ГӦТРАСЬӦМ ЙЫЛЫСЬ ДА СЕМЬЯӦН ОЛӦМ ЙЫЛЫСЬ

«Коми сикт» газетын 35 номерын ми гижлім гӧтрасьӧм йылысь да семьяӧн олӧм йылысь выль закон чукӧр серти (проект). Выль закон йылысь Республика пасьта уджалысь йӧз пиын муніс зэв ыджыд сёрни да вензьӧм (дискуссия); споруйтӧны вӧлі, колӧ оз гӧтрасьӧмсӧ гижавны, кыдз быдтыны да вердны кагасӧ да мукӧдторъяс йылысь.

Юстиция комиссариат став сёрнисӧ выль закон йылысь, став споруйтӧмсӧ ӧні ӧтлаалӧма. Со мыйяс корӧны уджалысь йӧз: первой-кӧ, гӧтрасьӧмсӧ колӧ пӧ гижавны (регистрируйтны), мӧд-кӧ, сӧмын збыль гӧтрасьӧм кӧ (фактический брак): лоӧ кӧ сійӧ гижӧма, суд кӧ шуас гӧтрасьӧмӧн, либӧ мужик да нывбаба асьнысӧ шуӧны гӧтыръясӧн, мед сетас права гӧтыръяслы (бать-мамлы) да челядьлы; сэсся мед законыс вӧлі тшӧктӧ найӧс тӧждысьны мӧда-мӧд вӧснаыс. Сэсся алиментъяс йылысь (сьӧм перйӧм йылысь) уджалысь йӧз шуисны: кодыскӧ кӧ гӧтыръяс пиысь оз вермы уджавны да ёна нуждайтчӧ, сэтшӧмыслы лоӧ мынтыны алимент, сӧмын лоӧ лӧсьӧдны кутшӧмкӧ срок, шуам кӧть ӧти во чӧж; сідзжӧ гӧтыръяс пиысь кодыскӧ кӧ уджтӧм (безработнӧй), бара лоӧ сетны торйӧдчӧм бӧрын алимент, но сроксӧ пуктыны 5 тӧлысьӧдз. Челядьсӧ бать-мамлы кыкнаныслы ӧткодя лоӧ вердны да быдтыны. Гӧтрасьысьяслы арлыдсӧ уджалысь йӧз корӧны кольны важ моз (зонлы 18 арӧс, нывлы 16 арӧс).

Крестьяна та кындзи корӧны, мед выль законас вӧлі шуӧма, кутшӧм кодлӧн семья пиас (батьлӧн, мамлӧн, челядьлӧн) права имущество вылӧ. Сідзжӧ колӧ законас висьтавны, кыдз судзӧдны алимент сиктса олысьяслысь. Шуам кӧть сідз: суд шуис кывкутысьыслысь (ответчик) перйыны 60 шайт корсьысьыслы (истцу).

Со мыйяс корӧны уджалысь йӧз. Закон вынсьӧдігас тайӧ корӧмъяс серти лӧсьӧдасны статьяяссӧ.

Н. К.