ТРАНСПОРТИР
Геометрия урок вылын Валентина Васильевна водз чуньнас пызанӧ таркӧдӧмӧн юӧртіс:
— Мӧд урокнас кутам велӧдны выль тема, сэк кежлӧ лӧсьӧданныд транспортиръяс, мед быд парта вылын вӧлі! Книжнӧй магазинын ӧні вузавлӧны, абу донаӧсь, ньӧбӧй! — висьталігас петкӧдлігмоз кыпӧдліс медводз пуысь вӧчӧм ыджыд транспортир, а сэсся жӧчысь ичӧтикӧс.
Валентина Васильевнаыдлысь кывзысьны быть, сійӧ ӧд зэв стрӧг велӧдысь, сыысь ставныс ёна полӧны, мун да и тӧд, мый сійӧ вермас вӧчны, оз кӧ ло тэнад транспортирыд.
— Вай кузь перемена дырйи лэбыштлам да ньӧбам, но? — вӧзйис Люся. — А друг магазинад сійӧ этша да удитас бырны?
—Да, сідзи и вӧчам, — ньылыдаліс нывъёртыслы Наташа.
Но абу сӧмын найӧ вӧлӧмаӧсь сэтшӧм сюсьӧсь, класс джынйыс звӧнок бӧрын чепӧсйис пасьтасьны. Ывлаын тӧв шӧр, кӧдзыд тӧлыс яндысьтӧг пырӧ паськӧм улӧ, вӧтлӧ сэтысь чукӧрмылӧм шоныдсӧ. Чой горув лэччигӧн Наташа виччысьтӧг усис, исковтіс мыш вылас да сунгысис толаӧ. Та дырйи пальтоыс павтыртчис, да кӧдзыд лымйыс пырис весиг мышку вылӧдзыс, сотыштіс пӧсялӧм яйсӧ. И кыдз сійӧ эз казяв посни челядьлысь йизьӧм исласянінсӧ? Эз доймы да, сійӧ нин кӧть бур, пыркнитчис да водзӧ летӧдіс. Ыджыд котырӧн гузьнитісны-пырисны книга вузавлан магазинӧ да сувтісны ӧчередӧ. Наташа да Люся лоины, позьӧ шуны, бӧръяяс лыдын. Та вӧсна Наташа сулалігчӧжыс пыр дзӧрис, мед эськӧ транспортирыс сылы судзсяс жӧ, мед эськӧ оз на быр! А платтьӧ улас веськалӧм лымйыс шоныдінад заводитіс сывны, кӧдзыд войтъяс тэрыб кодзувкотъяс моз чепӧсйисны увлань мышку кузяыс, доза деливӧ сулавнытӧ.
Но дзик весьшӧрӧ лоӧма нывкалӧн полӧмыс, судзсис и сылы вӧсньыдик жӧчысь вӧчӧм сэтшӧм коланаторйыс.
Пӧсялӧма, банйӧм чужӧма Наташа тэрмасьӧмӧн бӧр локтіс школаӧ, весиг эз сёрмы урок вылӧ. Сӧмын платтьӧыс кӧтасис да, мышкыс пондіс лудны, помся ковмис пельпомсӧ дзӧрӧдны, но нинӧм, урокъяс помӧдзыс кыдзкӧ кутчысяс.
— А тэ нӧ мыйла эн ветлы магазинад? — юаліс сійӧ Машалысь.
— Колантор тай! Ме некытчӧ тэрмасьтӧг гортӧ локтігмоз пырала да ньӧба, — кӧрыштліс чужӧмсӧ мӧдыс.
«А сэки, колӧкӧ, транспортиръясыд оз нин лоны да?» — мӧвпыштіс Наташа, но нинӧм воча эз шу.
Урокъяс бӧрын нывкаяс пырисны книжнӧй магазинӧ, и Машалы тшӧтш вичмис сэтшӧм колана инструментыс, абу бырӧма, уна, буракӧ, вайлӧмаӧсь.
— Мам, гыжъялышт мышкӧс, а то зэв ёна лудӧ, — шыӧдчис гортас Наташа мамыс дорӧ, кор пӧрччис школьнӧй платтьӧсӧ.
— Нолтӧ, став кучикыд тай нӧ гӧрд, и прыщикъяс чеччалӧмаӧсь, — чуймис мамыс.
— Мыйысь нӧ тайӧ артмис?
И ковмис нывкалы висьтасьны транспортирла котӧртлігӧн лым пиын турбылясьӧм йылысь.
— Сійӧ нӧ мыйла нин ньӧбин? Батьыдлӧн то пызан йӧрас татшӧм добраыд вит кымын туплясьӧ!
