МЕНАМ ЁРТ



Миян Кеша нима кань
перкаль рӧма, визя, шань.
Пыралас кӧ тӧдтӧм морт,
пон моз эргӧ, видзӧ горт.

Менам ёртӧй нюж да дюж,
сӧмын нюмъявны оз куж.
Тшыгъялас кӧ, нявзӧ век —
корӧ юква либӧ нӧк.

Шыбита кӧ кампет кыш,
каньлы вайны абу дыш.
Тадзи ворсам-вильшасям —
вывті тешкодь сылӧн сям.

Кань кӧ войлӧ* — «вывті рад»,
ниртчӧ кокӧ — «сёян кад»,
«унмыс локтӧ», оз кӧ дур —
мойдӧ, кургӧ, ставыс бур.

Сійӧс радейтамӧй тан,
кӧть и парсалӧ диван,
лэчтӧ-вежӧ ассьыс гыж —
таын сылӧн абу мыж.

Войнас кутасьӧ да пыр
гусьӧн пуктӧ кыйдӧс-шыр
кильчӧ вылӧ асъядор —
со пӧ менам кыйӧмтор.

Мыссяс-нювсяс, лакас йӧв,
луннас кӧнкӧ узяс чӧв,
сэсся рытбыд ышмалам —
«Керка дзӧрӧ!» — шуас мам.

*Войлӧ — (изьватас ног) котралӧ.