ЫЛІ АСЫВВЫВСЯНЬ ПРАГАӦДЗ

Коми республикалӧн «Паметь книгаын» (6-ӧд том) гижӧма: «Лютоев Павел Андреевич (1919–1981). Чужліс Вылыс Воч сиктын. Гӧрд Армияӧ босьтісны 1939 воын Кулӧмдінса райвоенкомат пыр. Сержант. Служитіс НКВД-лӧн торъя юкӧнса 38 армиялӧн 104 торъя стрелкӧвӧй бригадаса 42 стрелкӧвӧй полкын. Демобилизуйтісны 1946 воын. Гуалӧма Габовын».

Мый кутӧ юрас, бать йывсьыс висьталіс пиыс — Иван Павлович Лютоев — Коми республикаса пыдди пуктана уджалысь, Зимстанса олысь:

«Батьӧ Габовӧ воліс Вылыс Вочысь война бӧрас нин. Чӧс туйыс грездсянь вӧлі эз нин сэтшӧм ылын да морттӧ кыскис том вирыс. Габовӧ вужъясис и кыйсьысь жӧ Ӧльӧксан вокыс да кыкнанныс гӧтрасисны, лӧсьӧдісны семьяяс. Ме тӧда, мый вӧліны нёль вок, нӧшта Иван да Андрей. Бӧръяыс усьліс Ленинградса фронт вылын блокада дырйи, а Иван дядь фронт вылысь бергӧдчыліс вермытӧм мортӧн. Но сыысь бур чери кыйысьыс Вылыс Вочын эз вӧв некод.

Батьӧс босьтісны армияӧ 1939 воын. Нуисны Ылі Асыввылӧ. Сэні вӧчисны аэродром, пӧрӧдісны сопкаясысь вӧр, керъяссӧ кыскалісны вӧлӧн. Телегаяс вӧліны тормозаӧсь, медым лэччӧдлігӧн эз гӧгыльтчыны ас окота серти. Сэні служитіс куим во. Кутіс лача, мый лэдзасны гортас, но пансис война. Кор разведчик Зоргелӧн висьталӧм серти лоис тӧдса, мый Япония оз уськӧдчы Сӧветскӧй Союз вылӧ, Ылі Асыввылысь войскаӧс шыбитісны Москва дорӧ.

Сэтчӧ веськаліс и батьӧй. Сэсянь тышъясӧн муніс сэсся Прагаӧдз, вуджис став войнасӧ. Пасйисны «За освобождение Праги» медальӧн. Да и война бӧрас на служитіс кык во, ставсӧ кӧкъямысӧс. Гортас локтіс 1947 воын.

Война вылын ранитчыліс. Снарядлӧн тор боксьыс яйсӧ чашнитіс вель ыджыда. Пывсигъясӧн тайӧ тыдаліс зэв бура. Тайӧ ранитчӧм да госпитальын куйлӧм бӧрын бать веськаліс НКВД-лӧн ротаӧ. Веськӧдліс сійӧн капитан. Хром сапӧгыс век дзирдаліс, голя гӧгӧрыс гимнастёрка вылас дӧраыс век вӧлі лым еджыд. Шуліс: «Пейте, сколько влезет, но чтобы в любую секунду были трезвые! Вот парабеллум. Расстреляю без суда и следствия». И юны он лысьт. Кыдз нӧ верман юӧм юрӧн кыпавны быд здукын?

Колӧ жӧ лоны сідз, мый война бӧрас НКВД ротаыскӧд веськаліс Курскӧй обласьтӧ, кӧні тышкасьліс фашистъяскӧд. Тайӧ пӧрйӧ бырӧдны Сӧвет власьтлы паныд сулалысь бандаясӧс. Кор ранитчыліс тані, сэки куйліс олӧмакодь нин нывбабалӧн керкаын. И тайӧ нывбабаыслӧн вӧлі томиник Валя ныв, школаӧ на котралысь, а 1947 воас лоӧма нин авъя нылӧн. Сійӧс и вайӧдіс аскӧдыс гортас — Вылыс Вочӧ. Менам пӧч рочнад ньӧти эз куж ни эз гӧгӧрво да кытыськӧ вайӧм монькӧд эз лӧсяв, мустӧмтіс сійӧс. Батьлы, кыдзи висьтавліс ачыс, дона мортыд лоис жаль да мӧдӧдчис нывлӧн чужанінӧ — Курскӧй обласьтӧ. Сыктывкарын паныдасис аслас бур тӧдсакӧд, гашкӧ, фронтвывса ёртыскӧд, коді сылы шуис: «Пельпом вылад юр кутан да он жӧ сэтчӧ мун: гӧгӧр киссьӧма, нинӧм сёйны. А гортад пармаыс вердас». Батьӧ и кольччис, а нылыд, ыджыд рушкуа нин, бӧрдӧмӧн муніс гортас. Сысянь воліс ӧти письмӧ: гортас воӧма лючки, некытчӧ абу вошӧма. Вермас лоны, мый Курскӧй обласьтас менам эм чой ли вок.

Ме висьталі нин, мый Габовӧ бать воліс Вылыс Вочысь. Во ли, кык ли оліс Денисья Ивановна Лодыгинакӧд, сэсся гӧтрасис менам мам Окулина Ивановна Лодыгина вылӧ. Ми батьлӧн да мамлӧн витӧнӧсь: Николай (вӧйис 1985 воын), ме, Пантелеймон, Андрей да Валентина. Бать вӧлі зэв киподтуя, вӧчліс ставсӧ, мый колӧ сиктса овмӧслы: вила и куран, коса и чер, весиг пыж, куричьяс да рамаяс. И миянӧс быдторйӧ велӧдіс да уджӧдліс. Ёна кыйсьыліс, мый вӧсна и локтіс Вылыс Вочсьыс. Менӧ босьтіс вӧрӧ квайт арӧссянь. Ме ог помнит, висьтавліс ачыс, мый нырысь вир чепӧсйис да бӧрддзи. А вот квайт арӧсӧн ружьеысь пасӧ лыйӧмӧс помнита.

Босьтны кӧ батьлысь уджсӧ, то сійӧ вӧлі лесхозын лесникӧн, госпромхозын вӧрса мастерӧн, быдсяма удж вӧчис колхозын. Кор уджавліс лесникнас, помнита, мый кӧдзлім да садитавлім пуяс. Весь овны эз сетлы. Ме дас нёль арӧснад ытшки нин верстьӧ йӧзкӧд радын. Сэки лыддьылісны, мый татшӧм арлыднад верстьӧ морт нин.

Батьӧ бура лӧсяліс вокыскӧд — Ӧльӧксан дядькӧд. Батьлӧн чӧс туйыс вӧлі Гусика ёль бокын, а дядьлӧн Яга ёль йылын. Абу сэтшӧм матынӧсь, но сӧнӧда кокъяслы абу ылын, волісны ӧта-мӧд дораныс вӧр керкаясӧ, да и Расулӧ тар койт вылӧ ӧтув ветлывлісны. Ӧні Гусикаладорсӧ дзикӧдз босьтісны вылысвочсаяс. Ӧндрей воклы, коді олӧ Габовын, ковмис локны Яга ёль да Саватей ёль бокъясӧ.

Габовсаяс — ставныс Лодыгинъяс, позьӧ шуны, ӧти вуж. Кык вокӧс примитісны, сідз нин кӧ шуны, эз нимкодьпырысь, но зільлуннас да аньтуйнас найӧ небзьӧдісны грездсаяслысь сьӧлӧмъяснысӧ да лоисны ас йӧзӧн. Менам бать ёнджыкасӧ ёртасьліс горулысь жӧ катӧм Николай Иванович Морохинкӧд, татчӧс Николай Степанович да Матвей Фёдорович Лодыгинъяскӧд, Иван Изосимович да Григорий Изосимович Морохинъяс вокъяскӧд.

Пасъя, мый бать-мамӧс да миянӧс суліс ыджыд ускӧттьӧ — то ли 1956, то ли 1957 воын сотчис керканым. Сотчис лун шӧра лунӧ. Николай ёртлы Дмитрий вокыс вайӧма коньки, да ми сыкӧд ыджыд батьӧяссянь мӧдӧдчим вӧскресенньӧ лунӧ исласьны Микит Иван Миколай весьтса ты вылын, да друг кутіс кывны кула-кола. Видзӧдлім да — сотчӧ миян керканым (бӧрыннас тӧдмалім, мый уськӧдӧма би нёль арӧса вокӧй). Бать да мам эз вӧвны, весиг шойччан лунӧ мунісны пӧрӧдны вӧр. Бур, мый эз сотчыны ачыс Пантиль да пельтӧм нин Гриша Ӧндрей пӧльӧй. Анна Федосеевна Лодыгина смелмӧдчылӧма пыравны ӧшинь жугӧдӧмӧн да ӧти сундук шыбитӧма — сійӧ и колис став овмӧсысь. Сэсся бать грездсаяслӧн отсӧгӧн кыпӧдіс выль керка, кӧні ӧні олӧ Ӧндрей вок.

Со татшӧм олан туйыс батьлӧн, коді аслас олӧмӧн, миянӧс вӧльнӧй светас лэдзӧмӧн да бур туй вылӧ сувтӧдӧмӧн колис казялана пай. Кыдз шулӧны, югыдін да шоныдін сылы. Кувліс сійӧ 1981 вося февральын. Ме, грездӧ волывлігӧн, ветла шойна вылӧ да копыртчыла сылы и мамлы».

8.05.2014.