ЖЫТНИК

Бара на кавшася кузь кока жытник водзӧ. Ыджыд важ ключӧн восьта ӧдзӧссӧ, йӧткышта – и мелань ӧвтыштӧ пӧдӧм кӧра кад. Воськовта тагӧс вомӧныс. Менӧ кытшалӧ жытникӧ йӧрмӧм рӧмыдыс. Вежавидзӧмӧн вӧрӧда жытник пельӧсын сулалысь кӧльӧсаа печкан. Кыткӧ чегӧма да, пӧчӧй сійӧн оз печкы. Неыджыд кудйын куйлӧны сьӧдӧдӧм чӧрсъяс. Мыгӧр сертиыс ӧткодьӧсь, сӧмын сернас торъялӧны.

Вель дыр позьӧ жытникын лукйысьны. Тані весиг лолавсьӧ мӧд нога, ӧд сынӧдыс йиджтысьӧма нин важ кӧлуй кӧрнас. И сӧмын ӧдзӧсӧдыс да стен пыр вӧчӧм розьӧдыс пырыштӧ ӧнія кадыслӧн югӧрыс.