БЫРӦДАМ КОВТӦМ РӦСКОДЪЯС

Неважӧн став Союзса овмӧс нуӧдан Сӧветын юралысьыс Дзержинскӧй ёрт шуис: колӧ чинтавны, бырӧдны ковтӧм рӧскодъяс. Колӧ быд служащӧйлы дӧзьӧритны, мичаӧ лӧсьӧдны государстволысь овмӧс, сямӧн видзны быд ур.

Тавоӧдз на рӧскодъяс миян вӧлі гырысь. Сы вӧсна овмӧс кыпӧдӧм удж муніс ньӧжйӧджык. Дзержинскӧй ёрт тшӧктӧ тайӧ бурмӧдан уджсӧ нуӧдны быд пабрик-заводъясын да учрежденньӧясын. Сэні ӧні, тшӧктӧм бӧрти, зіля кутчысисны видлавны быд рӧскодъяс. Сюри зэв омӧльторъяс. Ӧти-кӧ, вывті уна пукалӧны служащӧйяс; мӧд-кӧ, шыблалӧны сьӧм ковтӧмторъяс вылӧ; коймӧд-кӧ, эз кужны лӧсьӧдны мичаӧ удж да, уна мунӧ сьӧм быдсяма утечкаяс, командировкаяс вылӧ.

Дерт, мукӧд юралысьыс абу сэні мыжа. Ыджыд удж нуӧдігӧн быд поснитор он вермы аддзыны. Сэсся ӧд юралысьясас ӧні пукалӧны ми кодь жӧ крестьяна да рабочӧй. Найӧ сӧмын на велӧдчӧны. Вывті мыждыны найӧс оз позь. Колӧ налы сетны отсӧг. Тайӧ отсӧгсӧ ковмас вӧчны ревизионнӧй комиссияяслы. Водзӧ вылӧ Сӧвет власьт тшӧктӧ ёна кыпӧдны ревизионнӧй комиссияяслысь уджсӧ.

Гӧгӧр кӧ видзӧдлан, тайӧ бурмӧдан уджнас государство бара на кокньӧдӧ крестьяналысь олӧм. Кор бырӧны-чинӧны рӧскодъяс, сэки вермас усьны тӧварлӧн дон, чинас налогъяс, ӧдйӧджык кутас кыптыны крестьянинлӧн овмӧс.

Миян обласьт пасьта ковмас чорыда кутчысьны чинтавны рӧскодъяс. Эмӧсь на быдсяма нелючки уджъяс. Карвывса учрежденньӧясын ковмас мичаӧ видлавны: оз-ӧ позь кутшӧмсюрӧ рӧскодъяс бырӧдны, этша дугӧдны уна ветлӧмъясысь (командировкаяс), чинтавны ӧти-мӧд служащӧйясӧс да мукӧд рӧскодъяс. Сідзжӧ колӧ бура видзӧмӧн овны сиктбердса учрежденньӧяслы. Ӧні лоӧ вӧлӧсьтувса исполкомъясын ревизионнӧй комиссияяс. Мед бурджыка найӧ кутасны уджавны.

Медся ёна ковмас нуӧдны тайӧ уджсӧ кооперативъяслы. Налӧн абу на пырӧма юрас, мый ӧні зэв гырысь дон тӧваръяслӧн. Нажӧтка крестьянин босьтлас, да колантор оз и аддзывлы. Потребительскӧй лавкаяслы уна на позьӧ чинтавны рӧскодъяссӧ. Рӧскодъяс лыбӧ со мый вӧсна: лавка вайлывлӧ мунтӧм тӧвар, сетӧ уна тӧвар уджйӧзӧн, оз чукӧрт шленъяс пӧвстын пайяс да босьтӧ тӧвар сідзжӧ уджйӧзӧн, видзӧ сьӧм ковтӧмторъяс вылӧ. Сэсся оз уджав план серти. Унджык кооперативъясыс ӧнӧдз на эз вермыны шыбитны татшӧм лишнӧй рӧскодъяссӧ.

Ми чайтам, водзӧ вылӧ кооперативъяс кутасны ёнджыка бурмӧдны уджсӧ да бырӧдны ковтӧм рӧскодъяс. Ковмас чорыдджыка татчӧ кутчысьны ревизионнӧй комиссияяслы. Оз ков виччысьны тшӧктӧм вывсянь.

Колӧ пырысь-пыр кутчысьны уджӧ!