СЬЫЛАНКЫВЪЯ МУ


Чужим ми эг ёрччыны да юны.
Татшӧмторйыс сьӧлӧмлы оз ков.
Нэмсӧ сьыланкывъя чужан муным,
Сійӧ — миян олан-вылан лов.

Кӧть тэ грездӧ, кӧть тэ сиктӧ пыран,
Юргӧ енэж улын сьыланкыв.
Сьыланкывъя татшӧм оландырӧн
Нэмсӧ гажа миян Эжва йыв.

Воч ю бокын сійӧ зэв жӧ кылӧ,
Мортыс нюма, сылӧн сьӧлӧм дон.
Бордъяс вылын сьылан нуӧ нылӧс,
Бордъяс вылын сідзжӧ удал зон.

Габов грездным зэв жӧ кыпыд лола,
Нэмсӧ сылӧн сьӧлӧм том да пӧсь.
Кӧть и этша морт нин тані олӧ,
Ставныс муса сьыланкывъяӧсь.

Коркӧ Ӧсип Гриша гудӧкасьліс,
Ӧні сідзжӧ ворсысь тані эм.
Баян кизьяс сюралӧны Васьлы,
Сійӧ кутас ворсны тані нэм.

Асланым и сьыланкывъяс тэчысь,
Абу ӧти — ӧтпырйӧ кык Вась.
Шыыс налы енэжсяньыс лэччӧ,
Налы парма сетӧ шысӧ тась.

Чужим ми эг ёрччыны да юны,
Татшӧмторйыс сьӧлӧмлы оз ков.
Водзӧ лоӧ сьыланкывъя муным,
Сійӧ — миян олан-вылан лов.