АСЛАС КЕРКАЫН

Менам бать Василий Фёдорович Лодыгинлӧн висьталӧм серти, Иван дядьӧс — Иван Фёдорович Лодыгинӧс — Великӧй Отечественнӧй война вылӧ Габовысь босьтісны 1942 воын 17 арӧсӧн. Муніс би и ва пыр.

Вӧрӧгкӧд повтӧг тышкасьӧмысь сетісны уна орден да медаль. Кӧсйӧмаӧсь сетны весиг Сӧветскӧй Союзса Геройлысь ним.

Победа лун Иван дядьӧс суис Германияын. 1947 воӧдз отсаліс сувтны кок вылас ГДР-лы. Война бӧрын овмӧдчис Сыктывкарын, тані Депутатскӧй улича вылын лэптіс ас керка. Юркарын медводз уджаліс милицияын, а сэсся, мед семьяӧ воис унджык сьӧм, босьтчис лэптыны керкаяс да мукӧдтор.

Чеччыліс водз, кӧть оліс карын, вӧдитіс картупель да унапӧлӧс градвыв пуктас. Чӧскыда пусис да карӧ волігъясӧн чӧсмӧдліс миянӧс. Ме нӧшта и олі сы ордын уна гожӧм. Иван дядь дорӧ век сувтлісны Дзолльысь да Габовысь локтысьяс. Ставнысӧ сибӧдіс, вердіс да юкталіс.

Кувтӧдзыс век вӧлі мича. Оліс кӧкъямысдас гӧгӧр во да быттьӧ эз и вӧв пӧрысь. Кузя эз сёрнитлы, кужис кывзыны мукӧдӧс.

Быд Победа лунӧ ветліс юркарса парад вылӧ. Сетлісны ӧти жыръя бур оланін, но ас киӧн вӧчӧм керкасӧ кольны эз убӧлит.

Куйлӧ муса морт Гӧрд Затонса шойна вылын.