ЛУНӦ БАНА МУ

Асьным бӧрйим тайӧ мусӧ,
Кодӧс шоныдӧн он шу.
Медся дона, медся муса
Лунӧ бана чужан му.

Нэмсӧ тані олам-вылам,
Быдтор вӧчны тырмӧ сям.
Кодыр сьывсьӧ, сэки сьылам,
Кодыр колӧ, уджалам.

Ӧта-мӧдысь вежавидзам,
Пыр на оласногным шань.
Лёксьыс, енсыкӧдӧн, видзӧ
Миян Енным — Зарни Ань.

Визув юлӧн берег дорӧ
Пыдӧ лэдзим сирӧд вуж.
Чеччам водз да водам сёрӧн,
Пызан вывным абу куш.

Абу пӧлӧс потшӧс-майӧг,
Керка-карта лы кодь ён.
Уличын и ӧшинь сайын
Тырыс ныв да тырыс зон.

Быдӧн кодлыкӧ да колӧ,
Кывсӧ шуас да оз дур.
Сӧмын тані шуда олӧм.
Сэсся некытысь оз сюр.

Сӧмын тасянь ылӧдз кылам,
Сӧмын тані гажным тыр.
Варыш пиа, чужмӧр ныла
Чужанін оз некор быр!