МЫК

Мича гожся асылӧ Толя да Сергей, кык ёрт, кодъяс вуджисны нин нёльӧд классӧ да лыддисны асьнысӧ гырысь йӧзӧн, талун водз мӧдӧдчисны ю вылӧ вуграсьны. Вугыр шатинъяссӧ да мукӧд кӧлуй-мӧлуйсӧ лӧсьӧдісны рытсяньыс на, мед нинӧм оз вунӧдны. Пасьтасисны лӧсьыда, кокни курткаясыс юркышаӧсь, мед дорйыштны балябӧжъяссӧ, кытчӧ медся ёна радейтӧны тшапкысьны номъясыд. А Сергей содтӧд антикомарин на ноп зептас сюйыштіс. Вель уна сёян на тшӧтш босьтісны, тӧдӧны ӧд, сыысь оз позь лэдзчысьны.

— Вай ворсыштам. Ӧтиным шуам чери ним комиӧн, а мӧдным вочавидзам, кыдзи сійӧ лоӧ рочӧн, но? — вӧзйис Сергей. — Ме заводита: ком.

— Хариус, — эз дыр мӧвпав Толя. — Сир.

— Сир — сійӧ щука.

Но эз дыр кыссьы ворсӧмыс, регыд и джӧмдісны.

— Мык, — вӧзйис Толя. — Тӧдмав!

— А ме ог и тӧд, кыдзи сійӧс рочнас шуӧны, — шӧйӧвошис Сергей. — А тэ ачыд тӧдан?

— И ме ог жӧ, — серӧктіс Толя.

Водзӧ мунісны чӧв олігтыр. Ӧдйӧ шавксьӧдӧны ёртъяс, мед некод оз удит наысь водзджык воны Епим куръяӧ, сэні пырджык кыйсьылӧны найӧ. Но мыйӧн матыстчисны радейтанаинӧдзыс, кыкнанныслӧн дількмуніс сьӧлӧмыс: сэні кузь шатинъяс ва весьтӧ чургӧдӧмӧн вуграсисны нин куим тӧдтӧм детинка.

— Ок, сёрмим, другӧ! — Толя майшасигтырйи сувтіс да гыжйыштіс юрсӧ.

— Да, ковмас неуна водзӧджык кайны, — ышловзис Сергей да горӧдіс кыйсьысьяслы: — Детинъяс, мый кыянныд?!

Но некод весиг эз бергӧдчыв сылӧн шыӧдчӧм вылӧ.

— Тайӧ ӧд посёлоксаяс, а сэні ставныс рочьяс, коминад оз гӧгӧрвоны, — ӧвтыштчис кинас чужӧм бердӧдыс вӧсньыдика тіньгысь номъясысь Толя да рочӧн нин юаліс: — Пацаны, что ловите?!

— Всё больше мык попадается, — сутш кежлӧ сӧмын бергӧдчыліс ӧти.

Сергей да Толя видзӧдлісны ӧта-мӧд выланыс да пыльснитісны-серӧктісны.