ВӦЛІ ЫДЖЫД ЛОЛАӦН
Коми республикаса Паметь книгаын (3-ӧд том, 225 лист бок) гижӧма: «Изосим Николаевич Морохин. 1912–1943 олан вояс. Чужис Дзоль сиктсӧветувса Габов грездын. Война вылӧ босьтісны 1941 вося сентябр 11 лунӧ. Сержант. Служитіс 224-ӧд дивизиялӧн 185-ӧд полкын. Вошис юӧртӧг 1943 вося февраль 1 лунӧ». Бать йывсьыс этшаника тӧданасӧ висьталіс пиыс — 74 арӧса Григорий Изосимович Морохин:
«Медводз пасъя, мый бать абу 1912 вося, кыдзи гижӧмаӧсь Габовын олысь фронтӧвикъяслӧн лыдын, а 1902 вося. Босьтісны фронт вылӧ, кыдзи висьтавліс мам, война сувтан воас пыр жӧ 39 арӧсӧн нин. Менам вӧвсьӧма арӧсаӧн, лабич пӧлӧн ветлысьӧн. Менӧ нуӧма моздорас му помӧдз да шуӧма: «Дитя пиӧй, сэсся, навернӧ, ог аддзысьлӧй». Мукӧдъяскӧд сэсся лэччӧма Улыс Вочӧдз да водзӧ Кулӧмдінӧдз — райвоенкоматӧдз. Улыс Вочысь Габовӧ волывліс скӧтӧс бурдӧдысь Илья да висьталіс, быттьӧ батьӧй сувтӧдіс стройӧ война вылӧ мунысьясӧс да сэсся сылӧн юрнуӧдӧм улын и лэччисны водзӧ Кулӧмдінӧ. Гашкӧ, сиктсӧветсаяс пиысь кодкӧ тшӧктіс сылы, тӧдіс, мый мортыс абу полысь, пельпом вылас кутӧ вежӧра юр. Сійӧ ӧд Габов грездсянь 12 километр сайын ассьыс торъя овмӧс босьтчылӧма лӧсьӧдны, весиг вель ыджыд керка кыпӧдлӧма да видз-му вӧчлӧма. И коми-пермяк му вылын, Весляна ю бокын, керка кыпӧдлӧма. Збыльысь и ыджыд лолӧн да кыпалысьӧн вӧлӧма, война вылас лоӧма сержантӧн, отделениеса ли взводса командирӧн. Меным гортысь бокын, Кулӧмдінын, велӧдчигӧн весиг сьӧм сетлісны, кыдзи усьӧм командирлӧн пилы.
Бать ачыс абу Габовса, а Улыс Вочса. Видзӧдӧм серти, кыдзи и мукӧдъяс, локтӧма татчӧ озыр парма-вӧр вӧсна, медым бура кыйсьыны. Чӧс туйыс 12 километрсайса керка кыпӧданінын, Яга ёль йылын и вӧлі. Ме чайта, мый локтысь морттӧ габовсаяс матіас эз сибӧдны да сійӧн на и муніс та ылнаас да лэптіс керка, мед весиг овны сэні семьяӧн. Но, видзӧдӧм серти, сьӧд вӧр шӧрӧ мунысь ань эз ло да ковмис бӧр локны Габовӧ. Тані нин кыпӧдіс нӧшта ыджыд керка да кутіс овны Вась Ольгакӧд — ас дорсьыс арлыдаджык нывбабакӧд. 1929 воын чужис Иван — менам вок. Сылы да мамыслы и колис тайӧ ыджыд керкасӧ батьӧй, кор война сувттӧдз на ӧтувтчис мамкӧд — Агафья Фёдоровнакӧд, сиктса ногӧн кӧ Каруш Ӧгашкӧд. Шулӧмаӧсь мам сертиыс, кодлӧн нимыс вӧлӧма Харитина, лоӧма Карушӧн. Мыйла батьлӧн вежыс петӧма мам вылӧ, гӧгӧрвоана: мам вӧлӧма сы дорысь 13 арӧсӧн том да и мича. Ме чужи 1940 воын да батьлӧн война вылӧ мунігӧн мамӧ вӧлӧма кынӧмаӧн. Чужӧма Светлана, но дзолянас и кувсьӧма.
Батьӧй, татшӧм зіль мортыд, дерт жӧ, вӧлі киподтуя, гортад коланасӧ ставсӧ вӧчавліс ачыс. Колӧкӧ, и мамкӧд на керкатӧ кыпӧдіс, да падмӧдіс война. Ме вида ачымӧс, мый сэтшӧм этша сы йылысь тӧда, эг видз весиг ӧти письмӧ, кодъяс куим вонад, дерт жӧ, волісны мамлы. Ӧти фотография и эм, аттьӧ Зарема нылӧйлы, коді вӧчӧдіс да сетіс меным. Ме ёна муна сы вылӧ и сы кодь жӧ ляпкыдик тушаа. И абу жӧ, сідз кӧ нин шуны, полысь. Вӧр-ватӧ гежмалі бурпӧт, лӧньышті сӧмын бӧръя кадӧ.
Кӧть и вӧлім торъя мамъяслӧн, ми ёна ёртасьлім Иван воккӧд, коді абу нин ловъя. Сійӧ мунӧ жӧ батьлань. Иванӧн кыпӧдӧм керкаын олӧ семьяыскӧд Василий пиыс, коді Сыктывдін районса Ыбын велӧдӧм да пенсия вылӧ петӧм бӧрын бергӧдчис гортас, ӧні грездын старӧста. Сыкӧд ми зэв жӧ лӧсялам. Ёрта кутӧдыд зэв на и колӧ ыджыд арлыднад.
Ыджыд буртор, мый Габовын, бур йӧзлӧн водзмӧстчӧмӧн, кыпӧдісны фронтӧвикъяслӧн паметь кузя Георгий Победоносецлысь часовня, кӧні мемориальнӧй пӧв вылын лоӧ и батьлӧн нимыс. Тайӧ часовняыс быд лун лоӧ менам синъяс водзын, лоас быд лун паметьын и батьӧй, коді сетіс меным олӧм».
5.08.2014.
