Выль местаӧ овмӧдчысь призывникъяслы заявленньӧ бердас колӧ пуктыны удостоверенньӧяс овмӧдчӧм йывсьыс.
Заявленньӧяс сетан сроксӧ лӧсьӧдӧма апрель 25-ӧд лун кежлӧ.
Быд 1904ʼ вося том йӧзлы колӧ лючки тӧдмасьны льготаясӧн, да оз кӧ позь сылы мунны армияӧ аслас овмӧс вӧсна, тэрмасьны заявленньӧ сетӧмӧн, регыдджык сетны.
Быд партияса шленлы, комсомолечлы, профсоюзса шленлы, быд лыддьыны кужысь мортлы колӧ висьтавлыны призывникъяслы дай йӧзыслы льготаяс йылысь тайӧ гижӧд серти.
Эн пӧ.
