ТЭРЫБДЖЫКА МЫНТАМ ВИДЗ-МУ ВОТ

Помасьӧ тӧв. Помасьӧны тӧвся уджъяс — сортовка лэдзӧм, пес пилитчанъяс заводъясын да мукӧдлаын уджъяс. Зіль крестьянин вермис сьӧм перйыны. Тувсовъя уджъясӧдз крестьянинлы ӧні жӧ колӧ думыштны уджйӧзъяссӧ ассьыс мынтыны.

Первой уджйӧз крестьянинлӧн государстволы — видз-му вот. Таво правительство крестьяналы сетіс унджык кокньӧд вот мынтӧмысь, срокъяссӧ сетӧма сёрджык кадъясӧ, налогыс кокньыдджык колян во серти. Сӧмын мынтӧны вотсӧ коми йӧз таво омӧльджыка. Март 15-ӧд лун кежлӧ вӧлі мынтӧма 157.172 шайт. Вогӧгӧрся вот тырӧмӧдзыс оз на судзсьы 57.854 шайт. Сійӧ сьӧмсӧ колӧ тыртны 1-ой май кежлӧ. Медомӧля мунӧ видз-му вот мынтӧмыс Емдін уездын да Изьва уездын.

Мукӧд крестьяна надейтчӧны — гашкӧ пӧ шыбитасны миянлысь недоимкасӧ колян вося моз. Таво вот шыбитӧм вылӧ оз ков надейтчыны. Коймӧд срок вот мынтӧмлы кольӧм бӧрын (май 1-ӧд лун) пырысь-пыр волисполкомъяс заводитчасны вотсьыс недоимкаяссӧ перйыны. Вермӧны кӧ да нарошнӧ вотсӧ оз мынтыны, сэтшӧм крестьянаыслысь судӧн перъясны вотсӧ. Сэсся вот мынтытӧмысь мукӧд крестьянаыслысь эмбурсӧ гижаласны да дас лун мысти волисполком вузалас недоимкасӧ тыртны. Обласьтувса исполком таво кутас сюся видзӧдны, кутшӧм вӧлӧсьтын омӧля мунӧ видз-му вот да страхӧвӧй перйӧм. Кытӧн лёка мунӧ государстволы уджйӧз мынтӧм, сійӧ вӧлӧсьтувса исполкомас юралысьяссӧ да шленъяссӧ Обласьтувса исполком асьнысӧ кутас мыждыны.

Татчӧ некодлы асьсӧ оз ков воштыны. Быд волисполкомлы колӧ шуны: миян вӧлӧсьтын мед ӧти вот мынтытӧм морт оз коль бӧръя срок бӧрас. Мед быд коми крестьянин шуас: ме вӧсна сӧветскӧй правительство тӧждысьӧ, меным сы вӧсна тӧждысьны жӧ колӧ, вотсӧ ӧні жӧ мынта ставсӧ.

А. Щ.