КАНЬЛЫ НИМ



Тайӧ юалӧмсьыс дудіс
Лыа пиын ворсысь Вань:
Кутшӧм нима вермас лоны
Сылӧн рыжӧй гӧна кань?

Болтик быттьӧкӧ оз лӧсяв —
Вывті чорыд нимыс, кӧрт.
Пелысь молльыс оз жӧ скодит:
Каньыс абу сэтшӧм гӧрд.

Рыжик нимыс вӧрӧн ӧвтӧ —
Эм тай сэтшӧм сола тшак.
Жужикӧн кӧ шуан каньтӧ,
Гашкӧ, лэбзяс быттьӧ гаг?

Тигрлысь нимсӧ, гашкӧ, сетны?
Тадзтӧ каньыд лэптас ныр,
Кутас виччысьны бур сёян,
Весиг оз мӧд кыйны шыр.

Медся лӧсьыд нимӧн каньлы
Лоӧ, буракӧ, Зефир:
Чӧскыд-чӧскыд, вомад сылысь,
Быттьӧ юмов сакар чир.

Трактор лыа пытшкын сибдіс —
Дугдіс ворсны ыззьӧм Вань.
Нимыс эськӧ вывті лӧсьыд.
Сӧмын кытысь босьтны кань?