КРЕСТЬЯНА, МУНӦЙ КОНФЕРЕНЦИЯЯС ВЫЛӦ!
Овмӧс кыптӧм да бурмӧм вӧсна олӧмыс рабочӧйлӧн да крестьяналӧн воысь воӧ бурмӧ. Овмӧс бурмӧмкӧд уджалысь йӧз зільӧны кутчысьны лӧсьӧдны олӧмсӧ: Сӧветъясын, кооперативъясын да мукӧд организацияясын уджалӧм пыр кӧсйӧны отсавны Сӧвет власьтлы овмӧс кыпӧдны, выль оласног лӧсьӧдны.
Тайӧ тӧлысьын Коми обласьт пасьта мунӧны крестьянскӧй конференцияяс. Коми крестьяна вермасны конференцияяс пыр тӧдмавны Сӧвет власьтлысь уджалӧмсӧ да тшӧтш висьтавны ассьыныс кыв, кыдзи водзӧ кежлӧ нуӧдны уджсӧ.
Крестьянскӧй конференцияяс вылын медыджыд сёрни лоӧ коммунист партия 14-ӧд съезд йылысь. Докладчикъяс висьталасны, кутшӧм сёрни вӧлі съезд вылын, мый шуис съезд крестьянскӧй овмӧс кыпӧдӧм йылысь, кооперативъясын удж нуӧдӧм йылысь; кутшӧм спор муніс съезд вылын, кутшӧм ӧшыбкаяс вӧлісны споруйтысьяслӧн. Докладчикъяс коммунист партия 14-ӧд съезд йылысь вермасны лыддьыны миян газетысь статьяяс 1925 вося «Югыд туйын» 255−261 номерын да 1926 вося №№ 13, 37, 41, 43, 53.
Конференцияяс вылын оз ков зільны гижны кузь резолюцияяс, колӧ сӧмын нуӧдны конференцияяссӧ сідзи, мед крестьяна сёрнитасны да висьталасны ассьыныс кыв коммунист партия съездвывса шуӧмъяс йылысь.
Конференцияяс вылын сэсся лоӧ сёрни Обласьтувса Сӧветъяслӧн 5-ӧд съезд вылын да коммунист партиялӧн 7-ӧд обласьтувса конференция вылын шуӧмъяс йылысь: вӧлӧсьтувса овмӧс кыпӧдӧм йылысь, бюджет йылысь, сельхозналог йылысь, школаяс да больничаяс (фельдшеръяс) ёнмӧдӧм да паськӧдӧм йылысь. Обласьтувса Сӧветъяс съезд вылын вӧліны делегатъяс уна вӧлӧсьтъясысь, найӧ тшӧтш висьталасны съездвывса шуӧмъяс йылысь. Конференцияяс вылын колӧ тӧдмавны, мый шуӧны крестьяна районированньӧ йылысь, кыдзи лючкиджык ӧтлаавны вӧлӧсьтъяс районъясӧ.
Конференцияяс вылын ковмас вӧчны докладъяс волисполкомын, кооперативын, мӧда-мӧдлы отсасян комитетын уджалӧм йылысь. Крестьяналысь индалӧмъяссӧ удж бурмӧдӧм йылысь колӧ ставсӧ тӧдмавны да вӧчны найӧ шуӧмъяс серти.
Уна мукӧд сёрни ещӧ лоӧ конференцияяс вылын (кӧдзӧм-гӧрӧм йылысь, вӧр кылӧдӧм йылысь да мукӧдтор). Конференцияяс пыр крестьяна асьныс кутасны корсьны туй бурджыка вӧлӧсьтыслысь овмӧссӧ кыпӧдны. Сідзжӧ крестьяна тайӧ уджнас кыскыссьӧны сӧветъясын уджалӧм вылӧ. Колӧ ёна зільны, мед унджык крестьяна воласны конференцияяс вылӧ.
Н. К.
