ЛОКТӦ КЕР КЫЛӦДАН КАД
Ми олам вӧр пӧвстын. Позьӧ шуны — вӧр миянӧс вердӧ, пасьтӧдӧ, шонтӧ. Во чӧж коми йӧз оз петавны пемыд парма пытшкысь. Тӧлын найӧ лэдзӧны сортовка, тулыс — вӧралӧны да кылӧдӧны кер, гожӧмын — юяс кузя вӧчӧны турун, кыйӧны чери, арын — выль му да выль видзьяс керӧны, бергӧдлӧны мыръяс, кыйӧны сьӧлаясӧс, таръясӧс, дозмӧръясӧс да вӧралӧны уръяс.
Медся сьӧкыд удж кер бердын. Уна сэн лоӧ лэдзны ньылӧм да вын. Мый нӧ вӧчан: лоӧ ӧд кыдзкӧ кынӧмтӧ вердны. Он вермы сытӧг некыдзи пӧтны. Ковмас на дыркодь тайӧ уджсӧ нуӧдны. Мукӧд нажӧтка шедӧ омӧля. Гашкӧ, коркӧ Коми му пасьта лоӧ кӧрт туйяс да заводъяс. Сэки сӧмын коми йӧз кокньыдджыка лолыштасны.
Кер лэдзигӧн да кылӧдігӧн ӧні оз на мынтыны вывті гырысь дон. Колян вояс серти, дерт, этша доныс лыбис жӧ. Государство оз вермы пырысь-пыр лэптыны донсӧ. Ӧнӧдз на ми эгӧ кужӧй шыльыда панны тайӧ уджсӧ. Сы вӧсна доза ыджыд рӧскодъяс. Сэсся заграничаӧ ми вуджӧдам керсӧ зэв на этша. Кор кутам унджык сэтчӧ вузавны, сэки содас крестьяналӧн нажӧтка. Сэки содас Коми обласьтлӧн доходъясыс. Водзӧ вылӧ позьӧ паськӧдны велӧдчан удж, ӧдйӧджык кыпӧдны овмӧс.
Ӧні локтӧ кер кылӧдан кад. Посни юясысь кутасны вӧр кылӧдны найӧ жӧ, кодъяс тӧлын лэдзисны сортовка. Северолес медавлӧ найӧс отрядӧн. Эжва кузя да мукӧд гырысь юясӧд джын вӧрсӧ кӧсйӧны кылӧдны пуръясӧн, морт вынӧн. Пуръяссӧ ковмас воштыны Котласӧдз. Мукӧд вӧрсӧ кутасны нуны паракодъясӧн.
Важӧн рабочӧйлы лоӧ вӧлі медасьны сійӧ жӧ донӧн, кодӧс сетас приказчик. Ӧні быдлаын пӧшти эмӧсь профсоюзъяс. Найӧ чорыда сулалӧны рабочӧй дор. Ми чайтам, локтан кер кылӧдігӧн союзъясыд кыдзи вермасны сетасны отсӧг. Медся ыджыд удж налӧн медасигъясӧн, договоръяс вӧчигӧн. Сэсся союзъяслы ковмас мичаа видзӧдны, мед приказчикъяс быдӧн вӧчисны договор серти.
Донъяс вӧчигӧн союзъяслы да рабочӧйлы вермытӧмторъяс корны оз ков. Государство сетӧ водзысянь, кортӧг сэтшӧм дон, кодӧс вермӧ. Бура сёрнитӧмӧн, лӧсьӧдчӧмӧн регыдджык артмас договор. Тайӧ лӧсьӧдчӧмъяс кузя колӧ веськыда уджавны.
Колян воясын лоліны быдсяма зыкъяс. Таво оз ков воштысьны сэтчӧдз. Вӧлӧсьтбердса сӧветъяслы, ячейкаяслы колӧ тшӧтш кутчысьны висьтавлыны, отсавны кер кылӧдан уджъяс йылысь. Сӧмын найӧ отсӧгӧн бура мунас тайӧ уджыс.
