ВЕРДЫСЬ

Сергей Никифорович Лютоевлӧн снимок дінӧ тайӧ гижӧд улас верма содтыны, мый сійӧ абу нин ловъя. Ачыс Вылыс Вочысь, воліс Габовӧ Иван Никифорович вокыскӧд война бӧрын. Кыкнанныс олісны гӧтыраӧн-котыраӧн, овмӧс кутӧмӧн. Помнита челядьдырсяысь, мый Сергей Никифорович вӧлі изысьӧн. Мельничаыс аслас керкагорувса Воч ю вылын и сулаліс. Сэні Сергей дядь изіс колхозникъяслы трудодень вылӧ юклӧм тусь. Вайліс и мам, а сыкӧд волывлі и ме. Косньӧдіник мортыс лэптыліс помӧминысь пӧвъясысь вӧчӧм пач пӧдан сямаӧс, ва ӧдӧбӧн чепӧсйыліс тьӧскысь вӧчӧм паськыд ворйӧд кык ыджыд гӧгыль йитысь пӧвъяс вылӧ, барабаныс босьтчыліс бергавны да бергӧдлыны тусьсӧ изысь изки. Ог кут гижны, кыдзи ставыс артмыліс, пасъя сӧмын, мый пызь измыліс, куралігӧн вӧлі пӧсь на. Да нӧшта гӧгыльяс да изки бергалігас ставыс грымакыліс, мый эз кыв весиг сёрни.

Татшӧм ногӧн, Сергей дядь вӧлі эз сӧмын удж тӧдысьӧн, а грездсаӧс вердысьӧн. Сылӧн ставыс век вӧлі дась, некыті абу киссьӧма ли жугалӧма. Сійӧ жӧ кывкутіс мельничалӧн удж вӧсна, кор колхоз вартліс нянь. Кольтаяссӧ сюявлісны машиналӧн барабан улӧ разӧдӧмӧн, тусьяс гылавлісны да шаргӧмӧн шаргисны. Мельнича сідзжӧ бергӧдліс тӧчила, код вылын вӧсньӧдлісны уклад дорсӧ гӧрбуш косаяслысь. Ме ачым на тӧчитчылі том дырйи.

Грездӧ электричество вайӧдӧм да мукӧд буртор лоӧм бӧрын мельнича йывсьыд вунӧдісны. Дзикӧдз киссьӧм бӧрас тыртіс лыаӧн.

Нӧшта тӧда, мый Сергей дядь вӧлі бур кыйсьысьӧн, яйтӧг да черитӧг эз ов. Сідзжӧ мортыс вӧлі кыввора, но асьсӧ вылӧ эз лэптывлы, война вылӧ ветлӧмӧн эз ошйысьлы. Ӧти кывйӧн кӧ, мортыс вӧлі шань. Сы вӧсна и шуи сы йылысь шоныд кывъяс.

10.06.2014.