КОЛӦ УНА КАРТУПЕЛЬ ПУКТЫНЫ
Статистика серти, миян Россияын картупель воӧ быд морт вылӧ 9 пудсянь 15 пудйӧдз, а Германияын 50 пудйӧдз. Сэсся Германияын кымын ичӧт овмӧс, сымын унджык мусӧ лэдзӧма картупель улӧ. Этшаджык муа крестьянин сэн джын мусӧ вӧдитӧ картупель улын. На вылӧ видзӧдӧмӧн ӧні и миян мӧдісны унаджык картупель вӧдитны. Германияын моз жӧ медсясӧ тайӧ удж бердас кутчысьны мӧдісны этшаджык муа крестьяна, кодъяслӧн ас няньыс оз тырмы во гӧгӧр кежлӧ. Картупель вӧдитігӧн ӧтыджда муяс вылын уджалан луныс колӧ нёль мында унджык няня быдтас му вылын уджалӧм серти. Десятина картупель улӧ мунӧ во гӧгӧрӧн: морт уджалан лун — 101, вӧв уджалан лун — 31.
| шабді уджалігӧн: | морт уджалан лун — 94,5 |
| вӧв уджалан лун — 13,4 | |
| ид уджалігӧн мунӧ: | морт уджалан лун — 26,2 |
| вӧв уджалан лун — 7,2 |
Мед бокысь крестьянинлы гожӧмын оз вӧлі ков корсьысьны удж, колӧ сылы унджык заводитны пуктыны картупель. Сэки йӧзын нянь вылӧ уджалӧм пыдди сёянторйыс сылӧн гортас воас.
Д. Н. Прянишников профессор шуӧ: вӧдитны картупель му вылын — босьтны куим шеп ӧти шеп быдманінысь. Тайӧс позьӧ аддзыны со кутшӧм табличаысь:
| Рудзӧг. | Картупель. | |
| Урожай | 50 пуд | 500 пуд |
| Косӧгатор |
42,5 „ | 125 „ |
| Картупель пызь | 32,5 „ | 100 „ |
| Азотатор | 5,5 „ | 10 „ |
Тайӧ табличасьыс тыдалӧ, мый картупель вӧдитігӧн ӧтыджда муяс вылысь пӧтӧсыд воӧ куим мында унджык нянь сертиыд.
Тані босьтӧма ичӧт урожай картупельлысь. Ми град вылын вӧдитігӧн босьтам урожайтӧ картупельыдлысь нёль та мында кымын. Арнад картупельтӧ керигӧн квадрата сыв вылысь кӧ сюрӧ пуд джынйӧн кымын сӧмын, шуӧны нин: таво пӧ картупельыс абу зэв бура быдмӧма. А десятина вылысь кӧ босьтан сэтшӧм урожайтӧ, чукӧрмас 1200 п. Нянькӧд кӧ артавны, тайӧ лоӧ 360 кымын пуд нянькӧд воча.
Зэв бур воясӧ град вылын картупель вӧдитігӧн, бура вынсьӧдӧмӧн, ӧти сыв вылас картупельыд волывлӧ пудйӧн-джынйӧнӧдз. Кутам кӧ лыддьыны ӧти пудйӧн сыв вылысь, десятина вылад воас нин 2400 пуд: сійӧ лоӧ 700 кымын пуд нянькӧд воча. Татшӧм урожайыд, нянь улад мутӧ вӧдитігӧн, дерт, некор миян оз волы.
Картупель вӧдитӧмыд зэв ыджыд буртор крестьяниныдлы сетӧ.
Сідзкӧ ёна сы дінӧ колӧ кутчысьны.
В. Исаков.
