ВӦЧНЫ СТАВ КОЛАНАСӦ

Районса администрацияын юралысь Д. А. Шатохин дорын сёрнитісны сы йылысь, кыдзи бура помавны Габовын фронтӧвикъяслы сиӧм Георгий Победоносецлысь часовня кыпӧдӧм, могмӧдны сійӧс став коланаторйӧн, кыдзи восьтны сійӧс локтан вося май 6 лунӧ.

28-ӧд Невельса Гӧрд Знамяа дивизиялӧн республикаса юкӧнысь ветеранъяс сӧветса кывкутысь секретар С. В. Таскаев, коді вӧлі часовня кыпӧдӧм кузя водзмӧстчысьяс лыдын да ас вылӧ босьтіс делӧсӧ помӧдз вайӧдӧм, висьталіс, мый медшӧр могӧн ӧні лоӧ 2015 вося май 6 лун кежлӧ, кор нимӧдӧны Георгий Победоносецӧс, грездын часовнясӧ вежӧдӧм кежлӧ лӧсьӧдчӧм. Локтасны усьӧм воинъяслӧн рӧдвуж, олӧма йӧз, Габов грездса да Дзоль сиктса олысьяс, велӧдчысьяс — ставыс 100 кымын морт. Вежӧдас часовнясӧ Кулӧмдінысь Петыр-Павел вичкоса вежа ай Александр, а сыӧдз шойнавывса ӧти фронтӧвиклӧн гу дорын лоӧ лития. Лоӧ медводдза номера пост. Салдатлӧн паськӧмӧн, автоматъясӧн, лентаясӧн, знамяӧн кутасны сулавны Зимстанса шӧр школаысь велӧдчысьяс, кывкутысьыс ОБЖ велӧдысь Е. А. Кочанов. Юргас кыпыд салют, кодӧс сетасны полицияса уджалысьяс. Часовнялысь нимӧдан ключ сетасны Сыктывкарса да Воркутаса епархиялы да вежа керка тайӧ лунсяньыс лоӧ сылӧн бордъяс улын. Сэсся юргасны Рӧдина, чужан му, война йылысь кывбуръяс да сьыланкывъяс, шуасны ӧти бӧрся мӧд нимъяссӧ Габовса 24-нан фронтӧвиклысь. Пуктасны быд фронтӧвиклы сиӧм кыдзьяс. Бӧрыннас лоӧ ӧтувъя пызан.

С. В. Таскаев содтіс, мый бур эськӧ вӧлі, район кӧ отсыштіс сьӧмӧн. Пыр жӧ корсисны позянлун, мый ӧттор-мӧдтор вӧчӧм вылӧ (колӧ на часовня пытшкӧ лӧсьӧдны фронтӧвикъяслӧн ова да ним-вича, а сідзжӧ войнавывса туя гижӧдӧн пӧв, налӧн керкаяс вылӧ пасъяс, лэдзны книга да с.в.) сетасны 30 сюрс шайт.

В. Г. Лодыгин, коді сідзжӧ кывкутӧ аслас чужанінын вежа керка кыпӧдӧм да сыкӧд йитчӧмторъяс вӧсна, вӧзйис мичаа потшны шойнасӧ ставнас. Сійӧ кык ты костын да ковмас потшны сӧмын кыклаті: юсянь пыранін да Дзолльӧ мунан туй бок. Абу лёк сувтӧдны шойна вылӧ пыранінӧ и стела. Оз кӧ тайӧ артмы, то кӧть лӧсьӧдны мича дзиръя.

Сідзжӧ колӧ вайӧдны йӧзӧдз, мый и водзӧ на колана налӧн отсӧгыс. Шензьӧдӧ сійӧ, мый ӧнӧдз ни ӧти кӧпейка эз сетны ӧткымын фронтӧвикъяслӧн ныв-пияныс, ог нин казьтыштлӧй ылі рӧдвужӧс. Этша мый найӧ вӧчӧны и батьясныслысь гуяс да крестъяс лӧсьӧдӧм-выльмӧдӧм могысь.

— Габовын фронтӧвикъяслы сиӧм часовня кыпӧдӧм да сійӧс локтан воын вежӧдӧм, кыв шутӧг, Великӧй Отечественнӧй войнаын Победалы 70 во пасйӧмын тӧдчанатор, — шуис Д. А. Шатохин. — Миянлы колӧ вӧчны став верманасӧ, медым сійӧ артмис став сьӧлӧмсянь. И эз сӧмын Габовын, но и ставнас районын.

Колӧ чайтны, мый Габовын ыджыд аддзысьлӧм кежлӧ урчитӧмторъяс пӧртсясны олӧмӧ.

6.12.2014.