СКОНЙЫШТЧИС
Капитолина Васильевна Солодова, квайтымын квайт арӧса карса ань, восьтіс синсӧ да кыпӧдіс юрсӧ.
— Аттӧ, эг и тӧдлы, креслӧад и вугыртсьӧма! Войнас некыдз унмовсьны ог вермы, а луннас синмӧй сідзи и куньсьӧ. А тэ нӧ, Жуля, мыйла менӧ эн пальӧд? — небыдика шыльӧдыштіс кӧзяйка пидзӧс вылӧ юрсӧ пуктӧмӧн куйлысь ичӧтик пӧрӧдаа паськыд синма понсӧ.
— Ув-ув, — вочавидзис лӧсталан сьӧд гӧна Жуля, чеччыштіс джоджӧ да бӧжсӧ легӧдігтырйи сьӧлӧмсяньыс нюжмасьыштіс.
— «Ув-ув» век тэныд, морт ногӧн лӧсьыда сёрнитны эн и велавлы! Видзи-видзи тэнӧ, быдті-быдті, велӧді-велӧді, а тэ эн и быдмы! Телевизор со ӧтнас уджалӧ, а тэ да ме узям. Ӧні ковмас пемыднас ывлаад гуляйтнытӧ петавны, шондіыд важӧн нин саялӧма. Но, мый тон вӧчан? Пасьтасям да ассьыным грекнымӧс вештам...
Капитолина Васильевна кык жыръя патераын ӧні ӧтнасӧн: верӧссӧ виис ковид, пиыс олӧ да уджалӧ мӧд карын, кӧнкӧ мусир перйӧ. Ань кусӧдіс телевизорсӧ, чеччис креслӧысь да биасис.
— Но мый, Жуля, гуляйтӧм бӧрын нин, тшук, чайтӧ юам, тэ та вылӧ кыдзи видзӧдан?
— Ув-ув! — сӧгласа вочавидзис Жуля, гыжнас джоджӧ котшкӧдігтыр котӧртіс ӧдзӧс дорӧ да кӧзяйкасӧ виччысигмоз бара легӧдыштіс бӧжсӧ: ме пӧ важӧн нин дась, а тэ бара на мӧжган!
Капитолина Васильевна кӧмаліс кӧр кысысь вурӧм пими, шоныда пасьтасис, пысаліс понйыслы сьыліас дом, босьтіс крукыля бедьсӧ да петіс площадка вылӧ. Лӧсьыда сиптіс ӧдзӧссӧ, бергӧдіс томанас ключ, содтӧд видліс, воссьӧ оз ӧдзӧсыс, бура абу томнассьӧма, дзебис ключсӧ пась зептас, и «дама с собачкой» (кыдз нимтыліс асьсӧ) лэччис пос кузя, восьтіс подъезд ӧдзӧссӧ да петіс ывлаӧ.
— То, видзӧд, Жуля, кутшӧм мича ывларуыс, быдсӧн сынӧдыс чӧскыд дука!
А Жуля тірӧдіс неуна бокӧджык, матыстчис тротуар бокын быдмысь лёкногӧн чегъялӧм увъяса кыдз пу дорӧ, кыпӧдіс бӧр коксӧ да пуктіс ассьыс кырымпас, мед мукӧд понйыс лыддясны да тӧдмаласны: «Тані вӧлі Жуля».
— Но, мӧдӧдчам жӧ, Жулюк, водзӧ.
Ывлаыс вӧлі збыль гажа. Абу торъя кӧдзыд, лӧнь, енэжсянь еджыд бобувъяс моз надзӧникӧн лэччӧны гырысь лым чиръяс да небыд эшкынӧн сайӧдӧны муӧ пуксьӧм карса няйтсӧ. Ӧтарсяньыс лым толаӧн, а мӧдарсяньыс акация кустъясӧн топӧдӧм тротуар кузя олӧма ань да сылӧн пелькиник понйыс тэрмасьтӧг мунісны некымын керка кост.
— Капитолина Васильевна, бур рыт! — кыліс неуна бокисяньджык нывбаба гӧлӧс. — Гуляйтыштны петінныд?
Тайӧ вӧлӧма Колипова, оліс сійӧ жӧ подъездас, кӧні и Солодова, сӧмын ӧти судтаӧн вылынджык.
— А-а, Анна Сергеевна! Видза олан! — нюмдіс олӧма ань. — Да, лунтыр нёль стенӧн топӧдӧмӧн дзескыдінад олігад мед дзикӧдз ог дуксьы, петавла сӧстӧм сынӧднас лолалыштны. А тэ удж вывсянь?
— Да-а. То! Видзӧд жӧ, видзӧд! — друг повзьӧмӧн горӧдіс Анна Сергеевна. — Кутшӧмкӧ мужик со дзоляник нывкаӧс кытчӧкӧ кыскыны пондіс! Тэ мый вӧчан, яндысьтӧм син?! Час, ме полицияӧ звӧнитла! Тайӧ, дерт, маньяк, код нӧ сэсся!
Збыль, нывбабаяссянь неылын пӧрнӧй мужик шашаритчӧма нывкаӧ да тшук кустъясас кыскыны кӧсйӧ, а мӧдыс мый юрас гӧлӧс чилзӧ-горзӧ.
— Ноко, лэдзчысь кагасьыс! — чирӧстіс гораа Капитолина Васильевна. — Весиг ӧд ни ӧти мужик матын абу, отсалӧй кодкӧ!
Анна Сергеевна уськӧдчис судзӧдны мобильниксӧ, тэрмасигад уськӧдіс сійӧс лым пиас, ӧдйӧ гӧрбыльтчыліс, босьтіс киас, чышкалыштіс да личкыштіс полиция номерӧ.
— Полицияса дежурнӧй майор Сикоркин, — пыр жӧ вочавидзис мобильник.
Ань тэрыба висьталіс сылы адрессӧ, кысянь ӧні звӧнитчӧ, и мый маньяк кутӧма дзоляник нывкаӧс да кыскӧ кустъяс сайӧ.
— Аттьӧ! Ті сэтысь некытчӧ энӧ мунӧй, ӧні жӧ мӧдӧдам опергруппа!
Капитолина Васильевна тайӧ кадас казяліс, кыдзи улич кузя наланьӧ надзӧникӧн гурӧдӧ полицияса лӧз визя еджыд машина. Олӧма ань кинас шенасигтырйи уськӧдчис сылы воча, коліс ӧд сувтӧдны найӧс, мед примитасны мера! Машинаыс дзурк сувтіс, кабинаысь чеччыштісны кык полицейскӧй.
— Мый нӧ, бабӧ, олӧмыд абу жаль?!
— Со! Кутӧй, кутӧй маньяксӧ! — горӧдісны ӧтпырйӧ кыкнан нывбабаыс. — Ичӧтик нывкатӧ кыскӧ кытчӧкӧ!
Полицейскӧйяс дыр эз кӧсйыны, котӧрӧн матыстчисны мужичӧй дорӧ: ӧтиыс швачкӧбтіс резина бедьнас нарушительыдлы да, буракӧ, эз омӧля, шатовмуніс преступникыд весиг. А мӧдыс крукӧдіс сійӧс да пӧрӧдіс кок йывсьыс, джуджыд гӧленя ботинкиа кокнас чорыда лойыштіс лым пиас да сідзи и кутіс. Сӧмын ойӧстны и удитіс гадыд, ӧти здукӧн кисӧ мыш саяс «курччис» наручник.
— Ті нӧ фашистъяс али мый? Прӧстӧ туй вывті мунысь мортсӧ босьтінныд да гартлінныд! — сьӧласигтырйи горӧдіс мужикыс.
— Вот-вот, сідзи сылы и колӧ! Яндысьтӧм синмыд ещӧ-й горзӧ! — Капитолина Васильевна орччаасис полицейскӧйяскӧд да зілис видзӧдлыны куйлысь преступниклы чужӧмас, гашкӧ, тӧдса? — Нӧйтӧй тайӧ немортсӧ, нӧйтӧй! Вайлӧй дубинкатӧ, ме сылы содтышта на!
Дерт, дубинка сылы мыйлакӧ эз сетны. Сэки ань дыр эз думайт, скӧрвывсьыд аслас крукыля бедьнас некымынысь колскис куйлысь мортыдлы юрас, но вывтіджык лоӧма да, беддьыс весиг чегис. Но медся ёна скӧраліс Жуля, лым вылын туплясьысь маньяклӧн дзик чужӧм бердас сибӧдчис да аслас вӧсни гӧлӧснас тявгӧ, ланьтлас, эрӧстас да выльысь уськӧдчас, быттьӧ дзик косявлыны кӧсйӧ.
— Ті свидетельяс? Ставсӧ аддзылінныд?
— Да, ми ставсӧ аддзылім, суседка со полицияӧ звӧнитіс.
— Ме весиг видео снимайті, ог тӧд сӧмын, кыдзи артмис, — содтыштіс Анна Сергеевна.
— Кывзӧй, ме некутшӧм абу маньяк! — горӧдіс мужикыс, кодӧс бура топӧдӧма ботинкиа кокнас патрульнӧйыс.
— Тэ эськӧ ланьт да! — куйлысьлы бара лӧсыштісны мышкас дубинкаӧн, и маньяк лӧнис, кывзысьысь морт вӧлӧма.
— Ті, пӧжалуйста, некытчӧ татысь энӧ мунӧй, вот-вот опергруппа воас, ковмас ӧд лоӧмторсӧ протоколируйтны.
— Недыртӧ олыштам, — ньылыдаліс Капитолина Васильевна.
Лым пиын чужъясьысь маньякӧс, коді пыр на кӧсйис мыйкӧ висьтавны, но некод сійӧс эз кывзы, сувтӧдісны кок йылӧ да пыртісны патрульнӧй машинаӧ.
Капитолина Васильевна удитіс на тшӧтш матыстчывны да кос кабырнас некымынысь сизьдыштіс преступниклы мышкас:
— На тэныд, на! Кутшӧм выйым! Кагаяс вылӧ усьласьӧ!
А сэні и журӧбтіс-воис мӧд полицейскӧй машина, сэтысь чеччис гражданскӧй паськӧма ар комын вита морт, сійӧ пыр жӧ петкӧдліс, коді тані медся ыджыдыс:
— Маньяксӧ кутӧма? Бур, молодечьяс! Свидетельяс танӧсь жӧ? — видзӧдліс Солодова да Колипова вылӧ. — А жертваыс кӧні?
Збыль, маньяк вӧлі, свидетельяс вӧліны, а нывкаыд абу, вошӧма кытчӧкӧ!
— Ті нӧ мый?! Кытчӧ видзӧдінныд?! Маньякыс кӧть наручника?
— Наручникалім, — полігтырйи довкнитісны юрнаныс шӧйӧвошӧм патрульнӧйяс.
— Сійӧ нин кӧть бур, — следователь пуксис машинаӧ кутӧм морткӧд орччӧн да югзьӧдіс пӧнарикӧн чужӧмсӧ. — Некор, буракӧ, эг паныдасьлӧй, тӧдтӧм. Ов, ним, вич? Адресыд? Гӧтырыд гортад? Кыдзи шуӧны? — юасигмозыс пыр жӧ пасъяліс блокнотӧ. — Паспортыд эм?
— Абу... Гортын сійӧ, камодын.
— Нуӧдӧй тайӧ маньяксӧ дежуркаӧ да сэтчӧ кольӧй, мед шойччыштас тас саяс, асьныд котӧрӧн бӧр татчӧ, колӧ нывкасӧ корсьны. Кужинныд кӧ воштыны, кужӧй и аддзыны!
Патрульнӧйяс пуксисны асланыс машинаӧ да гурӧдісны педофилӧс полицияӧ.
Матыстчисны нӧшта кык полицейскӧй: ӧтиыс формаа, вӧлӧма участкӧвӧй, мӧдыс форматӧм, код тӧдас коді сійӧ.
— Кывзӧй, ӧні локтасны патрульнӧйяс, — нарадитіс найӧс ыджыд чина полицейскӧйыс. — Накӧд тшӧтш колӧ корсьны жертвасӧ.
— Ме — следователь Лебедев, — шыӧдчис сійӧ аньяс дорӧ. — Кутшӧм вӧлі нывкаыс, помнитанныд?
— Ме ог и помнит, — нурбыльтіс Анна Сергеевна.
— Ыджыд-ӧ арлыдыс, кутшӧм паськӧмыс?
— Ме чайта, ар даса-дас кыка кымын, — лапйӧдлыштіс синнас Капитолина Васильевна. — А паськӧмыс? Быттьӧ тай сьӧд пальтоа вӧлі-а.
— Кутшӧм кӧма вӧлі, кутшӧм шапкаа? Эн жӧ казявлӧй?
— Эгӧ, зэв ӧдйӧ ставыс артмис да, — лэптыштліс пельпомсӧ Анна Сергеевна.
— Тротуарсӧ весалӧма, кок туйыс оз тӧдчы. Нывкаыс ног сертиыс олӧ кӧнкӧ тайӧ керкаясас, ылісянь сійӧ татчӧ эз лок. Вот медматысса керкасӧ босьтӧй да кытшовтӧй став патерасӧ, а оз кӧ сюр, орччаяссӧ.
— Да-а, — гыжйыштіс юрсӧ участкӧвӧй. — Вит судтаа керкаяс, быдын ветымын гӧгӧр патера...
— Тэ эн гыжъясь, а корсь! — вомаліс сійӧс Лебедев. — А то он и тӧдлы, йӧзыс узьны водаласны.
— Есть, майор ёрт, корсьны! — шмонитігмоз нюжӧдчыліс следователь водзын участкӧвӧй.
— Свидетельяс, кодныд ёнджыка тэрмасянныд? — юаліс майор.
— Мед нин Анна Сергеевна водзджык прӧстмас, сійӧ удж вывсянь на сӧмын да, а ме пенсия вылын, некытчӧ ог тэрмась, некод менӧ оз виччысь, верма и сёрӧнджык гортӧ локны.
— Сідзкӧ, Анна Сергеевна, пырӧй машинаас, пуксьӧй воддза пуклӧсас, а ті, Капитолина Васильевна, бӧрас.
Воисны патрульнӧйяс асланыс машинаӧн, и полицейскӧйяс разӧдчисны корсьны вошӧм нывкаӧс.
Следователь жӧ пуксис шопер пуклӧсӧ да звӧнитіс мобильник пырыс:
— Люба, слазь с дуба, тэ удж вылын на? Бур. Тані ме маньяк кузя выль делӧ шью, диктуйт меным номерсӧ. Но. Но. Гижышті. Аттьӧ, Любовь Вячеславовна, став бурсӧ, целую, — корсюрӧ Лебедев радейтіс шмонитыштны.
Судзӧдіс папкасьыс сӧстӧм бланок да босьтчис юасьны Колиповаӧс. Тэрмасьтӧг, стӧча медводз гижаліс Анна Сергеевналысь ним-вич-ов, чужан лунсӧ, адрессӧ, телефон номерсӧ, уджаланінсӧ, а сы бӧрын вуджис мыж вӧчӧмас, кыдзи ань локтӧ вӧлі удж вылысь, паныдасис Солодовакӧд да казяліс, мый тӧдтӧм мужик уськӧдчис ичӧтик нывка вылӧ да кӧсйис кытчӧкӧ кустъясӧ кыскыны.
Капитолина Васильевна пукаліс бӧрас, шыльӧдіс пидзӧс вылас нюжӧдчӧм Жуляӧс да мӧвпаліс ас кежас. Со ӧд кутшӧм уджыс полицияад, мыж вӧчысьястӧ корсьны сьӧкыд, мырсьыны лоӧ суткиясӧн, лун кӧть вой. Колипова со вит часын эштӧдіс уджсӧ и асылӧдзыс прӧст, некод сійӧс войнад узигкостіыд оз чукӧст, оз тшӧкты эновтны шоныд вольпасьтӧ. А погонаясыдлы некытчӧ воштысьнысӧ, быд здукӧ найӧс вермасны пальӧдны, и нинӧм он вӧч, чеччасны да котӧртасны служба вылӧ.
Лебедев эштӧдіс юасьӧмсӧ, свидетельницаӧс кырымӧдіс протоколас да шуис:
— Аттьӧ, Анна Сергеевна, ӧні верманныд мунны, но меным тіянкӧд аддзысьлыны на ковмас. Мыйкӧ кӧ нӧшта дум выланыд усяс, звӧнитлӧй тайӧ номер кузяыс, — и сетіс аньлы визитнӧй карточка. — Аддзысьлытӧдз!
Бергӧдчис Солодовалань:
— Капитолина Васильевна, а ӧні ті, пӧжалуйста, вуджӧй татчӧ, пуксьӧй мекӧд орччӧн, да некодӧн дӧсадитчытӧг кыкӧн варовитыштам, — и бара зэв дыр юасис аньлысь да ставсӧ гижис папка вылӧ вольсалӧм бланокӧ.
Помасьӧм бӧрас кырымӧдіс Солодоваӧс некымынлаӧ да шуис:
— Зэв ыджыд аттьӧ, Капитолина Васильевна, мый эн повзьӧй да отсалінныд миянлы кутны зэв ӧпаснӧй преступникӧс! Аддзысьлытӧдз, но коркӧ мӧдысь меным тіянкӧд ковмас на аддзӧдчывлыны. Вой нин со пуксьӧма, дзик пемыд, верма тіянӧс колльӧдны.
— Оз ков, лампаясыс ӧд ӧзйӧны, меным тані кык керка кост и муннысӧ, — ӧвтыштчис олӧма ань да понсӧ дом йылын нуӧдігмоз тапиктіс гортланьыс.
Георгий Васильевич звӧнитіс дежуркаӧ:
— Николай Сергеевич, тайӧ Лебедев. Свидетельницаяссӧ допроситі, уголовнӧй делӧсӧ пані. Ӧні ветлам участкӧвӧйыскӧд да оперыскӧд, преступникыслысь ош гусӧ гугӧдам.
— Коді сэні? — звӧнок вылӧ шыасис нывбаба гӧлӧс.
— Лариса Ивановна, тайӧ полиция, восьтӧй! — гораа вочавидзис Георгий Васильевич да ӧдзӧс шӧрӧ сувтӧдіс формаа участкӧвӧйӧс.
Лариса вель дыр видзӧдаліс площадка вылын сулалысь йӧзӧс, но век жӧ броткӧдчигтырйи восьтіс ӧдзӧссӧ.
— Мый нин вой улас кыскасянныд?
— Ковмис да, сы вӧсна и кыскасям, — прихожӧяс став локтысьыслӧн пырӧм бӧрын аньлӧн броткӧм вылӧ вочавидзис Лебедев. — Лариса Ивановна Трёпова?
— Да, — кӧзяйкалӧн тіраліс нин гӧлӧсыс. — Мый нӧ лоис, менӧ арестуйтны кӧсъянныд али мый?
— Миянӧс интересуйтӧ Степан Михайлович Игнатов. Сійӧ тані олӧ?
— Кык вежон сайын тай овмӧдчис-а, но пропискаыс сылӧн мӧдлаын. И сійӧ ӧні абу гортын.
— Ми тӧдам, мый Игнатов абу гортас, сійӧ ӧні полицияын.
— Аминьӧй, аминьӧй! Мый нӧ вӧчис?
— Сійӧс ми чайтам ыджыд мыж вӧчӧмӧн и локтім тіянӧ шобсьыны.
— Шобсьынытӧ колӧ прокурор санкция, — Трёповалы дум вылас усис кыськӧ кывлӧмтор.
— Со обыск вылӧ постановление, — мыччыліс Лебедев бумагатор, кодӧс Трёпова эз удит весиг лыддьыны, да бӧр дзебис папкаас.
Участкӧвӧй, опер да следователь пӧрччисны вылыс паськӧмсӧ, мед оз пӧсявны, понятӧйясӧн вӧліны Ларисалӧн суседъясыс, кокни паськӧмаӧсь да, налы пӧрччысьны эз ковмы. Лебедев тӧдмӧдіс Трёповаӧс да понятӧйясӧс налӧн правоясӧн да обязанносьтъясӧн, и заводитісны корсьысьны. Гугӧдісны кыкнан жырсӧ, кухнясӧ, ваннӧйсӧ.
— Висьталӧй кӧть, ен могысь, мый ті корсянныд? Колӧкӧ, ме тӧда, кӧні сійӧ, да ачым петкӧдла? — Лариса синвасӧ чышкалігтырйи вӧтлысьӧ патера кузя полицейскӧйяс бӧрся.
— Ми корсям уликаяс, — юасьӧм вылӧ дженьыда вочавидзаліс Лебедев.
— Кутшӧм сэтшӧм улика нӧ тіянлы колӧ?
А кыдзи вочавидзны, кор асьныс оз тӧдны, мый налы колӧ? Некор на эз паныдасьлыны маньякъясыдкӧд, сӧмын киноысь аддзывлісны, кыдзи тайӧ немортъясыс быд жертвалысь паметь вылӧ босьтӧны мыйкӧ улыс паськӧмсьыс.
Гурйысисны-гурйысисны, корсьысисны-корсьысисны, но сідз нинӧм эз и аддзыны. Документъясысь босьтісны сӧмын Игнатовлысь паспортсӧ. Лебедев дыр гижис шобсьӧм кузя протокол, кырымӧдаліс Ларисаӧс, понятӧйясӧс. Допроситіс Ларисаӧс, коді нинӧм лёксӧ Степан Михайлович йылысь висьтавны эз куж, кырымӧдіс. Та вылын и помасис шобсьӧмыс.
— Но кыдз, маньякыс менам оз шумит? — дежуркаӧ пыриг Сикоркин дорӧ шыӧдчис Лебедев.
— Торъя оз, гоз-мӧдысь сӧмын горӧдліс, лэдзӧй пӧ, ме абу маньяк!
— Кутшӧм йӧй нӧ асьсӧ ловъявывсьыс кутас гуавны?
— Шобсигад кутшӧмкӧ улика кӧть сюри?
— Эз, — веськодя ӧвтыштчис Лебедев.
— А гӧтырыс мый висьталіс?
— Мый сійӧ висьталас? Шемӧсасис сӧмын да кузяла бӧрдіс. Нуӧй маньяксӧ ИВС-ӧ. Куш камера сэні эм?
— Эм.
— Сэтчӧ и йӧршитӧй, мед ӧтнас гажтӧмтчыштас, сэні ӧд уна быдсяма велӧдысьыс пукалӧ да. Дас кыкӧд час нин со, гортӧ муна, кӧть шойччышта, тырмас сэсся ноксьыны. Босьталісны отдел тыр том нывъясӧс, найӧ пӧ дисциплинированнӧйӧсь, оз юны, а нывъясыд кыдз тай ӧтчукӧрӧн верӧс сайӧ да декретӧ петалісны! Кӧть караул горзы! Штатыс тыр, а уджавны некодлы! Коли сӧмын ӧтнас Гоша-Лебедь, через день на ремень! Муна!
— А маньяксӧ сідзи он и допросит?
— Аски, сійӧ некытчӧ оз пышйы. А тавой сэсся менӧ эн пальӧд, некутшӧм преступление эн регистрируйт! — чуньнас шмонитігмоз грӧзитіс следователь дежурнӧйлы да петіс.
РОВД-са начальник Пётр Андреевич Коюшев, кыдзи и век, кӧкъямыс час асылын вӧлі нин аслас кабинетын. Дежурнӧй Сикоркин тӧдмӧдіс сійӧс сутки чӧжӧн пасйӧм преступлениеясӧн да кутшӧм мераяс на кузя примитӧма. Медся ёна, дерт, Коюшевӧс чуймӧдіс да кыпӧдіс сылысь ловсӧ маньякӧс кутӧм. Бур, мый места вылас и тшапкисны, патрульнӧйясыд сэтчӧ лӧсялісны да.
Свидетельскӧй база эм, маньяк пӧжсьӧ ИВС-ын. Сӧмын ӧтитор эз кажитчы Пётр Андреевичлы: маньяклӧн жертваыс — ичӧтик нывкаыс — сідзи эз и сюр. Талун ковмас зэлӧдчывлыны да йӧзӧс мӧдӧдны матігӧгӧр керкаяссӧ став сьӧлӧмсяньыс «чышкавны», корсьны нывкасӧ. Мортыд ӧд абу ем, сюрас.
Тринькнитіс пызанвывса телефон. О, министр! Босьтіс трубкасӧ:
— Генерал ёрт, полковник Коюшев...
— Ладнӧ, эн докладывайт, — мургыштіс министр. — Тэ пӧ сэні тавой торйӧн бура уджалӧмыд, быдса маньякӧс кутӧмыд!
— Да, сідзи и эм, генерал ёрт.
— Уголовнӧй делӧ панӧма? Тырмымӧнъя свидетельскӧй базаыд? Маньяк, сідзкӧ, нар вылын? Следствие мунӧ? Коді следовательыс?
— Майор Лебедев, ыджыд опыта следователь, сюся делӧсӧ нуӧдӧ, некытчӧ мытшасьлытӧг судӧдз вайӧдас, свидетельяс эмӧсь — кык тӧлка нывбаба. Казялӧмаӧсь да, пыр жӧ звӧнитісны дежурнӧй юкӧнӧ, преступлениеыс вӧлӧма налӧн син водзын.
— Но бур. Колокольцев мекӧд йитчыліс... Москваӧдз нин йӧлӧгаыс воӧма, маньякӧс кутӧм — тайӧ абу шутка! Оз ӧд тай быд лун найӧ шедны. Гӧгӧрвоин? Ми преступникъясӧс кутавны кужам и вермам, но йӧзыслы петкӧдлыны ассьыным уджнымӧс огӧ кужӧй, тшӧкыда республикаса войтырыс нинӧм оз и тӧдны полиция служба йывсьыс. Тайӧ тырмытӧмторсӧ тшӧтш колӧ бырӧдны. Тэ, Коюшев, сійӧ свидетельницаястӧ ӧні жӧ отделад вайӧд, ӧкмыс часын тэ дорӧ воасны телевидениесянь репортаж вӧчны, ме накӧд сёрнитчи нин. Почёт грамотаяс лӧсьӧд свидетельницаяслы да патрульнӧйясыдлы. Тэнсьыд интервью, дерт, босьтасны, и аньясыслысь тшӧтш. Тэ абу параднӧй формаа? Жаль. Вӧлін кӧ параднӧя, орден-медальяса, торжественнӧйджык репортажыс эськӧ артмис. Но да ладнӧ, и сідз абу лёк. Йӧзыс ӧд аддзыласны телевизор пырыд татшӧм петкӧдчӧмтӧ, газетсьыд лыддясны, да полиция удж вылад видзӧдласыс бурланьӧ вежсьыштас. Шуасны, оз пӧ весь нянь сёйны полицияын, маньякӧс со кутӧмаӧсь! Миян республикаын петкӧдласны, сэсся, колӧкӧ, и страна пасьта разалас, «РЕН ТВ»-ад «Экстренный вызовас» кӧ сюйыштасны, тайӧ миян республикалы лоӧ зэв госа плюс. Та вылын ставыс, уджав, маньякыс мед судӧдзыс некутшӧм мытшӧдтӧг воас.
«Уп-п! Со, другӧ, кутшӧм тэрыб миян министрыд! Телевидениеыдкӧд нин сёрнитчӧма! Сійӧ кӧть бур, маньяк жертва йывсьыс эз кут юасьны, мый эськӧ сэки ме сылы и висьталі?» — синсӧ кабинет йиркланьыс кыпӧдліс Коюшев да пыр жӧ мӧдӧдіс дежурнӧй машинасӧ свидетельницаясла...
Капитолина Васильевна талун лӧсьӧдчис песласьыштны. Муртса удитіс ваннӧйын тэчны няйт кӧлуйсӧ машина-автоматӧ, триньӧбтіс звӧнок. Жуля чепӧсйис ӧдзӧс дорӧ да ёсь гӧлӧснас увтыштіс.
«Коді бара-й асывсяньыс дӧсадитчӧ-а?» — ань эновтіс ноксьӧмсӧ, видзӧдліс «глазокӧ» да чуймис: ичӧтик ӧшиньторйын тыдалісны кык полицейскӧй.
«А-а, тайӧ тӧрытъя маньяк кузяыд, буракӧ, — гӧгӧрвоис сійӧ да восьтіс ӧдзӧссӧ. — Бур, мый эг удит песласьнысӧ заводитны, кӧлуйсӧ машинаас тэчи, а эг на чуткы».
— Видза оланныд, Капитолина Васильевна! — мичаа нюмъялігтырйи шыасис ӧтиыс.
— Бур асыв, том йӧз!
— Капитолина Васильевна, кыдзкӧ эштӧдчылӧй, пӧжалуйста! Тӧрытъя делӧ кузяыд ветлам полицияӧ.
— Но-о, тӧрыт быттьӧкӧ ставсӧ нин висьталі да, следовательыд гижис, и кырымаси.
— Извинитӧй, пӧжалуйста, Капитолина Васильевна, но миян ӧд ӧти лунӧн делӧыд оз эшты. Ми машинаӧн локтім, нуам и бӧр ваям, тіянлы кок мудзтыны оз ковмы.
— Но, сідзкӧ, пасьтасьны тай лоӧ, машинаӧн кӧ ыджыд начальникӧс моз кутанныд новлӧдлыны.
— А пӧдругаыд, — бумагаӧ видзӧдліс полицейскӧй, — Анна Сергеевна Колипова, тіян весьтын олӧ? Сійӧс тшӧтш нуӧдлам.
— Сэні, сэні, сӧмын оз дзик весьтам, а орчча патераас.
Капитолина Васильевна уськӧдчис пасьтасьны. Колӧ на ӧд роч пинясьны, кӧть ӧд пинь ансӧ дойдӧ, пиньтӧм вомнад бур йӧз водзад яндзим петны. Видзӧдліс чашкаӧ, кытчӧ ва пытшкӧ пыр пуктылӧ мича еджыд пиньсӧ, да чуймис: чашкаыс вӧлі куш! Кытчӧ нӧ гантайтчӧма? Ӧтилаӧ видзӧдліс, мӧдлаӧ — некӧні абу! Корсис да корсис, медбӧрын гӧгӧрвоис рӧмпӧштанӧ видзӧдлыны да аддзис: вомас нин вӧлӧма! Но и паметь!
Погонаяс жӧ мӧдӧдчисны пос кузя вывлань, кайигас паныдасисны Анна Сергеевнакӧд, коді джӧм сувтіс, аддзис погона том молодечьястӧ да.
— Извинитӧй, пӧжалуйста, ті абу Анна Сергеевна Колипова? — юаліс ыджыдджык тушааыс.
— Ме и эм. А-а, ті тӧрытъя маньяк кузяыд?
— Да. Тшӧктісны тіянӧс полицияӧ вайӧдлыны.
— Но ме ӧд удж вылӧ сёрма.
— А ті звӧнитлӧй сэтчӧ да висьталӧй, мый полицейскӧйяс локтісны да арестуйтісны, — серӧктыштіс ичӧтджык тушааыс.
— Сідз кӧ висьтала, менӧ удж вылысь вӧтласны!
— Кыдз кӧсъянныд, сідзи и висьталӧй, а ми тіянлы пӧвестка гижыштам, мед оз накажитны.
— Сідзтӧ кӧ, ладнӧ, сӧмын мед оз ло дыр.
— Ми тіянӧс, татшӧм бур аньястӧ, ӧтарӧ и мӧдарӧ машинаӧн гурӧдам, — вомтырнаныс нюмъялісны аньлы том йӧзыд.
— Тэ, Жуля, лӧсьыда ов, ме регыд бӧр воа, — патерасьыс петігӧн ӧлӧдіс Капитолина Васильевна жугыльмӧм синма понсӧ, коді ӧдзӧс дорас бӧрдан колис.
Вайӧдісны полицияӧ, аньяслы ӧдзӧссӧ водзвыв восьталісны да пыртісны веськыда отделса начальник кабинетӧдз.
— Видза оланныд, мича аньяс! — вочааліс найӧс Пётр Андреевич, отсаліс пӧрччыны пальтонысӧ, ачыс ӧшліс гардеробӧ. Виччысьыштіс, мед гӧстяяс лӧсьӧдыштасны юрсинысӧ рӧмпӧштан водзын. — Чай? Кофе?
— Да быттьӧ тай оз на ков... — нюжӧдыштіс Капитолина Васильевна.
— Сідзкӧ, мунамӧй мекӧд, — Коюшев нуӧдіс аньясӧс кузь коридор кузя да восьтіс кутшӧмкӧ кабинет ӧдзӧс.
Пырисны, а сійӧ вӧлӧма абу кабинет, а полицейскӧйӧн тыр ыджыд зал. Ставныс налы нюмъялӧны, ки воча ки гораа шлопӧдӧны, югыд лампаяс синтӧ ёрӧны, видео гижӧны, фотоаппаратӧн снимайтӧны. Кык том полицейскӧй паськыд дӧрапас дорын автоматӧн сулалӧны да оз весиг нюмдыны.
Вӧтын моз олӧма ань помнитӧ, кыдзи видеокамера водзын полицияса начальник наградитіс кыкнаннысӧ почёт грамотаӧн, топӧдліс кинысӧ, аттьӧаліс маньякӧс кутігӧн полициялы отсасьӧмысь. А Капитолина Васильевналы таысь кындзи содтӧд козьналісны крукыля выль бедь, тайӧ пӧ маньяк юрӧ чегӧм пыддиыс. Кутшӧмкӧ зон, дерт, кӧнкӧ, репортёр, кыкнанныслысь интервью босьтіс, мыйкӧ юасис, кыдзкӧ тай вочавидзалісны жӧ-а.
Гортас сӧмын, кор Капитолина Васильевнаӧс ӧдзӧс дорӧдзыс колльӧдысь полицейскӧй бӧрын шлочнитчис томаныс, ань быттьӧ ас садяс воис. Пӧрччысьтӧг и пырис пыді жыръяс да шлапкысис диван вылӧ. Сэки и думыштіс: «Мый нӧ тайӧ вӧлі? Гашкӧ, ме ставсӧ вӧталі?». Но киас грамотаыд да крукыля выль беддьыд эскӧдісны: ань эз узь, а тайӧ асывнас сійӧ збыль вӧлі полицияын, да сійӧс сэні зэв паськыда нимӧдісны, ошкисны, видеоӧ снимайтісны. А снимайтісны мый могысь? Дерт, кӧнкӧ, телевизор пыр петкӧдласны. Ковмас, сідзкӧ, Сыктывкар петкӧдчан кадас гортын пукавны да кыйӧдны, кыдзи сёрнисӧ лӧсьӧдӧмаӧсь телевизионщикъясыд.
Тайӧ лунас Капитолина Васильевна Сыктывкарса став программасӧ видзӧдіс помсянь помӧдз, но маньякӧс кутӧм йылысь весиг эз гарыштлыны. Колӧкӧ, эз на удитны ставсӧ лючки-бура лӧсьӧдны, сэні ӧд ёна на ковмас уджавны: кыткӧ чинтыны, кытчӧкӧ мыйкӧ содтыштны, мед лӧсьыд кино кодь артмас. Да и республикаад сы кындзи уна на бур йӧзыс, кодъяс йылысь «ящик» пырыд став коми войтырыслы колӧ паськыда висьтавны, тшук, петкӧдлӧм вылас ӧчередын сулалӧны. Аски ли, аскомысь ли, коркӧ ӧд петкӧдласны. Да кӧть и оз, грамотаыс тай киас, мый сэсся колӧ?
Мӧд лунас ань бара на лунтыр кыйӧдчис телевизор водзын, весиг Жулякӧд гуляйтыштны эз петав. Но абу весьшӧрӧ, вӧлӧмкӧ, пукавсьӧма! Петкӧдлісны жӧ сійӧс медбӧрын, убӧлитісны! Но шӧр геройяснас мыйлакӧ лоины полицияса уджалысьяс. Мича нывка, тшук, тележурналист, пукаліс полицейскӧйяслы паныдӧн. На пӧвстысь кыксӧ Капитолина Васильевна тӧдіс нин: тайӧ вӧліны следователь Лебедев да полицияса начальник Коюшев, а коймӧдыс — дзик тӧдтӧм, некор на сыкӧд эз паныдасьлы, вӧлӧма ачыс министрыс. Вот тайӧ да! Нылыс юасис полиция удж йылысь, а министрыс да полицияса начальникыс вочавидзисны сылы. Медся дыр, дерт, министрыс сёрнитіс: ёна и ошйысис, быдсяма лыдпаснас телевизор видзӧдысьясӧс тӧдмӧдіс. А помас содтіс, мый тайӧ лунъясӧ кутӧмаӧсь маньяк-педофилӧс.
Сэки бура дыр кежлӧ кывсӧ сетлісны и Коюшевыслы, сылӧн отделса патрульнӧйяс ӧд маньяксӧ кутісны. Сёрни помас нин сійӧ индіс Лебедев вылӧ, тайӧ следовательыс пӧ уголовнӧй делӧсӧ нуӧдӧ. Георгий Васильевич кыв-мӧд шуис аслас удж кузя да содтіс, мый полицейскӧйяс мырсьӧны лун и вой, спокойсӧ оз тӧдлыны, но налысь уджсӧ ёна кокньӧдӧны прамӧй йӧз, кодъяс мыж вӧчӧм казялігӧн оз вермыны мунны бокиті. Со и маньяксӧ кутны вермисны сӧмын сы вӧсна, мый педофил паныдасьӧма кык бур анькӧд. Найӧ эз повзьыны, звӧнитісны полицияӧ, водзмӧстчисны следствие нуӧдігӧн, а таысь найӧс наградитісны почёт грамотаясӧн. Лебедевыс висьталіс аньяслысь нимъяссӧ да, вӧлисти петкӧдлісны суседкаясӧс. Эз кажитчы Капитолина Васильевналы, кыдзи сійӧ зэв полӧмпырысь асьсӧ кутіс наградитігас, бокисяньыд ӧд ставыс лӧсьыда тыдалӧ. Анна Сергеевна жӧ эзджык сэтшӧм ёна мӧмъяв камера водзад.
Уджтас помланьыс нин журналисткаыс юаліс, мыйла пӧ грамота кындзиыс Солодоваыслы тшӧтш сетісны крукыля бедьсӧ? Сэки куимнан полицейскӧйыс серӧктісны, а Лебедевыс висьталіс, кыдзи Капитолина Васильевна аслас беддьӧн нӧйтӧма преступниксӧ, да сідзи, весиг беддьыс чегӧма. Вот сылы и козьналісны выльӧс, мед вевттьыны аньлысь воштӧмсӧ. И бара ставныс ёна гигзисны. Уджтассӧ сигӧртігӧн нылыс медбӧрти бура уна шоныд кыв шуис Солодова да Колипова йылысь да эскӧдіс, мый аньяс и водзӧ кутасны отсасьны полициялы налӧн сьӧкыд удж-мырсьӧмын.
Муртса помасис петкӧдчӧмыс, Капитолина Васильевналӧн триньӧбтіс мобильникыс. Звӧнитіс нывъёртыс, кодкӧд уна во ӧтлаын мырсисны вурсян мастерскӧйын. Зэв рад лоӧма мортыд, аддзылӧма телевизор пыр петкӧдлӧмтӧ да. Вель дыр варовитісны аньяс. Муртса дугӧдчисны сёрнитнысӧ, бара нин триньгӧны. И тадзи рытывбыд, звӧнитчисны весиг найӧ, кодъяскӧд йитӧдыс важӧн нин орӧма.
Быдӧнлы окота лоӧма чолӧмавны олӧма аньӧс почёт грамотаӧн наградитӧмӧн. Та дырйи ставныс чуймалісны, кутшӧм ыджыд сьӧлӧма вӧлӧма Капитолина Васильевна, лысьтӧма беддьӧн маньяксӧ нӧйтны! И быдӧнлӧн ӧти пӧлӧс сёрни: «Видзӧді! Аддзылі! Молодеч! Мӧдысь кызджык бедь босьт!». Кыдзи пенсия вылас петіс, асьсӧ ань кутіс кывны ӧтдортӧмаӧн, чайтсис, сійӧ Жулялы кындзи некодлы оз ков, а, вӧлӧмкӧ, аттӧ на и колана, абу на вунӧдӧмаӧсь! Со кымынӧн звӧнитчисны, телевизор пырыд аддзылісны да. Сьӧлӧм вылас зэв кыпыд лои, нюмъялігтырйи узьнысӧ и водіс, важӧн нин мортыдлӧн лов вылас татшӧм кыпыдыс эз вӧв...
Степан Михайлович Игнатов, нелямын сизим арӧса морт, механическӧй заводса мастер, черӧбтіс да садьмис. Тӧвся асыв. Занавес костӧд жырсӧ визьӧн-визьӧн уна пельӧ юковтӧны зэвтӧм вӧсни шӧрт кодь ывлавывса лампа югӧръяс. Крӧватьыслы паныдӧн стенын ӧшалан гӧрд цифраяса часі петкӧдлӧ вит час да джын. Да, пальӧдчан кад, тырмас узьны. Но патераын лӧнь, некод на оз и думайт вӧрӧшитчыны. Аслыс ковмас медводз чеччыны. Надзӧникӧн кыпӧдчис шоныд вольпассьыс, кӧні лышкыда паськӧдчӧма Лариса. Степан Михайловичлы кольӧма сӧмын коймӧд пайыс, кыдзи бара-й войнас джоджас эз грымгысь-а?
Гӧтыр дорас велавсьӧма мортыдлӧн асывнас топыда сёйны, мед удж вылын кынӧмыс оз гуръяв, а тані, выль гортад, олӧмыс дзик мӧд.
Рытнас Лариса шляпкысяс креслӧӧ телевизор водзӧ да бутербродӧн чай юигмоз кутшӧмкӧ сериалъяс сёр войӧдз видзӧдӧ, та вӧсна сылы асывнас садьмӧдчынытӧ сьӧкыд. Пыктавмӧныс вольпасяс туплясяс, а бӧрти чепӧсъяс кӧинӧн повзьӧдӧм кӧч моз, котӧрӧн пасьтасяс-кӧмасяс, рӧмпӧштан водзын ылӧсас мавтчыштас, вомас бутерброд тойыштас да рӧмидзтігтырйи удж вылӧ шелӧтитас. Челядьыслы нинӧм жӧ оз лӧсьӧд, сӧмын ӧдзӧсӧд петігас чӧвтас налы: «Тіянӧс школаад вердасны». Мыйлакӧ куш бутербродъяс и сёйӧ, а оз тшӧг, тайӧ чуймӧдӧ Степан Михайловичӧс.
Важ гортас олігӧн Наташа гӧтырыс кыа петӧмсянь кӧть эз жӧ уськӧдчыв пусьыны, но рытсяньыс аски кежлӧ лӧсьӧдчӧ: жаритчӧ-паритчӧ, асывнас микроволновкаӧ минут-мӧд кежлӧ тарелкаястӧ сюйлас, и пӧсь сёян пызан вылын виччысьӧ нин удж вылӧ тэрмасьысьясӧс. Став семьяӧн ӧтлаын пызан сайӧ пуксьыласны да пӧт кынӧмӧн разӧдчасны рытӧдзыс: кодлӧнкӧ служба, а кодлӧнкӧ школа. Некор эз вӧвлы, мед Степан Михайлович асывнас гортсьыс петаліс тшыгйӧн, э-эз! Гашкӧ, та вӧсна важ гортыс век сылӧн дум вылас.
Велалӧмвывсьыд ӧні сійӧ кыпӧдчӧ мукӧдсьыс водзджык да лӧсьӧдӧ сёян, сӧмын аслыс! Сыӧдз велалӧмаӧсь выль гортас татшӧм шогмытӧм оласногад, да вежны сійӧс Игнатов нинӧмысь оз вермы, быть ковмас сьывны на ногӧн жӧ. Кӧсйыліс эськӧ первойсӧ бурӧн сёрнитчыны, мед заводитны овны сідзи, кыдзи велалӧма важинас, но мортыдлысь шуӧмсӧ быттьӧ некод эз кыв: сёрниыс резина мач моз джуджыд стенӧ люкасис да бӧр муӧ брункнитіс. Ӧдйӧ индісны сылы местасӧ, пыр жӧ гӧгӧрвоис: тані сійӧ абу некутшӧм кӧзяин, а сӧмын патерант, и некор сійӧ кӧзяинӧдзыс оз быдмы, кӧть кымын во олас.
Игнатовлӧн важ гортас моз Ларисалӧн тшӧтш ныла-пиа. Видліс велӧдны найӧс, мед гортас отсасясны, ӧттор-мӧдторйӧ асьныс нырасясны, да Лариса вомаліс мужикӧс: «Тэ менам челядь дорӧ эн кутчысь, найӧс ачым велӧда!». А найӧ кыкнанныс Степан Михайлович вылӧ бугжылясьӧны народлӧн враг вылӧ моз, кыв ни джын оз шулыны, вочаасигас сюръя моз кытшлалӧны.
Олӧм гугасьӧмыс заводитчис код юрӧн, садь-бур вылысь кӧ, татшӧмыс некор эз ло. Сідзсӧ эськӧ Степан Михайлович гежӧда румкаыдкӧд окасьлӧ, но артмис тай. Февраль кызь коймӧд лунлы паныда рытӧ удж бӧрын заводын чукӧртчисны корпоратив вылӧ. Аски ӧд праздник, некытчӧ он воштысь! Тайӧ лунсӧ странаса став айловыс пасйӧ: и армияын служитлӧмыс, и служитлытӧмыс тшӧтш. Степан Михайловичлы жӧ, коді звӧноксянь звӧнокӧдз честнӧя трубитіс саридзса пехотаын, некод оз лысьт шуны, мый праздникыс абу сылӧн. Удж вылас ӧд весиг подпольнӧй кличкаыс Морпех.
Тыра пызан сайын вель уна тост вӧлі висьталӧма, бӧрынджык и тосттӧгыс на абу этша дзибыртӧма да, водкаыд кизьӧрмӧдіс вирсӧ и кольмӧдіс юрсӧ. Орӧдчыліс закускаясысь чӧвтлыны синсӧ пель чунӧдана шылад улын вежнясьысьяс вылӧ да, пыр жӧ син улас усисны Ларисаыслӧн векни платтьӧӧн зэвтӧм юрлӧс кодь пушыд бекъясыс, дай вежыс петіс шоммӧм юра мужикыдлӧн. А лӧсьыда сідзсӧ аньыс бринькъялӧ! Том кӧбылалӧн кодь зумыд кокыс кокниа кыпталӧ, оз, буракӧ, пидзӧсыс Наташалӧн моз поводдя вежсьӧм водзад юкав. Лариса жӧ, код дорысь кык во сайын дезертируйтіс верӧсыс, казявтӧг эз ов Морпехлысь снайпер моз сылань метитчӧмсӧ, да нӧшта на чожаджык ӧдӧбтіс лешйысьнысӧ, кокыс брунган шылад улад сідзи и лэбалӧ!..
Кыдзи помасис корпоративыс, дзикӧдз коддзӧм Степан Михайлович оз нин лӧсьыдасӧ помнит, но асывнас мортыд паляліс Лариса патераын. Таӧдз найӧ, дерт, вӧліны кӧть тӧдсаясӧн, но зэв ылыссаясӧн, гежӧдика паныдасьлігӧн сӧмын юрнас гогнитлывлісны-чолӧмасьлісны, он ӧд кут мӧдарӧ бергӧдчӧмӧн боктіыс тэрмасьӧмӧн ордйӧдны. Кыдзкӧ абу лӧсьыд, вермас думыштны, кутшӧм пӧ тайӧ мужикыс абу культурнӧй, весиг оз чолӧмась.
И со корпоративбӧрся асывнас синсӧ муртса чашкӧдіс, аддзис Ларисалысь чужӧмсӧ. Медводз думыштчис: тшук, юрыс тӧрытъя вывті ёна даръясьӧм бӧрад висьӧ, да каститчӧ нин кӧ-а? Топыда-топыда куньліс синсӧ да выльысь восьтіс, но кинокадрыс эз вежсьы, бара сыкӧд орччӧн гӧтыр пыддиыс Лариса нюжӧдчӧма. Вот тайӧ да! Со кыдзи снайперыд «дасад» веськалӧма! Ӧні колӧ ӧдйӧджык татысь весасьны, кытчӧдз эз йӧзась! Гусьӧникӧн кӧсйис эновтны вольпасьсӧ, мед Лариса оз садьмы, но он на тай вош, важ крӧвать сімӧм пружинаыд горасьыс-гораа дзуртыштіс, и нывбаба восьтіс синсӧ.
— Мый нӧ, пышйыны кӧсъян, повзин? А тӧрыт тай нӧ зэв збой вӧлін!
— Повзьыны эськӧ эг повзьы да, абу ӧд тэ домйыв скӧр пон, он курччась, — джын гӧлӧсӧн нурбыльтіс воча.
— Мый нӧ сэн вашкӧдчан? Некод оз кыв, тӧрыт челядьӧс мамӧ ордӧ узьны мӧдӧді, гашкӧ, мися, корпоратив бӧрад дырджык локтӧмыс оз ло да. Мед лӧсьыда шойччасны.
— А-а, но муннысӧ быть ӧдйӧджык колӧ, мед тэ йылысь лёк сёрни оз кыпты.
— Сэтшӧм сёрнияссьыд важӧн нин ог пов, мыйсӧ ӧд сӧмын ме йылысь эз лӧсьӧдлыны пиньтӧм вома пӧрысь выжывъясыд, — паськыда очсыштіс Лариса.
— Но, ачыд кӧ он пов, менам сьӧлӧм тэ понда оз жӧ майшась, сӧмын вот юрӧй жугалӧ-висьӧ. Лекарствотор тэнад оз сюр?
— Видзӧдлы холодильниксьыс, сэні вӧлыштіс.
Степан Михайлович кӧмтӧм кокнас шлёпӧдіс кухняӧ да восьтіс роч кӧзӧдсӧ, кӧні ӧдзӧс джаджъяс збыль сулаліс джынвыйӧ тыра чекушка.
— Лариса, тэ ачыд юыштан али он? Тані доз джын сюри.
— Меным оз ков, ачыд нин ырснит.
— Но, ме, сідзкӧ, тайӧ добрасӧ курала.
Кисьтіс нелямын градуса микстурасӧ стӧканӧ да дыр думайттӧг дзимбыртіс, организмыс эз бӧрыньт. Кокньӧдіс. Но, сэсся колӧ и гортӧ веськӧдчыны, гӧститыштіс, слабог, колӧ и чесьт тӧдны.
— Лариса, мыйкӧ ог аддзы шапкаӧс да пальтоӧс, ме кытчӧ тӧрыт пӧрччыси?
— Кысь ме тӧда? Тшук, сэні ӧдзӧс дорас, — вольпассяньыс чӧвтіс нывбаба.
Збыль, ёна бусӧссьӧм пальтоыс куйліс порог дорас, сы вылын дона анча шапка пытшкас туплясис ботинкиыс. Со ӧд, садь юрнад зэв ёна видзис паськӧмсӧ няйтчӧмысь, а коддзис да, ставыс веськодь, кок улас и шыблавсьӧма. Ышловзис, пуксис улӧс вылӧ, кӧмасис, пыркӧдіс няйт-буссӧ пальтосьыс, шапкасьыс да пасьтасис.
— Лариса! Ме муні!
— Бур туй! Гӧтырыд кӧ вӧтлас, верман ме дорӧ локны, примитла недыр кежлӧ, пятизвёздочнӧй отельыс менам век восьса, всё включено! — ӧдзӧс сиптігас нин воисны Степан Михайлович пельӧдз Ларисалӧн серамсора кывъясыс. — Ха-ха-ха!
Гортас гӧтырыс буретш гладитчис кузь пызан дорын, босьтыштіс вомас стӧканысь ва, скӧрысь пызйыштіс нылыслӧн школьнӧй платтьӧ вылӧ и бара мӧдіс тэрыба бӧрӧ-водзӧ нирсйӧдлыны югъялан пӧсь утюгсӧ.
— Мый нӧ сэтшӧм водз? Мед ӧд гуляйтыштін на! — Наталья Васильевна синкым увтіыс видзӧдліс верӧс вылас.
— Праздник ӧд, буракӧ. Удж вылын мужик чукӧр пасйим, вот и сёрмӧдчи, — чӧвтіс веськодямоз Наташа вылӧ видзӧдтӧг.
— И мый? Ни ӧти нывбаба весиг эз вӧв?
— Душ-мӧдӧн вӧліны жӧ, но меным ӧд найӧ веськодьӧсь, матысса ёртъяскӧд миян асланым котыр, накӧд и пукалі.
— А сэсся? Асылӧдзыс юинныд? Вахтёрыд эз вӧтлы?
— Кутшӧм вахтёр нӧ лысьтас уджалысь войтыр вылӧ гӧлӧс лэптыны!
— Кӧнкӧ ӧд узьыштін жӧ войбыднад? Али пызан улас сунгысин да няйт джоджас и коллялін войсӧ? И абу яндзим ветымын арӧсӧ матысмигад усьмӧныд сакны?!
— Неуна эськӧ сьӧлӧм вылын абу жӧ лӧсьыд да, но нинӧм, коді аддзыліс менӧ тӧрыт, недыр мысти вунӧдасны.
— Ӧні заводсяньыд и локтін?
— Да, заводсянь.
— А меным бур йӧз звӧнитлісны да шӧпнитісны, тэ пӧ войсӧ коллялін эн заводад, а Лариса Трёпова ордын. Мый та вылӧ шуан?!
Со ӧд, кодкӧ удитӧма нин брадзнитны, бабаяссьыд нинӧм он дзеб!
— Тӧдан кӧ, мый сэсся юасян?! Да, ме Лариса патераын узи, кӧть весиг ог помнит, кыдзи сы дорӧ веськалі!
Мый та бӧрти заводитчис! Гозъя сувтісны ныр воча ныр да, гашкӧ, час чӧж горасьыс-гораа пинясисны. Эз весиг мӧвпыштлыны ныла-пиа йывсьыс, кодъяс важӧн нин эз узьны, да быд кыв на пельӧдз воис. Орчча патераясын олысь суседъяс, дерт, телевизоръяссӧ кусӧдалісны да татшӧм спектакльыдлы ки пыдӧс ӧзйымӧныс став сьӧлӧмсяньныс аплодируйтісны. А кысь нӧ?! Йӧз син водзын Степан да Наташа пыр вӧліны идеальнӧй семьяӧн, а ӧні со мый керсьӧны! Колӧкӧ, и юксьӧмӧдз воасны? Колӧ помӧдзыс артисталӧмсӧ видзӧдны, со кутшӧм талантливӧя ворсӧны да! Дзик быттьӧ збыльысь скӧрмӧмаӧсь мӧда-мӧд вылас.
Бӧръя актас Наташа пыраліс гозъялӧн узьлан жырйӧ да петкӧдіс верӧсыслысь чемодансӧ:
— Со тэнад кӧлуйыд, ме лӧсьӧді нин, а со ӧдзӧсыс! Мед дукыд тані эз вӧв, гӧгӧрвоин?! Весась аслад мича Лариса дорад, сэтшӧма кӧ нин сійӧ тэныд кажитчис!
— И муна! Кута тай тэкӧд, кыз брунькӧд, мучитчыны! Со ӧд кутшӧм некытчӧ шогмытӧм гӧтыр вӧлӧма, а ме сійӧс анделӧс моз радейті, лелькуйті, быд праздник козин ньӧбалі, ки вылын эськӧ новлӧдлі, верми кӧ лэптыны! Всё! Талунсянь ме тэныд абу верӧс, тэ меным абу гӧтыр! Муна, дзикӧдз муна, бӧрсӧ ог лок, эн виччысь! Меным бабаыд сюрас, сӧмын чуньӧн легнита, дасӧн ӧшӧдчасны, а тэ вылӧ ни ӧти гача весиг оз видзӧдлы!
— Важӧн нин мед мунін! Тэнад мисьтӧм чужӧмыд вот татчӧдз нин дӧнзьӧдіс, — Наташа нуӧдіс кинас голя бердӧдыс. — Мужикӧн шусян, сямыд весиг стенӧ кӧрт тув тувъявны абу!
— Тэкӧд, татшӧм страминакӧд, овны ог жӧ кут, эновта! Бур кыв тэсянь некор эг жӧ кывлы-а! Машинаӧс сӧмын босьта, патераӧс челядьлы коля! — ӧдзӧссӧ чорыда крапкӧмӧн Степан Михайлович петіс гортсьыс.
Гир-гор лэччис пос кузя да петіс подъездысь.
— Ассьыд добратӧ вунӧдін! — кыліс балконсянь Наташалӧн горӧдӧм, и витӧд судтасянь вылӧ лэптылӧмӧн ляскӧм ноутбукыс пазьнитчис верӧсыс водзын лымсьыс кушӧдз весалӧм асфальт вылас.
— Вот урӧдыд! Сэні ӧд менам сы мында бур мӧвп вӧлі сюйӧма! А ӧні ставыс вошис, — тӧкӧтьӧ эз бӧрддзы Степан Михайлович. — Оз этша ковмы мырсьыны, мед бӧр найӧс чукӧртны.
Кыпӧдіс гырысьджык торъяссӧ да шыбитіс ёг лӧдан контейнерӧ.
Лариса радпырысь восьтіс патера ӧдзӧссӧ да шоныда нюммуніс Степан Михайловичлы:
— Локтін? Кыдз тай ме шулі, сідзи и лои. И дыр кежлӧ?
— Кытчӧдз оз дышӧд, — воча мырдӧн-сорӧн пӧлӧса нюмъёвтіс Игнатов да воськовтіс порог вомӧн, кӧлуй тыра чемоданӧн пырис выль гортас.
Колӧ шуны, хрущёвка керкаын кык жыръя патераыс Ларисалӧн вӧлі дзик важ гортас кодь: ӧти жырйын узьлісны челядьыс, мӧдын — кӧзяйкаыс. Ӧнісянь татчӧ жӧ ковмас овмӧдчыны и Степан Михайловичлы.
Кӧть ыджыд шыӧн да гора зыкӧн сійӧ эновтіс гӧтырсӧ да челядьсӧ, но сьӧлӧм вылас абу лӧсьыд... Веськыда кӧ шуны, лёк, мӧвпъясыс гудырӧсь. Уна вонад велавсьӧма гӧтырыскӧд да челядьыскӧд ӧти котырын гудрасьнытӧ, а ӧні ковмас дзик мӧд пӧлӧс йӧзкӧд лӧсьӧдны выль олӧм: тані ӧд тэ абу кӧзяин, а, рочӧн кӧ, примак. Ас семьяад шуӧмыд пыр вӧлі законӧн, тэнӧ сэні пыдди пуктісны, гӧтырыд и челядьыд вӧчлісны сідзи, кыдз тшӧктылін. А кыдзи тані лоас? Кыдзи сійӧс примитасны Ларисалӧн челядьыс?
Да, ӧти лунӧн пазаліс семьяыс, гугасис уна во чӧжӧн нэм кежлӧ тэчлӧм олӧмыс. Но нинӧм, ог кутӧй шогсьыны, выльысь ставсӧ лӧсьӧдам! Лариса со кутшӧм мича, гӧгрӧсіник чужӧма, орӧм коска, сыкӧд Игнатовлы оз ло гажтӧм!
Праздник бӧрын Степан Михайловичкӧд ӧти бригадаын уджалысьяс видзӧдісны сы вылӧ чуймӧмӧн, быттьӧ паныдасисны выль морткӧд, коді медводдзаысь на петіс накӧд ӧти сменаӧ, и быдӧн кӧсйис тӧдмавны, мый жӧ ӧні позьӧ Игнатовсянь виччысьны? Со, другӧ, кык лун на коли Наташакӧд торйӧдчӧмсянь, а дзоньнас бригадаыс та йылысь тӧдмалӧма нин. Кӧнкӧ, и «Одноклассникиын», и «ВКонтактеын» сӧмын та йылысь и сёрниыс. Дерт, томджыкъяс пӧвстысь некод эз матыстчыв Степан Михайлович дорӧ веськыда юавны семьякостса бужӧд йывсьыс. Сӧмын Егор Фёдорович Коротаев, либӧ прӧстӧ Фёдорыч, кодкӧд армияын служитӧм бӧрын тшӧтш пырисны заводас да вӧліны медматысса ёртъясӧн, сувтӧдліс Игнатовӧс ӧдзӧс дорас да синсӧ ёсьмӧдӧмӧн гусьӧникӧн вашнитіс:
— Тэ мый, збыльысь гӧтыртӧ эсійӧ Трёпова вылас вежин?
— Да, — дӧзмӧмпырысь вочавидзис Игнатов.
— Дерт, аслад делӧ, но, ме думысь, нинӧм бурыс тэнӧ Ларисаыдкӧд оз виччысь! Вермас лоны, и Наташа дорад на бӧр ковмас вӧзйысьны, — и Фёдорыч вешйис, эновтіс ёртсӧ.
Пажынӧдзыс на, кор Степан Михайлович нуӧдіс ас ёртъясыскӧд удж йылысь сёрни, на дорӧ нем виччысьтӧг пырис Лариса. Матыстчис Игнатов дорӧ, кутыштліс сійӧс, чупнитіс-окыштіс бан бокас и ставныслы кывмӧн гораа шыасис:
— Стёпа, колӧ мыйсюрӧ ньӧбыштны, вай меным картатӧ, — и нюжӧдіс кисӧ.
Игнатовӧс быттьӧ жар пывсянын йиа ваӧн койыштісны, арся пипу кор моз гӧрдӧдіс да сідзи и кынмис калькӧдӧм вомӧн. Тадзи эз жӧ ков вӧчны Ларисаыслы бур йӧз водзас! Мӧмъялыштіс-мӧмъялыштіс, да медбӧрын кыв-ворыс петіс жӧ:
— М-мый нӧ кӧсъян ньӧбны?
— Сёян-юан да мукӧд поснитор, быд лун ӧд тай пызан вылад мыйкӧ пуктыны колӧ. Но вай нин зіля, ог эшты, измин сэні! Дыр на киӧс нюжӧдӧмӧн сулавны тан кута?
— На, — ковмис мыччыны Степан Михайловичлы картасӧ, мед мынтӧдчыны сыысь.
— Важӧн нин мед тадзи, — зэв дӧвӧля юмыртліс вомсӧ Лариса да пыр жӧ вошис цехысь.
— Пажынӧдзыс вай бӧр, а то столӧвӧяд менӧ оз вердны! — бӧрсяньыс удитіс горӧдны Игнатов.
Степан Михайлович кутчысис орӧдлӧм сёрниӧ, кӧсйис петкӧдлыны, быттьӧ нинӧм сэтшӧмыс эз ло, кӧть пытшкас мортыдлӧн пуӧмӧн пуис. Наташалӧн мода эз вӧв волывлыны сы дорӧ удж вылас, а Лариса со медводдза лунсяньыс кутіс петкӧдлыны асьсӧ сы вылын ыджыдӧн, быттьӧ генерал прӧстӧй салдат водзын. Да ӧд став бригада водзас мастер мортӧс тадзи увтыртіс! Юръяндзим!
Тайӧ юксьӧмнас Игнатовлӧн авторитетыс дзикӧдз усис, а водзті ӧд и заводса директор, и шӧр инженер пыр вайӧдлісны сійӧс пример пыдди. Со пӧ Степан Михайлович и гортас, и удж вылын кужӧ асьсӧ кутны, ставыс сылӧн пыр лючки-ладнӧ. А ӧні мый кутасны шуны? Мда-а!
Кык вежон колис Степан Михайловичлӧн выль оланінӧ вуджӧмсянь да, удж бӧрас картасьыс сьӧм босьтыштіс и важ гортсяньыс неылӧ лӧсьӧдчис, мед паныдасьны Наташакӧд. Со локтӧ воча вӧвлӧм гӧтырыс, кыдзи и век, прӧстӧя пасьтасьӧма. Игнатовлы кажитчис, быттьӧ Наташа омӧльтчыштӧма весиг. Казяліс Степанӧс, сувтовкерис, тыдалӧ, думыштчис, кежны бокӧ али ордйӧдны, быттьӧ эз тӧд. Но Степан Михайлович потшис сылы туйсӧ:
— Бур рыт, Наташа!
Нинӧм вочавидзтӧг гӧтырыс сувтіс да видзӧдліс верӧсыслы синмас, виччысис, мый нин тайӧ коркӧ сыӧн радейтана мортыслы ковмӧма сысянь?
— На, неуна сьӧмтор лӧсьӧді, челядьыдлы мыйсюрӧ ньӧбыштан, — нюжӧдіс бумага купюраяс.
—Оз ков, тэтӧг нин асьным кыдзкӧ бергӧдчам, — ӧвтыштчис ань да тэрмасьӧмӧн боктіыс ордйӧдіс Игнатовӧс, сӧмын сапожки улас лымйыс дзуртыштіс. — Ларисатӧ верд!
— Наташа, ме ӧд став сьӧлӧмсянь отсыштны кӧсъя! — бергӧдчыліс на ылыстчысь гӧтырыслань, но мӧдыс быттьӧ эз и кывлы.
«Ладнӧ, кыйӧдла час челядьӧс, найӧ кружокъяс бӧрын ӧні гортас локтавны кутасны», — мӧвпыштіс Степан Михайлович, чышкыштіс бӧра лабич вылысь лымсӧ да пуксис. Лэптіс пальто воротниксӧ, мед чужӧмыс оз тыдав, да кутіс виччысьны. Но тані, другӧ, дыр шляпвидзнытӧ он вермы: абу ӧд гожӧм, а тӧв, и сійӧ оз лэдз тані кузятӧ ыркӧдчыны. Ботинкиас кок чуньыс кынмыны нин кутіс, кӧдзыдсьыс пальтоыс омӧля дорйӧ, йирмӧг босьтӧ. Регыд и ковмис чеччыны да заводитны ветлӧдлыны ӧтарӧ-мӧдарӧ, шоныд перйыны. Со мышкас ранеца Коля пиыс мыччысис, Игнатов уськӧдчис сылань:
— Коля!
Но детинка быттьӧ эз и кывлы чукӧстӧмсӧ, котӧрӧн шуркнитіс-пырис подъезд ӧдзӧсӧд. Зэв кывзысьысьӧн тай нӧ вӧлі и батьсӧ радейтіс, а тані эз весиг сувтыштлы, со кыдзи вежсьӧма дженьыдик кадӧн, тшӧтш Степан Михайловичӧс предатель туйӧ лыддьӧ.
Но и мед, заводитіс да оз нин лэдзчысь, Валякӧд аддзысьлас да сылы сьӧмсӧ сетас, нылыс вот-вот музыкальнӧй школаысь воас. Сьӧкыд виччысьнытӧ, кадыс дзикӧдз сувтӧма, кымынысь нин видзӧдліс часі вылӧ, а стрелкаясыс тшӧтш, буракӧ, сы моз жӧ кынмӧмаӧсь, оз и думайтны вешйыштны водзӧ, некыдз нылыслӧн локтан кадыс оз во. Но коркӧ-некоркӧ со и Валя мыччысис, эз казяв айсӧ лымйӧн тырӧм акация куст бердысь, восьлалӧ батьыслань, нинӧмысь оз видзчысь.
— Валюк, — друг воськовтіс нылыслань Степан Михайлович да кутіс пельпомӧдыс.
— О-ой! — кыдз тай чирӧстіс нылыс да ыджыд гӧлӧсӧн бӧрддзис.
— Валюк, тайӧ жӧ ме, батьыд, эн ӧмӧй тӧд? — шӧйӧвошис Игнатов да топӧдіс ас бердас нывсӧ.
Но нылыс эз лӧнь, нетшкысис бать киысь, гӧлӧсыс ӧтарӧ горсяліс, орччӧн ветлысь-мунысьяс сувталісны, чуймӧмӧн бергӧдчисны ая-нылалань, кодсюрӧ смартфон нин кыпӧдӧмаӧсь снимайтны найӧс.
— Валюк, эн бӧрд, — век на зілис лӧньӧдны нывсӧ, но мӧдыс эз и думайт бӧрдӧмсьыс дугдыны, сӧмын ӧтарӧ ӧддзӧ.
Но Степан Михайлович сійӧс топыда кутӧ, этша мынан.
— Валюк, эн нетшкысь, ме тэныд сьӧм сета. Мамыдлы вӧзйи, но сійӧ эз босьт. На, зептад сюй да гортад мамыдлы гусьӧникӧн кӧшеляс сюйышт, мед оз тӧдлы весиг.
Но сьӧм босьтӧм пыдди нылыс уськӧдчис муӧ, бать кок улас туплясьӧ. Игнатов дзикӧдз шемӧсмис, лэдзчысис нывсьыс, весиг неуна вешйыштіс боквыв.
Орччӧнмоз кутшӧмкӧ пӧрысь нывбаба мыйкӧ горзӧ, код юра али мый? Тайӧ кадӧ дзик сы весьтын тормознас дзуртыштӧмӧн джӧм сувтіс полицейскӧй машина, вевт вылас лӧза-гӧрда биӧн сідзи и югъялӧ. Кабинаысь чепӧсйисны ӧслӧпан кодь кык мужик, да Степан Михайлович эз удит весиг нинӧм думыштны, резина беддьӧн колскӧбтӧмысь кымыньӧн уйыштіс водзлань да чужӧмнас сатшис лым пиӧ, а кисӧ бергӧдісны мышланьыс и чорыда дзабыртісны наручникӧн. Сьӧлыштіс ортсӧ вом тырыс пырӧм лымсӧ да сӧмын «Ы-ы!» вермис сьылыштны. Бергӧдіс юрсӧ боквыв да кӧсйис горӧдны: «Лэдзӧй! Мый ті нинӧм абусьыс садь юра мортсӧ кутінныд?». Но нинӧм эз вермы шуны, сылы мыш вылас чорыда сувтіс сьӧкыд берцыа кок да дзикӧдз топӧдіс му бердас:
— Лӧня куйлы, маньяк!
— Ме абу некутшӧм маньяк! — вермис медбӧрын чипӧстны Игнатов.
— Ланьт! — сійӧс талялысьыс воча горӧдіс да выльысь швачкӧбтіс мыш кузяыс резина беддьӧн. Лӧсьыда мӧрччис, лолыс быдсӧн сувтліс да, Степан Михайлович дугдіс чужъясьны и вомсӧ тупкис: тані горзы кӧть эн, нинӧм вежны он вермы. Мый лоас, мед лоӧ. Сійӧ нинӧмысь абу мыжа. Кор погонаясыс гӧгӧрвоасны тайӧс, быть ковмас лэдзнысӧ.
Но Игнатовӧс лэдзнысӧ некод эз и мӧвпав, мӧдарӧ на, мисьтӧма чирзысь нывбабаыд некымынысь колскис юрас беддьӧн. Степан Михайловичӧс лэптыштісны лым вылысь, сувтӧдісны кок йылас да пуксьӧдісны полицейскӧй машинаӧ бӧрвыв пуклӧсӧ, сӧлӧдігас бара на мышкас сійӧ жӧ ёсь гӧлӧса тьӧтӧыс кулакнас вачкаліс.
Ӧти кисӧ прӧстмӧдісны, а мӧдсӧ наручникӧн домалісны воддза пуклӧсас:
— Пукав лӧня, эн чужъясь!
— Кутшӧм нин чужъясьӧм, — пӧлӧса нюмдіс Игнатов.
Дзужкнитіс-сувтіс лӧза-гӧрда пӧнара мӧд машина, некымынӧн петісны сэтысь, восьтісны патрульнӧй машина ӧдзӧссӧ:
— Кӧн нӧ маньякыс?
— Со тай, любуйтчӧй педофил вылас! — индіс Игнатов вылӧ орччӧн пукалысь патрульнӧйыс.
Степан Михайловичӧс югзьӧдісны пӧнарикӧн да музейса экспонатӧс моз дыр видзӧдалісны чужӧмсӧ: первой ӧти, сэсся мӧд, кытчӧдз ставныс эз тӧдмасьны сыкӧд.
— Меным тай некор на эз паныдасьлы-а, но нинӧм, некытчӧ он пышйы, тӧдмасям! Кыдз шуӧны? Петкӧдлы документъястӧ! — шыасис гражданскӧй паськӧма полицейскӧй, коді пуксис шоперыскӧд орчча пуклӧсас. Гашкӧ, тайӧ и эм следовательыс да?
— Документъясӧй гортын.
— Висьтав адрестӧ!
Игнатов висьталіс выль гортса адрессӧ, паспортыс и мукӧд документыс ӧд сэні камодас куйлӧны.
— Гӧтырыд гортад? Кыдзи шуӧны?
— Лариса Ивановна Трёпова.
Полицейскӧйыс висьталӧм сертиыс ставсӧ гижаліс аслас книжкаӧ.
— Ладнӧ, нуӧдӧй тайӧ педофилсӧ дежуркаӧ, да эн нин кӧть сійӧс воштӧй! Асьныд котӧрӧн бӧр татчӧ! Гӧгӧрвоинныд?
— Да!
И Степан Михайловичӧс вывті ӧпаснӧй преступникӧс моз гурӧдісны полицияӧ. Ӧти патрульнӧйыс руль сайын, мӧдыс орччӧн, синсӧ оз вештыв Игнатов вылысь.
— Ме чайті, маньяктӧ кутӧмысь миянӧс наградитасны — оз кӧ орденӧн, то кӧть нин медальӧн, а вот нывкатӧ эг гӧгӧрвоӧй кутны да, ӧдвакӧ кутшӧмкӧ награда сюрас... Лебедевыд веськыда шуис, збыль ми тэкӧд бӧлбанъяс и эмӧсь, — довкйӧдліс юрнас шоперыс.
— Гашкӧ, аддзысяс на, кытчӧ сійӧ воштысяс? Кӧнкӧ, орчча керкаясас и олӧ, — вочавидзис мӧдыс. — Сэки тэнӧ да менӧ збыль наградитасны. А кыдзи нӧ?! Маньякъястӧ ӧд дас воясӧн корсьӧны, Чикатилоыд со, гашкӧ, кызь во мысти сӧмын сюрис. А ми ӧд муртса на уджавны заводитім, а педофилӧс нин кутім, татшӧмторйыд зэв гежӧда овлӧ. Тэ нӧ кымын во нин маньякалан? — Игнатовлысь юаліс да ачыс гылыда серӧктіс.
Степан Михайлович наручника кинас воддза пуклӧсӧ кутчысьӧмӧн чӧв оліс. Оз ӧд кут, буракӧ, тайӧяс водзын правдайтчыны. Олӧм чӧжыс некор эз веськавлы ни сӧветскӧй милиция дзугйӧ, ни Россияса полиция резина бедь улӧ, а со тай, талун пӧрысьӧ-нэмӧ кыдзи сконйыштчис. Но нинӧм, сійӧ некутшӧм мыж эз вӧч, сӧмын ассьыс нывкасӧ кутыштліс да сьӧмтор кӧсйис сылы сетны. Допрос дырйиыс ставсӧ веськыда висьталас да, лэдзасны. И некодлы некутшӧм орден оз вичмы, мед оз надейтчыны! Тадзи мӧвпыштіс да, мортыдлӧн чужӧмас весиг нюмыс мыччысис.
Со и полициялӧн нёль, а колӧкӧ, и вит судтаа кирпич керка. Некор на Степан Михайловичлы эз удайтчыв пыравны тайӧ короминаас, и со талун шудыс пӧлӧса «вашмуніс» сылы. Сыкӧд орччӧн пукалысь патрульнӧйыс мездіс наручник черлысӧ пуклӧссьыс да пысаліс аслас киӧ. Кыдзи садикса посни челядь ветлӧны туй кузя ӧта-мӧдыслы киас кутчысьӧмӧн, сідзи жӧ Игнатов пырис дежурнӧй юкӧнӧ патрульнӧйкӧд ки воча ки. Сэні нин прӧстмӧдісны кисӧ да индісны улӧс вылӧ, кытчӧ и ковмис пуксьыны.
— Тайӧ и эм маньякыд? — донъялӧмӧн видзӧдліс Игнатов вылӧ пульт сайын пукалысь ар нелямына майор погона полицейскӧй.
— Да, тайӧ и эм, — нюмъялісны сылы воча патрульнӧйяс.
— Кымын во уджала, а ловъя маньякӧс некор на эг аддзыв, — весиг оз нюммун майор. — Видзӧдӧмпырысь, нормальнӧй морт, он и куж думыштны, мый пемдӧм бӧрас челядь бӧрся кутас вӧтлысьны. Ті сійӧс кӧть шобинныд?
— Эгӧй... А колӧ вӧлі?
— Дерт, колӧ! Но ті и тьӧмӧяс! Век колӧ тіянӧс велӧдны!
А друг сылӧн зептас граната?!
— Ноко, маньяк-педикулёз, сувтлы! — патрульнӧй матыстчис Игнатов дорӧ да кинас петкӧдліс вывлань. — Китӧ лэпты!
Шлоп-шлоп тапкӧдіс юр вывсяньыс кок улӧдзыс Степан Михайловичӧс, зепсьыс кыскаліс да пызан вылӧ пукталіс мобильник, бумажник да патера ключьяс.
— Сэсся нинӧм абу? — шобысь видзӧдліс Игнатовлы веськыда синмас.
— Граната кындзи дзик нинӧм, — зумыштчӧмӧн вочавидзис Степан Михайлович.
— Нӧшта на ӧд и шмонитӧ, — вашмуніс майор да пыр жӧ чышкыштіс нюмсӧ гӧгрӧс чужӧм вывсьыс. — Нинӧм, регыд бӧрдны ковмас, педофилъясыдкӧд законыд оз ёна чеченитчы!
— Но ми мунам, майор ёрт! Лебедевыд тшӧктіс пыр жӧ бӧр локны, друг да пӧ машина ковмас, — шыӧдчис майор дорӧ патрульнӧй шоперыс.
— Мунӧй, но йитӧдтӧ кутӧй, мед ме тӧді, кӧнӧсь ті!
Дежурнӧй судзӧдіс пызанвывса чукӧрысь журнал, восьтіс сійӧс да киас ручка бергӧдлігтырйи юаліс:
— Кыдзи тэнад ов-ним-вичыд?
— Менам? — кыпӧдіс юрсӧ Игнатов.
— Дерт, тэнад, абу тон менам!
— Степан Михайлович Игнатов.
— Кор чужлін? Адресыд? Кӧні да кодӧн уджалан?
Игнатовлысь став висьталӧмсӧ майор пасъяліс журналӧ.
— Вайӧдӧма тайӧ жуликсӧ дас ӧкмыс час кызь вит минутын, сідзи и пасъям. Но ладнӧ, пуксьӧдлам «нулёвкаӧ», сэн шойччыштан, а следовательыс локтас да, мед вӧчӧ тэкӧд мый кӧсйӧ, кӧть лыйлӧ.
Майор бергӧдчис дежуркаын жӧ пукалысь сержант дорӧ:
— Йӧрт да игнав.
Мӧдыс босьтіс стенын ӧшалысь ыджыд ключ да гольс-гольс восьтіс кӧрт таса ӧдзӧс:
— Пӧжалуйста, располагайтчӧй, гражданин маньяк!
Ӧдзӧсыс гораа крапкысис Степан Михайлович мыш сайын. Сылы паныдӧн вӧлі паськыд лабич, кӧні пукалісны няйтчӧм паськӧма кык код мужик. Ӧтиыс пуксӧн узис, эз и вӧрзьыв, мӧдыс шармӧдіс синсӧ да юаліс:
— Куритчаныд эм?
— Абу.
Та бӧрын юасьысьыд бӧр кунис синсӧ.
Дежуркаӧ кадысь кадӧ пыравлісны выль полицейскӧйяс, юавлісны дежурнӧйлысь: «Кӧні нӧ маньякыс? Этайӧ и эм?», матыстчыласны кӧрт тасъяс дорӧ, видзӧдласны Игнатов вылӧ да бӧр петӧны. Быдӧнлы окота аддзывны ловъя маньяк-педофилтӧ, кодъяс йылысь дугдывтӧг дыдгӧны телевизор пырыд. Быттьӧ зоопарк тані, оз тырмы нӧшта касса восьтыны да кассирӧс пуксьӧдны, мед мынтысьӧны видзӧдлӧмсьыс! Игнатов кунис синсӧ да шапкасӧ улӧджык лэдзис, а друг кодкӧ тӧдса веськалас? Жаль, мый балаклаваыд абу, сэк эськӧ дзик збыль маньяк кодь вӧлі. Но и тадзи кӧть мыйдыра тан сулаласны, нинӧм оз аддзыны.
Асывсяньыс сёр рытӧдз участкӧвӧй да патрульнӧйяс кок йывсьыныс усьтӧдз корсисны нывкаӧс — маньяклысь жертвасӧ, но сідз эз и аддзыны. Следователь Лебедев, МВД-са министр да отделса начальник Коюшев дзонь лун воштісны телестудияын, кӧні тэрмасьӧмӧн «вурисны» полицияса удж йылысь репортаж. Бӧрас Лебедев ноксис помасянвыйын срока мукӧд делӧӧн. Преступникӧс допроситны Георгий Васильевич слӧймис сӧмын коймӧд лунас.
Гильс-гольс кыліс томанын ключ бергӧдлӧм, да кӧрт листӧн эжӧм камера ӧдзӧс гораа дзуртыштӧмӧн воссис.
— Игнатов, допрос вылӧ! — гора гӧлӧсӧн шыасис сержант.
«Но-о, медбӧрын допрос вылӧ нуӧдӧны, — мӧвпыштіс Степан Михайлович. — Кыскисны да кыскисны, нюжӧдісны да нюжӧдісны, да гӧгӧрвоисны жӧ, мый йӧртӧм мортыскӧд колӧ сёрнитыштны. Сюв каттьӧм кодь лои».
Допрос нуӧдан кабинетын пызан сайын пукаліс следователь Лебедев. Сійӧ нинӧм шутӧг индіс Игнатовлы улӧс вылӧ. Тошсявны удитӧм Игнатов сідз жӧ чӧв олӧмӧн матыстчис пызан дорӧ, кӧсйис кыскыштны пуклӧссӧ асланьыс, но эз вермы, пызансӧ моз улӧссӧ, вӧлӧмкӧ, тувъялӧма джодж бердас. Пуксис да видзӧдліс Лебедевлы синмас, виччысис, мый лоӧ водзӧ.
Следователь жӧ висьталіс, мый Игнатов лыддьыссьӧ преступление вӧчӧмын подозреваемӧйӧн, индіс и Уголовнӧй кодексысь статьясӧ, кодӧс Степан Михайлович, дерт, пыр жӧ вунӧдіс.
— Ӧні ме тіянӧс допросита кыдз подозреваемӧйӧс. Висьталӧй, мый ті вӧчинныд войдӧрлун?
И Степан Михайлович веськыда, нинӧм дзебтӧг тӧдмӧдіс Лебедевӧс, мый сійӧ вӧчис казьтыштӧм нин луннас и кыдзи рытнас уськӧдчыліс аслас рӧднӧй ныв вылӧ.
Следователь дыр видзӧдіс Игнатовлы синмас, быттьӧ кӧсйис тӧдмавны, пӧръясьӧ мортыс али оз, гашкӧ, сканируйтіс нин юр вемсӧ весиг да.
— Тайӧ ставыс збыль?
— Да.
— А мыйла тіянӧс кутігас и бӧрыннас полицияса дежурнӧй юкӧнас тайӧс эн висьталӧй?
— Кыдз эг висьтав? Висьталі и горзі, мый ме абу маньяк, но некод менӧ весиг кывзыны эз кӧсйы!
— М-да, — Лебедев некыдз эз куж виччысьны мыж туялӧмсӧ тадзи бергӧдчӧмӧн, ӧд став нокыс сылӧн вӧлӧма дзик весьшӧрӧ.
— Ме ӧні жӧ ветла тіян важ гортад, сёрнитла гӧтырыдкӧд да нылыдкӧд. Ставыс кӧ збыль сідзи вӧлі, кыдзи ті висьталінныд, то лоӧ быть тіянӧс лэдзны, тані водзӧ видзны оз позь.
— Сӧмын киӧ кутшӧмкӧ документ вайӧй, мед ме верми правдайтчыны заводын, кык лун ӧд удж вылӧ эг петав.
— Документ быть сетам. Дежурнӧй! — ӧдзӧссӧ восьтыштіс Лебедев. — Нуӧдӧй Игнатовӧс бӧр камераас.
Ывлаын пукаліс нин рыт, кор Лебедев вермис жӧ медбӧрын волыны Игнатовлӧн важ оланінас. Звӧнок вылӧ ӧдзӧссӧ восьтіс гӧтырыс — Наталья Васильевна. Сійӧ чуймӧмӧн видзӧдліс следовательлӧн гӧрд удостоверение вылӧ да кыв шутӧг лэдзис пырны патераӧ:
— Личӧдчӧй, локтӧй татчӧ жыръяс.
Лебедев пӧрччис ботинкисӧ, курткасӧ ӧшӧдіс тувйӧ да Наталья Васильевна бӧрын пырис комнатаӧ, гӧгӧртіс видзӧдласнас аньӧс, сылысь ныла-пиасӧ, кодъяс буретш пукалісны телевизорӧ сатшкысьӧмӧн.
— Меным ковмас гижасьны.
Ань матыстіс пызан дорӧ улӧс:
— Пӧжалуйста. Челядь, чинтыштӧй телевизор горсӧ.
Следователь пуксис, кыскис коричневӧй папкасьыс допрос нуӧдан бланок да ручка и видзӧдліс нывбабалы синмас.
— Весиг ог тӧд, мыйсянь заводитны.
Наталья Васильевна ышловзис, юрас воалісны медся повзьӧдана мӧвпъясыс, и мортыд некыдз эз вермы гӧгӧрвоны, мый бара-й полициялы сысянь колӧ? Ачыс тані, челядь танӧсь, сідзкӧ, мыйкӧ лоис верӧсыскӧд?
— Татшӧм здукъясас шулӧны: заводитӧй водзсяньыс!
— Водзсяньыс кӧ, и водзсяньыс. Наталья Васильевна, войдӧрлунсянь миян ИВС-ын (изолятор временного содержания) пукалӧ документъяс сертиыс тіян верӧс — Степан Михайлович Игнатов. Чайтсьӧ, сійӧ маньяк-педофил...
— Да тайӧ жӧ оз вермы лоны! — синва сорӧн горӧдсис Наталья Васильевналӧн. — Менам верӧс — педофил?! Тайӧ сылӧн тӧдсаяс пиысь некодлы весиг юрас оз вермы воны! Кытчӧдз эз конъясь Лариса Трёповаӧ, сійӧ вӧлі зэв бур батьӧн, челядьлысь кӧть юалӧй!
— Та могысь ме и пыри тіян дорӧ, мед юасьны тіянлысь да челядьыдлысь. Медводз сёрнитыштам тіянкӧд. Кор ті бӧръяысь аддзысьлінныд Степан Михайловичкӧд?
— Буретш войдӧрлун бӧръяысьсӧ и аддзылі.
И Наталья Васильевна бӧрдігтырйи висьталіс следовательлы, кыдзи туй вылын паныдасис верӧсыскӧд, да Степан Михайлович кӧсйис сетны сьӧм, но ань эз босьт. Та вылын аддзысьлӧмыс и помасис. Георгий Васильевич аньлысь висьталӧмсӧ вуджӧдіс бумагаӧ да кырымӧдіс аньӧс.
Наталья Васильевна дырйи жӧ следователь допроситіс челядьсӧ: Коляӧс да Валяӧс. Налӧн висьталӧмъясыс петкӧдлісны, мый Степан Михайлович Игнатов нинӧм абу пӧръялӧма, сідзкӧ, мортыс некутшӧм абу маньяк, и сійӧс пыр жӧ колӧ лэдзны ИВС-ысь, а уголовнӧй делӧсӧ тупкыны мыж абутӧм вӧсна.
— Мам, со дядя следовательтӧ петкӧдлӧны телевизор пыр! — друг чуйдіс Коля телевизорлань чуньсӧ нюжӧдӧмӧн.
Лебедев орӧдчис аслас бумагаясысь да Наталья Васильевнакӧд тшӧтш бергӧдчис телевизорлань. Збыль, сэні буретш муніс сійӧ уджтасыс, код вылын тӧрыт пӧшти лунтыр мырсисны тележурналистъяс, следователь Лебедев, ОВД-са начальник Коюшев да МВД-са министр. Яндзимысла Георгий Васильевич тайкӧ му пырыс мунас, бур сӧмын, мый Коля сёрӧн вуджӧма Сыктывкарса каналас, да регыд мысти репортажыс помасис. Со ӧд, ошйысисны маньякӧс кутӧмӧн, а ИВС-ӧ лои пуксьӧдӧма дзик мыжтӧм мортӧс.
— Наталья Васильевна, ӧні следствие нуӧдӧмӧ колӧ пуктыны чут, а мед некутшӧм прокурор эз вермы шуны, мый ме закон торкӧмӧн тупки уголовнӧй делӧсӧ, миянлы колӧ нуӧдны следственнӧй эксперимент. Ковмас ветлыны сідз шусяна преступление вӧчанінӧ, кӧні Валя петкӧдлас да висьталас, мый сэні вӧлі войдӧрлун рыт.
Лебедев йитчис участкӧвӧйкӧд, коді вомгорулас ёрччигтырйи недыр мысти бара локтіс тӧдсаинӧ, кӧні сійӧ патрульнӧйяскӧд войдӧрлун рыт да тӧрыт лунтыр корсисны «маньяклысь» «жертвасӧ». Георгий Васильевич петкӧдіс ывлаӧ Наталья Васильевнаӧс да Валяӧс. На бӧрся вӧтчис тшӧтш и Коля, кыдз нӧ сытӧг? Участкӧвӧй вайӧдіс орчча керкаысь Солодоваӧс да Колиповаӧс.
— Ёртъяс! Нуӧдам следственнӧй эксперимент, — юӧртіс чукӧртчӧмаяслы Лебедев. — Валя, пӧжалуйста, петкӧдлы, кӧні тэнӧ войдӧрлун виччысьтӧг кутісны?
И Валя, дерт, стӧча петкӧдліс сійӧ местасӧ, кӧні войдӧрлун заводитчис да талун со помасьӧ неыджыд лоӧмтор, кодӧс чайтісны преступлениеӧн. Лебедев сэні жӧ, автомашинаас, дасьтіс колана бумагаяс, кырымӧдаліс следственнӧй эксперимент вылӧ корлӧмаясӧс да янсӧдчытӧдзыс шыӧдчис:
— Капитолина Васильевна, Анна Сергеевна, зэв ыджыд аттьӧ тіянлы! Та бӧрын тіянӧс некод нин оз кут дӧсадитны. Верманныд мунны гортаныд, нӧшта ӧтчыд извинитӧй менӧ!
— Георгий Васильевич, ті миянӧс извинитӧй, тайӧ ӧд ми Анна Сергеевнакӧд нинӧмсьыс та ыджда зыксӧ кыпӧдім, — копыртчыліс быдсӧн следовательлы Солодова.
— Бур, мый ставыс бура помасис, — тшӧтш копыртчыліс аньяслы Лебедев. — И водзӧ вылӧ некор эн лоӧй веськодьӧн: син водзаныд кӧ кодкӧ бур йӧзыслысь оласногсӧ торкӧ, пыр жӧ звӧнитӧй полицияӧ!
Анна Сергеевна да Капитолина Васильевна варовитігтыр ылыстчисны.
— Наталья Васильевна, кӧсъянныд кӧ, ветлам верӧсыдла, али он кӧсйӧй?
— Ветла! Быть ветла! А ті, челядь, миянкӧд жӧ?
— Ми тшӧтш! — горӧдісны кыкнанныс.
Лебедев пырис полиция отделӧ, а Наталья Васильевна челядьыскӧд кольччис кильчӧ вылас, кӧні, мед оз кынмыны, мӧдісны надзӧникӧн ветлӧдлыны ӧтарӧ-мӧдарӧ. Кильчӧ ӧдзӧсыс дугдывлытӧг клопайтӧ, пырӧны-петӧны полицейскӧйяс, вайӧны да сойбордйӧдыс пыртӧны код юра мужикъясӧс, петкӧдӧны садьсялӧмъяссӧ, сэн жӧ прӧщайтчӧны, ӧтиыс: «Но, став бурсӧ, волывлы!», а мӧдыс: «Ен мед видзас!».
Медбӧрын сійӧ жӧ ӧдзӧсӧдыс мыччысис Степан Михайлович. Сійӧ тӧдчымӧн омӧльтчӧма, тошсялӧма. Аддзис гӧтырсӧ да челядьсӧ, и синваыс войтыштіс, на водзын пидзӧс вылас уськӧдчис, кутлӧ куимнаннысӧ:
— Наташа, Колюк, Валюк, прӧститӧй менӧ! Эг куж овны кыдзи колӧ, вот йӧй мужиктӧ Енмыс и накажитіс. Кыв сета, мӧдысь татшӧмыс некор оз ло!
— Но мый, челядь, — бергӧдчис ныла-пиа дорас Наталья Васильевна. — Прӧститам батьтӧ, али ог? Сибӧдам бӧр гортӧ, мед «кыз бруньыскӧд» олӧ, али мед кӧнкӧ бокын лытайтӧ?
— Прӧститам нин, бӧр ӧтлаын овмӧдчам, — ӧта-мӧд выланыс видзӧдлісны да кывкӧрталісны Коля да Валя.
Гажа котырӧн мӧдӧдчисны медводз Лариса Трёпова керка дорӧ, колӧ ӧд Степан Михайловичлысь кӧлуйсӧ босьтны. Чышкалісны автомашинасьыс ӧшйӧм лымсӧ, заводитлісны моторсӧ. Пырисны кӧлуйла, кайисны пос кузя, а патераӧ пырны эз ковмы: Ларисаыд Игнатовлысь став кӧлуйсӧ шыблалӧма площадка вылас, оз кӧсйы сійӧ водзӧ маньякыдкӧд овны.
Локтісны горт дораныс, кутчысисны Степан Михайловичлысь этшаник кӧлуйсӧ пыртлыны.
Со ӧд, ывлавылыс гажа, сюръяясын пӧнаръяс югдӧдӧны еджыд лымсӧ. Енэжын тыр тӧлысь нюмъялӧ Игнатовъяслӧн ноксьӧм вылӧ, гежӧдик кодзувъяслы тшӧтш нимкодь видзӧдны семьяын лад пуксьӧм вылӧ.
Майбыр жӧ нин аслад гӧтырыдкӧд, аслад челядьыдкӧд овны, некутшӧм Трёпова коддьӧм вылӧ та бӧрын Степан Михайловичлӧн вежыс оз пет!
